كەزدەسۋدە ءبىلىم بەرۋ جۇيەسىن دامىتۋعا قاتىستى ماسەلەلەر، اتاپ ايتقاندا، مەكتەپكە دەيىنگى جانە مەكتەپتە ءبىلىم بەرۋ ساپاسىن ارتتىرۋ، بالالاردىڭ قاۋىپسىزدىگىن قامتاماسىز ەتۋ، پەداگوگتەردىڭ الەۋمەتتىك مارتەبەسىن كوتەرۋ، ينفراقۇرىلىمدى جاڭعىرتۋ، تسيفرلاندىرۋ، سونداي-اق، ءۇش اۋىسىمدىق ءبىلىم بەرۋدى جويۋ ماقساتىندا جاڭا مەكتەپتەر سالۋ ماسەلەلەرى تالقىلاندى. كەزدەسۋدىڭ ماقساتى — مەملەكەت باسشىسىنىڭ جولداۋىن ورىنداۋ اياسىندا ءبىلىم بەرۋ جۇيەسىنىڭ ماسەلەلەرى قالاي شەشىلىپ جاتقانىن ءوڭىر تۇرعىندارىنىڭ اۋىزىنان ەستۋ.

پرەمەر-مينيستر الداعى ءۇش جىلدا جولداۋدى ىسكە اسىرۋعا 1,75 ترلن تەڭگە جۇمسالاتىنىن ايتتى. ەڭ الدىمەن، 01.01.2019 ج. باستاپ ەڭ تومەنگى جالاقىنى 1,5 ەسەگە 28 مىڭنان 42 مىڭ تەڭگەگە دەيىن ارتتىرۋ جۇمىستارى جۇرگىزىلەدى. ناتيجەسىندە 1,3 ملن جالدامالى قىزمەتكەردىڭ جالاقىسى 30%-عا وسەدى. بۇل 275 مىڭ ازاماتتىق قىزمەتكەرگە قاتىستى، ونىڭ ىشىندە پەداگوگيكالىق قىزمەتكەرلەردىڭ ەڭبەكاقىسى 35%-عا ارتادى.

سونىمەن قاتار، كەزدەسۋگە قاتىسۋشىلار ءۇشىن مەملەكەت باسشىسىنىڭ ءبىلىم جانە دەنساۋلىق ساقتاۋ جۇيەسىن دامىتۋعا باعىتتالاتىن مەملەكەتتىك شىعىستاردى الداعى بەس جىل ىشىندە ءجىو-ءنىڭ 10%-ىنا دەيىن ارتۋ شەشىمى وتە ماڭىزدى.

ەكىنشىدەن، مەملەكەت باسشىسىنىڭ تاپسىرماسى بويىنشا، قوسىمشا بولىنگەن 50 ملرد تەڭگە ءۇش اۋىسىمدى مەكتەپتەر مەن ورىنداردىڭ جەتىسپەۋشىلىگىن جويۋ ءۇشىن باعىتتالۋى ءتيىس ەكەندىگى ايتىلدى. وسىلايشا، مەكتەپ قۇرىلىسىنا جالپى العاندا 100 ملرد تەڭگە جۋىق قارجى ءبولىنىپ وتىر. سونىمەن قاتار، پرەمەر-مينيستر جاڭا ءبىلىم بەرۋ نىساندارىن سالۋ ءۇشىن جەكە ينۆەستيتسيالاردى تارتىپ، مەملەكەتتىك-جەكەمەنشىك ارىپتەستىك تەتىكتەرىن پايدالانۋ قاجەتتىگىن اتاپ ءوتتى.

بۇدان وزگە، بالالار قاۋىپسىزدىگى ءۇشىن باقىلاۋ كامەرالارىن ورناتۋ، مۇعالىمدەردىڭ مارتەبەسىن كوتەرۋ ماسەلەلەرى قوزعالدى. جولداۋ اياسىندا ەندى پەداگوگتاردىڭ مارتەبەسى تۇبەگەيلى قاراستىرىلىپ، ولاردىڭ جالاقىسى مەن الەۋمەتتىك كەپىلدىكتەر ارتىپ، جۇكتەمەسى ازايادى. ءبىلىم جانە عىلىم مينيسترلىگى «پەداگوگ مارتەبەسى تۋرالى» زاڭ جوباسىن ازىرلەپ جاتىر. سونداي-اق، ەندى تۇلەكتەرگە دەگەن سۇرانىس پەن ەڭبەكپەن قامتۋ كورسەتكىشتەرىنە نەگىزدەلە وتىرىپ باقىلاناتىن جوعارى وقۋ ورىندارى مەن كوللەدجدەردىڭ جۇمىس ساپاسىن جاقسارتۋ ماسەلەسى دە قوزعالدى.

تالقىلاۋ كەزىندە ءبىلىم بەرۋ سالاسىنىڭ ماماندارى جولداۋدا ايتىلعان پرەزيدەنت باستامالارىن قولدايتىنىن جەتكىزدى.

ەركىن اۋىلىنداعى ە. بەرلىقوجاۇلى اتىنداعى №11 مەكتەپتىڭ فيزيكا ءپانىنىڭ مۇعالىمى ق. جاقسىباەۆ «ديپلوممەن اۋىلعا!» باعدارلاماسىنىڭ قاتىسۋشى رەتىندە جاس مۇعالىمدەردى قولداۋدىڭ قانشالىقتى ماڭىزدى ەكەنىن اتاپ ءوتتى.

«ءبىزدىڭ وڭىردە 418 مىڭنان استام جاستار بار، ولاردىڭ 80%-ى – اۋىل جاستارى. اۋىل جاستارى وقۋ بىتىرگەن سوڭ تۇراقتى جۇمىس تابا المايتىن جاعدايلار بولادى. جاستار جىلى كوپتەگەن ماسەلەلەردى شەشۋگە جاڭا سەرپىن بەرەدى دەپ ۇمىتتەنەمىن. ءبىز ءۇشىن بارلىق جاعداي جاسالعان، اعا بۋىن ءبىزدى قولدايدى، ءبىز تەك العا ۇمتىلۋعا ءتيىسپىز»، — دەدى ق. جاقسىباەۆ.

قاپشاعاي قالاسىنىڭ №5 ورتا مەكتەبىنىڭ اعىلشىن ءتىلى ءپانىنىڭ مۇعالىمى يۋ. دونسكايا ءوز سوزىندە مۇعالىمگە جاسالعان قامقورلىق — بۇل وسكەلەڭ ۇرپاققا، ەلدىڭ بولاشاعىنا جاسالعان قامقورلىق دەپ مالىمدەدى.

«ءبىلىم بەرۋ، جاس ۇرپاقتى تاربيەلەۋ مەملەكەت باسشىسىنىڭ نازارىنان ەشقاشان تىس قالعان ەمەس. جولداۋ ءدال 5 قازان كۇنى، ياعني مۇعالىمدەر كۇنىمەن تۇسپا-تۇس كەلدى. ءبىز ونى سىي رەتىندە قابىل الدىق. ەلباسى “پەداگوگ مارتەبەسى تۋرالى” زاڭ قابىلداۋدى تاپسىردى، وندا مۇعالىمدەردىڭ قۇقىقتىق جانە الەۋمەتتىك قورعالۋى، اپتا سايىنعى جۇمىس جۇكتەمەسىنىڭ تومەندەۋى، سونداي-اق مۇعالىمدەر مەن بالاباقشا تاربيەشىلەرىنىڭ جالاقىسى ماسەلەسى كوتەرىلەتىن بولادى»، — دەي كەلە، يۋ. دونسكايا پرەزيدەنتتىڭ ءداستۇرلى جىل سايىنعى جولداۋى حالقىمىزدىڭ رۋحىن جانە كۇش-جىگەرىن بىرىكتىرەتىن ماڭىزدى قۇجات دەگەن ويىن جەتكىزدى.

ءوز كەزەگىندە، ءبىلىم جانە عىلىم ءمينيسترى ەرلان ساعاديەۆ كوتەرىلگەن سۇراقتارعا تۇسىنىكتەمە بەرە كەلە، بۇگىنگى كۇنى «مۇعالىمنىڭ مارتەبەسى تۋرالى» زاڭ جوباسى تالقىلانىپ جاتقانىن ايتتى. قوعام تاراپىنان ءارتۇرلى ۇسىنىستار ءتۇسىپ جاتىر. بارلىق ۇسىنىستار جيناقتالعان، ەندى جوبا ەكى اي بويى تالقىلاۋدان وتەدى. سودان كەيىن جوبا قر بعم سايتىنا شىعارىلادى. قوعامدىق تالداۋ جۇرگىزىلەدى. ءمينيستردىڭ ايتۋىنشا، جىلدىڭ سوڭىنا دەيىن زاڭ جوباسى دايىن بولادى.

سونىمەن قاتار، كەزدەسۋدە اتا-انالار مەن ستۋدەنتتەر قاۋىمىنىڭ وكىلدەرى ءسوز سويلەدى. وبلىستىق اتا-انالار كوميتەتىنىڭ مۇشەسى د. ءابدىلدينا بالالار قاۋىپسىزدىگىن قامتاماسىز ەتۋ، مەكتەپ پسيحولوگتارىنىڭ جۇمىسىن كۇشەيتۋ جانە قامقورشىلىق كەڭەستىڭ ءرولىن ارتتىرۋ تۋرالى ۇسىنىستارىن ايتتى. تالدىقورعان قالاسىنداعى №12 ورتا گيمنازيا مەكتەبىنىڭ ورىس ءتىلى مۇعالىمى ە. فيليمونوۆا مۇعالىمنىڭ مارتەبەسى جانە مۇعالىمدەردىڭ كاسىبي دامۋى تۋرالى ءوز پىكىرىن ءبىلدىردى.

اگروتەحنيكالىق كوللەدجدىڭ 3 كۋرس ستۋدەنتى ن. باباجان ءبىلىم بەرۋ ساپاسى، ستۋدەنتتىك جاتاقحانالاردىڭ جاي-كۇيى مەن جاستار جىلىنا ارنالعان ستۋدەنتتەردىڭ ۇسىنىستارىن جەتكىزدى.

«پرەزيدەنت نۇرسۇلتان نازارباەۆتىڭ جاڭا جولداۋى جاستار ءۇشىن ەرەكشە ماڭىزدى. تاۋەلسىز قازاقستاننىڭ تاريحىندا تۇڭعىش رەت جاستار جىلى جاريالانىپ وتىر. جەتىسۋ جاستارى 2019 جىلدىڭ جاس ۇرپاققا ارنالاتىنىن ماقتانىشپەن ءارى قۋانىشپەن قابىلدادى. بيىل مەملەكەتتىك جاستار ساياساتىنىڭ جۇزەگە اسىرىلۋى ءبىزدىڭ وڭىرگە ەرەكشە سەرپىن بەرەدى دەپ ۇمىتتەنەمىز»، — دەدى نۇراي باباجان.

ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ رەكتورى ق. بايمىرزاەۆ مامان دايارلاۋ ساپاسىن ارتتىرۋ جانە وتاندىق جوو-لاردىڭ باسەكەگە قابىلەتتىگىن ارتتىرۋ ماسەلەلەرىنە توقتالدى.

ايتا كەتۋ كەرەك، پرەمەر-مينيستر جۇمىس ساپارى اياسىندا №28 مەكتەپ-ليتسەيدىڭ ات-مەكتەبىنە دە باردى، وندا وڭىردە ءبىلىم بەرۋ ساپاسىمەن تانىستى. جاڭا نىسان وقۋ جىلىنىڭ باسىندا پايدالانۋعا بەرىلگەن، ول 1200 ورىنعا ارنالعان.

ب. ساعىنتاەۆ مەكتەپتىڭ تەحنيكالىق جاراقتاندىرىلۋىن تەكسەرىپ، باعدارلامالاۋ، 3D-ديزاين، جوبالىق قىزمەت داعدىلارىنا وقىتاتىن مۋلتيمەديالىق كابينەت جۇمىسىمەن تانىستى. كابينەتتەر زاماناۋي تەحنولوگيالارمەن جاراقتاندىرىلعان، وقۋشىلاردىڭ ءبىلىم الۋىنا جانە دامۋىنا بارلىق قاجەتتى جاعدايلار جاسالعان.

ايتا كەتۋ كەرەك، تسيفرلىق ەكونوميكاعا جاس مامانداردى دايارلاۋ ماقساتىندا وبلىستا 21 روبوتتى تەحنيكا كابينەتى، 11 ات-سىنىبى جانە ەكى ات-ورتالىعى اشىلعان. الماتى ەكونوميكالىق، تالدىقورعان پوليتەحنيكالىق جانە تالدىقورعان اگرو-تەحنيكالىق كوللەدجدەرىنىڭ بازاسىندا ات-بىلىكتىلىكتەر بويىنشا ءۇش ورتالىق قۇرىلعان.

وبلىستا بارلىعى 2018 جىلى رەسپۋبليكالىق بيۋجەت ەسەبىنەن ءتورت مەكتەپتىڭ قۇرىلىسى اياقتالىپ، پايدالانۋعا بەرىلدى، 30 ءبىلىم بەرۋ نىسانى كۇردەلى جوندەۋدەن وتكىزىلدى. قازىرگى تاڭدا 22 ءبىلىم بەرۋ نىسانى سالىنىپ جاتىر. جىل سوڭىنا دەيىن ەكى مەكتەپتىڭ، ءبىر بالاباقشا مەن ءبىر مۋزىكا مەكتەبىنىڭ قۇرىلىسى اياقتالادى.