تۇركىستان: ءوڭىر جۇرتىنىڭ 98 پايىزىندا ەلەكتروندى دەنساۋلىق پاسپورتى بار
تۇركىستان وبلىسى بويىنشا 1 791 201 ەلەكتروندى دەنساۋلىق پاسپورتى جاساقتالدى. بۇل ءوڭىر حالقىنىڭ 98 پايىزىن قۇرايدى. بۇل تۋرالى وبلىس اكىمىنىڭ ءباسپاسوز قىزمەتى حابارلادى.
سونداي-اق، وبلىستاعى بارلىق مەديتسينا قىزمەتكەرى اقپاراتتىق جۇيە بويىنشا وقىتىلىپ، 290 668 ازامات موبيلدىك قوسىمشانى پايدالانعان. بۇل تۋرالى تۇركىستان وبلىسىنىڭ وڭىرلىك كوممۋنيكاتسيالار قىزمەتىندە وتكەن بريفينگتە دەنساۋلىق ساقتاۋ باسقارماسىنىڭ باسشىسى مۇقان ەگىزباەۆ مالىمدەدى.
سونىمەن قاتار، ەلەكتروندىق مەديتسينالىق جازۋلار سانى 1 701 891-گە جەتىپ، ەڭبەككە جارامسىزدىق پاراعى ەلەكتروندىق نۇسقادا 52 563 ادامعا بەرىلگەن. اۋداندىق، قالالىق ەمحانالاردا 20 تسيفرلىق كومەك پوستتارى اشىلىپ، وندا 408 201 ادام وقىتىلدى.
باسقارما باسشىسىنىڭ ايتۋىنشا، وبلىستاعى مەديتسينا ۇيىمدارىنىڭ جابدىقتالۋى 65 پايىزدان اسقان.
«اعىمداعى جىلى مەديتسينالىق ۇيىمداردىڭ ماتەريالدىق-تەحنيكالىق جابدىقتالۋىنا 8,1 ملرد. تەڭگە ءبولىنىپ، وتكەن جىلمەن سالىستىرعاندا 1,5 ەسەگە ارتىپ وتىر. ءبىرىنشى كەزەكتە انا مەن بالا، جانساقتاۋ، وتا جاساۋ، جەدەل جاردەم قىزمەتىن كۇشەيتۋگە جانە «تسيفرلىق قازاقستان» باعدارلاماسىن ىسكە اسىرۋعا باسىمدىق بەرىلىپ وتىر. بۇدان وزگە، تۇركىستان قالالىق ەمحانانىڭ جانە تۇركىستان قالاسىنداعى 610 توسەك ورىنعا ارنالعان وبلىستىق كوپسالالى اۋرۋحانانىڭ، سونداي-اق وبلىستىق تۋبەركۋلەزگە قارسى جانە ونكولوگيالىق ورتالىقتاردىڭ قۇرىلىسىن جۇرگىزۋ، تۇركىستان قالاسىندا وبلىستىق جەدەل جاردەم ستانسىسىن جاڭعىرتۋ جانە پايدالانۋ جوبالارى جوسپارلانۋدا»، - دەدى مۇقان كەڭەسبەكۇلى.
ونىڭ مالىمدەۋىنشە، 2018 جىلى وبلىستا 15 اۋىلدىق ەمحانا مەن 5 دارىگەرلىك امبۋلاتوريا 20 باستاپقى مەديتسينالىق-سانيتاريالىق كومەك (بمسك) بولىپ قايتا قۇرىلعان. سونىمەن قاتار، كەنتاۋ، سايرام، سارىاعاش اۋداندارىندا 3 ينسۋلتتىك ورتالىق اشىلىپ، وبلىستىق بيۋدجەت ەسەبىنەن 3 دانا كومپيۋتەرلىك توموگراف ساتىپ الىندى.
Abai.kz
