پرەزيدەنت ن.نازارباەۆتىڭ “قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ” اتتى جولداۋىندا حالىقتىڭ الەۋمەتتىك جاعدايىن جاقسارتۋعا باسا نازار اۋدارىلدى. وسىعان وراي جاڭادان قۇرىلعان تۇركىستان وبلىسىنا دا ەرەكشە كوڭىل ءبولىنىپ وتىر.

بۇگىندە بۇل وڭىردە پرەزيدەنت باستاماسىن باستى نازارعا الا وتىرىپ بىرقاتار جۇمىستار اتقارىلىپ جاتىر. سولاردىڭ ءبىرى تۇركىستان قالاسىنىڭ دامۋى بويىنشا 2018-2021 جىلدارعا ارنالعان دامۋ كونتسەپتسياسى جاسالىنىپ، تۇركىستان قالاسىن 3 ايماق بويىنشا دامىتۋ جۇمىستارى ازىرلەنۋدە. اتاپ ايتقاندا، تاريحي كيەلى ايماق - 89 گەكتار; قۇرىلىس سالۋدى رەتتەۋ ايماعى - 98 گەكتار; اكىمشىلىك-ىسكەرلىك ورتالىعى - 700 گەكتار اۋماقتا ورنالاسقان. بۇل تۋرالى بۇگىن تۇركىستان وبلىسىنىڭ اكىمى جانسەيىت تۇيمەباەۆ قر ورتالىق كوممۋنيكاتسيا قىزمەتى ۇيىمداستىرعان كوشپەلى بريفينگتە مالىمدەدى.

ايماق باسشىسى بايانداماسىندا 3 اۋماق بويىنشا بوي كوتەرەتىن عيماراتتاردى اتاپ ءوتتى.

«ءبىرىنشى ايماق: تۇركىستان قالاسىنداعى تاريحي كيەلى ايماقتا ورنالاسقان ح.ا.ياساۋي كەسەنەسىنىڭ اۋماعىنداعى 89 گەكتار جەر تەلىمىنە امفيتەاتر، سۋ بۇرقاقتارى، مادەني دەمالىس ورىندارى، ۆيزيت ورتالىعى جانە اشىق اسپان استىنداعى مۇراجاي عيماراتتاتتارى بوي كوتەرەتىن بولادى. ەكىنشى ايماق: قۇرىلىس جۇمىستارىن رەتتەۋ ايماعىنا «قازاقستان-نازارباەۆ» ورتالىعى، «قازاق حاندارى، بيلەرى» ورتالىعى، شىعىس مونشاسى، «ۇلى دالا ەلى» ورتالىعى، تۇركى الەمىنىڭ ورتالىعى، ح.ا.ياساۋي ورتالىعى، استانا ساياباعى، بەينەلەۋ-ونەر مۇراجايى جانە تاريحي-مادەني ورىندار ورتالىعىنىڭ عيماراتتارى سالىنادى. ءۇشىنشى ايماق: اكىمشىلىك ىسكەرلىك ورتالىعىن دامۋى ايماعىندا 700 گەكتار جەر تەلىمىن 3 كەزەڭگە ءبولىپ قاراستىرىلۋدا»، - دەدى جانسەيىت قانسەيىتۇلى.

قازىرگى تاڭدا، تۇركىستان قالاسىن تۇركى الەمىنىڭ مادەني-رۋحاني ورتالىعى رەتىندە دامىتۋدىڭ باس جوسپارى تۇجىرىمداماسىن ازىرلەۋ ماقساتىندا كونكۋرس ۇيىمداستىرلىپ، وتكىزىلدى.

بارلىعى 22 جوبا جولدانسا، ونىڭ 15-ءى زاڭدى تۇلعالار جانە 7-ءى جەكە تۇلعالار كونكۋرسقا قاتىستى. سونىڭ ىشىندە، تۇركيادان-2, كورەيا ەلىنەن-2, وسكەمەن قالاسىنان-1, الماتى قالاسىنان-6, استانا قالاسىنان-6, شىمكەنت قالاسىنان-4, تۇركىستان قالاسىنان-1. مەملەكەتتىك كوميسسيانىڭ شەشىمىنە سايكەس، 2018 جىلدىڭ 29 قىركۇيەك كۇنى ەلباسىنىڭ تۇركىستان وبلىسىنا ءىس-ساپار بارىسىندا تۇركىستان قالاسىن تۇركى الەمىنىڭ مادەني-رۋحاني ورتالىعى رەتىندە دامىتۋ جونىندەگى باس جوسپاردىڭ تۇجىرىمداماسىن ماقۇلداۋ تۋرالى قر پرەزيدەنتىنىڭ جارلىعى جارىق كوردى.

تۇجىرىمداماعا سايكەس، حالىق سانىنىڭ وسۋىنە بايلانىستى مىناداي جوبالىق كەزەڭدەر قابىلداندى: باستاپقى مەرزىم - 2018 جىلى 161 مىڭ ادام; ەسەپتىك مەرزىم- 2035 جىلى 350 مىڭ ادام; بولجامدىق مەرزىم - 2050 جىلى 500 مىڭ ادام قامتىلادى.

قالانىڭ اۋماعىن دامىتۋدىڭ جالپى اۋدان پەرسپەكتيۆاسىندا 500 مىڭ ادامدى قۇرايتىن حالىقتىڭ سانى ءۇشىن 25 000 گەكتار جەر كولەمى قاجەت ەتەدى. قالانىڭ جاڭا قۇرىلىسىنىڭ ساۋلەت ءستيلى جەرگىلىكتى ۇلتتىق سالت-داستۇرگە سۇيەنەتىن بولادى. جوسپارلاۋ قۇرىلىمىنىڭ نەگىزگى قاعيداتى قالانىڭ بارلىق تۇسىنان كورىنۋگە ءتيىس قوجا احمەت ياساۋي كەسەنەسى بولىپ تابىلادى.

تۇركىستان وبلىسىنىڭ الەۋمەتتىك-ەكونوميكالىق دامۋىنىڭ 2024 جىلعا دەيىنگى كەشەندى جوسپارىنا سايكەس، 2018-2022 جىلدارى 170 ينۆەستيتسيالىق جوبالاردىڭ جوبالاۋ-سمەتالىق قۇجاتتامالارى ازىرلەنۋى ءتيىس. ينۆەستيتسيالىق جوبالاردىڭ جسق-ى مەملەكەتتىك بيۋدجەت قاراجاتى ەسەبىنەن، مەملەكەتتىك-جەكەشەلىك ارىپتەستىك تەتىگى جانە جەكە ينۆەستيتسيالار ارقىلى ازىرلەنەتىن بولادى. كەشەندى جوسپاردا، ىسكە اسىرىلاتىن ينۆەستيتسيالىق جوبالاردىڭ جوبالاۋ-سمەتالىق قۇجاتتامالارى دەنساۋلىق ساقتاۋ، الەۋمەتتىك قورعاۋ، ءبىلىم بەرۋ، مادەنيەت، سپورت، تۋريزم، تۇرعىن ءۇي، ينجەنەرلىك-كوممۋنيكاتسيالىق ينفراقۇرىلىم، اكىمشىلىك عيماراتتار، قۇقىق قورعاۋ سالالارىندا ازىرلەنەدى.

سونداي-اق ەلباسىنىڭ جارلىعىنا سايكەس، «تۇركىستان «ارنايى ەكونوميكالىق ايماعى قۇرىلدى. قالانى يندۋستريالدى-يننوۆاتسيالىق باعىتتا دامىتۋدى كوزدەيتىن اۋماقتا جاڭا كاسىپورىندار سالۋ ءىسى جوسپارلانۋدا.

ونىڭ ىشىندە، قر پرەزيدەنتى تۇركىستان وبلىسىنا ءىس-ساپارى بارىسىندا بىرقاتار ۇلتتىق كومپانيالارىنا، بيزنەس وكىلدەرى مەن شەت ەلدەردىڭ ينۆەستورلارىنا 16 نىساندى سالۋ بويىنشا ۇسىنىستار جاسالىندى. سونداي-اق، رەسپۋبليكالىق ماڭىزى بار قالالاردىڭ جانە وبلىس اكىمدىكتەرىمەن 13 قۇرىلىس نىساندارىن سالۋ كوزدەلۋدە.

Abai.kz