ءبىر دۇربەلەڭنىڭ جاقىنداپ كەلە جاتقانىن ىشتەي سەزەتىنبىز. بىراق، قالاي كەلەدى، قاي جاعىمىزدان سوعادى اڭعارماي قالدىق.

سول جىلعى جەلتوقسان ايىنىڭ ءوزى ءبىر ءتۇرلى ىزعارلى بولدى. بەس سومدىق راديوداعى ديكتوردىڭ داۋىسى جۇرەگىمە قانجار سۇققانداي اسەر قالدىردى. كازمۋ-ءدىڭ ستۋدەنتتەرى "مەنىڭ قازاقستانىمدى" شىرقاپ الاڭداعى شەرۋگە كەلىپ قوسىلدىق. قاس قارايىپ،كوز بايلانار مەزگىلدى كۇتىپ وتىرعان كومپارتيالىق بيلىك جازىقسىز جاستارعا الاپات سويقاندى باستاپ كەپ جىبەردى. ءورت سوندىرگىش ماشينالاردان سۋىق سۋ شاشۋ باستالدى. بىرەۋدى بىرەۋ تانىپ بولمايتىن الاساپىران باستالدى دا كەتتى. مۇزداي قارۋلانعان سولداتتار دا الاڭعا قاراي لاپ بەردى. باس الاڭ كادىمگى كينودان كورەتىن مايدان دالاسىنا اينالىپ كەتتى. جۋرفاكتىڭ جىگىتتەرى باسىمىزدى قوسىپ تايتالاسىپ باقتىق. جالاڭ قولمەن جالاڭداعان قارۋلىلىلارعا قالاي قارسى تۇراسىڭ. شەگىنە باستاعان ءبىر ساتتە : -باۋكە، سىتىلىپ شىعايىق، مىنالاردىڭ بەتى جامان، ونىڭ ۇستىنە كگب-نىڭ سەنىڭ ارتىڭا بايلاپ قويعان قوڭىراۋى بار،-دەدىم.
- اۋجەكە-اۋ، مىناۋ ءجۇز جىلدا دا قايتالانبايتىن ۇلى ەرلىك. ءالى كورەسىڭ، تاۋەلسىزدىكتىڭ باستاۋى وسى كۇن بولادى،-دەپ ايقاي سالدى.
ءتۇننىڭ ءبىر ۋاعىندا جاتاقحاناعا كەلىسىمەن بىردەن قاراۋىلعا ىلىندىك.

تۇنگى ساعات ۇشتە ۋنيۆەرسيتەتتىڭ ءماجىلىس زالىندا پارتيانىڭ شۇعىل جينالىسى ءوتتى. كۋرستاعى 9 كوممۋنيست قاتاڭ جازالاندىق. الدى وقۋدان دا قۋىلدى.بىتپەيتىن تەرگەۋدىڭ استىندا قالدىق.

كىمنىڭ كىم ەكەنى سىن ساعاتتا، باسىڭا ءىس تۇسكەندە بەلگىلى بولادى. ارامىزدان ءبىرلى-جارىم ساتقىندار دا شىقتى. ۇستازدارىمىزدىڭ دا تەپەرىشىن از كورمەدىك. كوزىمىزدى شۇقىپ تۇرىپ ،، دەكابريستەر،، دەيتىن. تەك قانا قايران تەمكەڭ، تەمىربەك قوجاكەەۆ اعاي عانا ءبىر ءتۇن جانىمىزدا بولىپ، مۇڭعا تولى جۇرەگىمىزدى، شەرگە تولى كوڭىلىمىزدى جۇباتىپ ەدى. "شىندىق شىڭىراۋدا جاتپايدى،ءتۇبى جارىققا شىعادى" دەگەندى دە سول دانىشپان ۇستازىمىز ايتىپ ەدى-اۋ.
ءبىزدى الاڭعا الىپ شىققان ۇلتتىق رۋح بولاتىن. رۋح! رۋح! رۋح! اتالارىمىزدان، اكەلەرىمىزدەن، ۇستازدارىمىزدان سىڭگەن رۋح.
امانگەلدى ءابىلوۆ
بەسىنشى جاتاقحانانىڭ اقساقالى.

شوقان سىزدىقۇلىنىڭ facebook پاراقشاسىنان

Abai.kz