الماتى اكىمى باۋىرجان بايبەك جانە دۇنيەجۇزىلىك دەنساۋلىق ساقتاۋ ۇيىمى ەۋروپالىق بيۋروسىنىڭ ديرەكتورى جۋجاننا ياكاب مەگاپوليستە ءوتىپ جاتقان «سالاۋاتتى قالالار» ەۋروپالىق جەلىسى مەرلەرىنىڭ ءسامميتى اياسىندا ءوزارا ىنتىماقتاستىقتىڭ پەرسپەكتيۆالارىن تالقىلادى.

اڭگىمە بارىسىندا جۋجاننا ياكاب ددۇ-نىڭ الماتىمەن، جالپى قازاقستانمەن ىنتىماقتاستىعى دەڭگەيىن جوعارى باعالادى، سالاۋاتتى ءومىردى قالىپتاستىرۋ مەن دەنساۋلىق ساقتاۋ سالاسىن مودەرنيزاتسيالاۋدىڭ وڭ ناتيجەلەرىن اتاپ ءوتتى.

«جايلى قالا كەڭىستىگىن ارتتىرۋ، قوعامدىق كولىكتى دامىتۋ، ۆەلوسيپەدشىلەر جانە سپورتشىلار ءۇشىن قولايلى ينفراقۇرىلىمدى قالىپتاستىرۋ قالا تۇرعىندارىنىڭ دەنساۋلىعىن جاقسارتادى. جۇرگىزىلگەن زەرتتەۋلەر كورسەتكەندەي، قالانى دۇرىس جوسپارلاۋ ونكولوگيالىق جانە جۇرەك- قان تامىرلارى اۋرۋلارى سالدارىنان بولاتىن ءولىم دەڭگەيىن ورتا ەسەپپەن 25%-عا قىسقارتادى ەكەن. الماتىنىڭ تاجىريبەسى تەك قازاقستانعا عانا ەمەس، ەۋروپا ءوڭىرىنىڭ بىرقاتار قالالارىنا دا پايدالى»، - دەپ اتاپ ءوتتى ددۇ-ى ەۋروپالىق بيۋروسىنىڭ ديرەكتورى

ول ءوزىنىڭ سوزىندە وسىدان 40 جىل بۇرىن قابىلدانعان الماتى دەكلاراتسياسىنىڭ باستاپقى مەديتسينالىق-سانيتارلىق كومەك كورسەتۋدە قازىردىڭ وزىندە اكۋتالدى ەكەنىن ءارى حالىقارالىق دەڭگەيدە ماڭىزدى ءرول اتقاراتىنىن ايتتى. ددۇ قالامەن ىنتىماقتاستىقتى كەڭىنەن دامىتۋدى جوسپارلاۋدا جانە قالا تۇرعىندارىنىڭ سالاۋاتتىلىعىن جاقسارتۋداعى جۇمىستى ودان ءارى جالعاستىراتىن بولادى.

«مەملەكەت باسشىسىنىڭ جولداۋىندا ەلىمىزدىڭ ودان ءارى دامۋىنا ىقپال ەتەتىن قالالاردى تۇراقتى ورىستەتۋگە ەرەكشە ءمان بەرىلگەن. جا يلى جانە ەكولوگيالىق قالا كەڭىستىگىن،وسەر ەلدەرىندەگىدەي ساپالى ءبىلىم مەن دەنساۋلىق ساقتاۋ قىزمەتىن قالىپتاستىرۋ ءبىزدىڭ باستى باعىتتارىمىزدىڭ ءبىرى بولىپ تابىلادى. وسى ورايدا ساپالى، جوعارى دامىعان مەديتسينالىق قىزمەت كورسەتۋدەگى وزگە قالالاردىڭ وزىق تاجىريبەلەرى بىزگە وتە قىزىق»، - دەپ اتاپ ءوتتى ءوز كەزەگىندە باۋىرجان بايبەك.

سامميت بارىسىندا الماتى اكىمى بىرقاتار ەكىجاقتى كەزدەسۋلەر وتكىزدى، ونىڭ ىشىندە رف ۆولوگود وبلىسىنىڭ گۋبەرناتورى ولەگ كۋۆشيننيكوۆپەن، فرانتسۋزدىڭ رەنن،نيدەرلاندتىق ۋترەحت قالالارىنىڭ باسشىلارىمەن جۇزدەستى.

Abai.kz