مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءباسپاسوز حاتشىسى جاننا باستاروۆا استانادا 1 قاراشا كۇنى وتكەن بريفينگتە سىبايلاس جەمقورلىققا قارسى ءىس-قيمىل ۇلتتىق بيۋروسى مادەنيەت جانە سپورت مينيسترلىگىنىڭ جاۋاپتى حاتشىسى مەن اكىمشىلىك دەپارتامەنتىنىڭ ديرەكتورى ۇستىنەن سوتقا دەيىنگى تەرگەۋ جۇرگىزىپ جاتقانىن حابارلادى.
"ولار مەردىگەر ۇيىم جەتەكشىسىنەن مەملەكەتتىك ساتىپ الۋ كەلىسىمىن جاساسقانى جانە قامقورلىق كورسەتكەنى ءۇشىن پارا الدى دەگەن كۇدىككە ءىلىندى" دەدى باستاروۆا.
وسى اپتانىڭ باسىندا جەرگىلىكتى اقپارات اگەنتتىكتەرى سوت مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆتى كەپىلگە بوساتۋ تۋرالى بۇلتارتپاۋ شاراسىن بەلگىلەگەنىن حابارلاعان. سونىمەن قاتار، مينيسترلىكتىڭ اكىمشىلىك دەپارتامەنتىنىڭ ديرەكتورى ەرەناي دارجىباەۆتىڭ ۇيقاماققا الىنعانى بەلگىلى بولعان.
Abai.kz
