بيىل ناۋرىزدا قازاقستان پرەزيدەنتى نۇرسۇلتان نازارباەۆ قازاقستان حالقىنا ۇندەۋ جاساعانى بەلگىلى. «پرەزيدەنتتىڭ بەس الەۋمەتتىك باستاماسى» دەپ اتالاتىن باعدارلامالىق ماقالادا ەلباسى ەلدى-مەكەندەردى گازداندىرۋ جۇمىستارىن  جالعاستىرۋ تۋرالى ناقتى تاپسىرما بەرگەن ەدى.

مىنە، اتالعان تاپسىرما تۇركىستان وبلىسىندا دا جۇيەلى اتقارىلۋدا.

ولاي دەيتىنىمىز، جۋىردا تۇركىستان وبلىسىنا قاراستى جەتىساي اۋدانىندا ءبىر كۇندە بەس اۋىلعا تابيعي گاز بەرىلدى. سالتاناتتى شاراعا تۇركىستان وبلىسىنىڭ اكىمى جانسەيىت تۇيمەباەۆ ارنايى قاتىسىپ، جەرگىلىكتى تۇرعىنداردىڭ قۋانىشىمەن ءبولىستى. بۇل تۋرالى وبلىس اكىمدىگىنىڭ رەسمي سايتى حابارلاپ ايتتى.

اتاپ ايتقاندا، كوگىلدىر وتىنعا قول جەتكىزگەن اۋداننىڭ ش.دىلدابەكوۆ اۋىل وكرۋگىنە قاراستى دوستىق، بايدالا، زەردەلى اۋىلدارى مەن اتامەكەن اۋىلدىق وكرۋگىنە قاراستى تىڭدالا جانە قوعالى ەلدى مەكەندەرى. ايماق باسشىسى دوستىق اۋىلىنداعى گاز تورابىن ىسكە قوسۋ راسىمىنە قاتىسىپ، ەندىگى كەزەكتە 5 مىڭعا جۋىق حالقى بار بەس اۋىل تۇرعىندارىنىڭ كومىر تاسىپ، كۇل شىعارمايتىنىن جەتكىزدى.

«قۇرمەتتى تۇركىستاندىقتار! قادىرمەندى جەتىساي اۋدانىنىڭ تۇرعىندارى! بۇگىن سىزدەر مەن بىزدەر كوپتەن كۇتكەن ۇلكەن قۋانىشتىڭ كۋاسى بولعالى وتىرمىز. ياعني، بۇگىن تۇركىستان  وبلىسىنا قاراستى جەتىساي اۋدانىندا بەس ەلدىمەكەننىڭ تۇرعىندارى تابيعي گازعا قول جەتكىزىپ وتىر. قازىرگى تاڭدا جەتىساي اۋدانىندا 104 ەلدىمەكەننىڭ 46-سى، ياعني 22 096 ابونەنت تابيعي گازبەن قامتىلسا، بۇل اۋدانداعى ەلدى مەكەندەردىڭ جالپى سانىنىڭ 44,2 پايىزىن قۇراپ وتىر. ال ابونەنت سانى بويىنشا 74,4 پايىزعا جەتتى»، - دەدى جانسەيىت قانسەيىتۇلى.

جالپى بيىل جەتىساي اۋدانىنداعى ەلدى مەكەندەردى گازداندىرۋ ماقساتىندا 5 نىساننىڭ قۇرىلىسىنا وبلىستىق بيۋدجەتتەن 615,4  ملن تەڭگە قارالعان بولاتىن. ونىڭ ىشىندە 1 نىساننىڭ قۇرىلىس-مونتاج جۇمىستارى 2018 جىلدىڭ شىلدە ايىندا اياقتالسا، 3 ەلدى مەكەننىڭ قۇرىلىسى جىل سوڭىنا دەيىن ەل يگىلىگىنە تاپسىرىلادى دەپ كۇتىلۋدە.

جەتىساي اۋدانىنىڭ دامۋ كونتسەپتسياسىنا سايكەس 2019-2025 جىلدارى وسى وڭىردەگى 104 ەلدى مەكەننىڭ ءبارى دەرلىك 100 پايىز گازبەن قامتىلادى دەگەن جوسپار بار.

جەتىسايعا جۇمىس ساپارىندا ايماق باسشىسى جاڭااۋىل اۋىلدىق وكرۋگى ىنتىماق ەلدىمەكەنىندەگى تۇرار رىسقۇلوۆ اتىنداعى 600 ورىندىق جاڭا مەكتەپتىڭ اشىلۋ سالتاناتىنا دا قاتىستى. بۇعان دەيىن ءۇش اۋىسىمدا ءبىلىم بەرىپ كەلگەن ورتا مەكتەپ ۇجىمىن بۇگىنگى قۋانىشىمەن قۇتتىقتاعان وبلىس اكىمى جاڭا، زاماناۋي تالاپقا جاۋاپ بەرەتىن ەڭسەلى دە، كەرەمەت مەكتەپتىڭ سىنىپتارىن ارالاپ كوردى. ونداعى شاكىرتتەرمەن تىلدەسىپ، ولاردىڭ ساباقتارىن ۇزدىك وقىپ، ەلىمىزدىڭ ۇلگىلى ازاماتتارى بولۋعا شاقىردى.

ودان سوڭ، اكىم جەتىساي قالاسىنداعى «AIIG Kazakhstan» جشس-ءنىڭ ماقتا زاۋىتىندا بولدى. اتالعان زاۋىتتا 660 ادام جۇمىس ىستەيدى. قۋاتتىلىعى جىلىنا 40 مىڭ توننا. 2013 جىلى قۇرىلعان زاۋىتتا ماقتا تالشىعى، تەحنيكالىق تۇقىم، لينت، ۋليۋك دايىندالادى. جالپى اۋماعى 5,6 گەكتاردى قۇرايدى. مۇندا وندىرىلگەن ونىمدەر نەگىزىنەن ەلىمىزدىڭ بارلىق ايماعىنا تاراتىلادى.

وبلىس اكىمى زاۋىت جۇمىسشىلارىمەن كەزدەسىپ، اۋدانداعى «وزات تەرىمشى، «ەڭ ۇزدىك كومباينشى»، «ەڭ ۇزدىك تەرىمشى»، «ەڭ ۇزدىك ماقتا زاۋىتى» نوميناتسيالارىنىڭ يەگەرلەرىن ماراپاتتاپ، سىي-سياپات تابىستادى.

جالپى جەتىساي اۋدانىندا ماقتا تەرۋ ناۋقانىنىڭ اياقتالۋىنا ساناۋلى كۇندەر قالدى. قازىرگى تاڭدا اۋدان بويىنشا 48226,8 گەكتار ماقتا القابىنان 126 مىڭ 192 توننا ءشيتتى ماقتا جينالدى. اق التىننىڭ تۇسىمدىلىگى ءار گەكتارىنان 26,2 تسەنتنەردى قۇرادى.

Abai.kz