تۇركىستان قالاسىندا العاش رەت «AGROFEST-2018» اۋىل شارۋاشىلىعى فەستيۆالى ءوتتى. «ەسىمحان» الاڭىندا وتكەن شاراعا اۋىل شارۋاشىلىعى سالاسىنىڭ ارداگەرلەرى، ەڭبەك وزاتتارى، كاسىپكەرلەر، حالىق قالاۋلىلارى مەن سالا ماماندارى قاتىستى.

تۇركىستان وبلىسى اكىمىنىڭ ءباسپاسوز قىزمەتىنىڭ حابارلاۋىنشا، قر پرەزيدەنتى ن.ءا.نازارباەۆتىڭ قازاقستان حالقىنا جولداعان جولداۋىنا ساي حالىقتىڭ ءال-اۋقاتىن ارتتىرۋ ماقساتىندا كوپتەگەن جۇمىس قولعا الىنۋدا. سول ماقساتتا وتكەن مەرەكەلىك جيىندا وبلىس اكىمى جانسەيىت تۇيمەباەۆ سالا ماماندارىن كاسىبي مەركەلەرىمەن قۇتتىقتاپ، ايماقتىڭ جەتىستىكتەرىنە توقتالدى.

«وڭىرىمىزدەگى اۋىل شارۋاشىلىق سالاسىنىڭ جالپى ءونىم كولەمى 475,6 ملرد. تەڭگەگە جەتىپ، رەسپۋبليكادا 2 ورىنعا قول جەتكىزدىك. كوكونىس، باقشا داقىلدارىنان 2,8 ملن. توننامەن رەكوردتىق ءونىم جينادىق. 500 مىڭ تونناعا جۋىق ونىمدەر رەسەي، بەلارۋس، لاتۆيا، گەرمانيا مەملەكەتتەرىنە، 1 ملن. تونناسى ەلىمىزدىڭ سولتۇستىك وڭىرلەرىنە جونەلتىلدى. قارقىندى باۋلاردىڭ كولەمى 2800 گەكتارعا جەتىپ، ەلدەگى جەمىس-جيدەكتىڭ 40 پايىزى، ءجۇزىمنىڭ 73 پايىزى تۇركىستان وبلىسىندا ءوندىرىلدى. رەسپۋبليكاداعى سالىنعان جىلىجايلاردىڭ 77 پايىزى، تامشىلاتىپ سۋعارۋ ءادىسىنىڭ 73 پايىزى دا ءبىزدىڭ وڭىرگە تيەسىلى. وبلىستا العاش رەت 6,2 مىڭ توننا ەت ەكسپورتتالىپ، رەسپۋبليكا ەكسپورتىنىڭ 41 پايىزىن قامتىدى. مۇنىڭ بارلىعى سىزدەردىڭ ەتكەن ەڭبەك، توككەن تەرمەن كەلگەن جەتىستىكتەر دەپ ايتۋعا تولىق نەگىز بار», – دەدى جانسەيىت قانسەيىتۇلى.

فەستيۆال اياسىندا اۋىل شارۋاشىلىعى سالاسىندا بەلسەندىلىك تانىتىپ، ۇزدىك كورسەتكىشكە قول جەتكىزگەن اۋدان، قالالار جانە جەكە شارۋالار قر پرەمەر-ءمينيستردىڭ ورىنباسارى اۋىل شارۋاشىلىعى ءمينيسترى ومىرزاق ەستايۇلىنىڭ جانە وبلىس اكىمىنىڭ مەدالدارى مەن ارنايى سەرتيفيكاتىنا يە بولدى. ءوڭىر شارۋالارى «وزات استىق جيناۋشى»، «وزات مال بورداقىلاۋشى»، «وزات باقشا ءوسىرۋشى» سىندى 21 نوميناتسيا بويىنشا ماراپاتتالدى. ودان بولەك، اۋدان - قالالار اراسىندا 16 باعىت بويىنشا ۇزدىكتەر انىقتالدى.

سونداي-اق، شارا بارىسىندا كورمە ۇيىمداستىرىلىپ، وندا اۋىل شارۋاشىلىعى ونىمدەرى، اسىل تۇقىمدى ءتورت تۇلىك مالدىڭ تۇرلەرى مەن وزىق تەحنيكالار ۇسىنىلدى.

سونىمەن قاتار، اۋىل شارۋاشىلىعى ونىمدەرىنىڭ جارمەڭكەسى ءوتىپ، وندا 182 توننا تابيعي تازا ونىمدەر نارىقتاعى باعادان 15-20 پايىزعا ارزان باعادا ساۋدالاندى. قوناقتار ءۇشىن 1 توننا پالاۋ مەن 1 توننا باۋىرساق دايىندالىپ، كوپشىلىككە تەگىن تاراتىلدى.

الاڭدا ۇلتتىق سپورتتىڭ 12 تۇرىنەن سايىستار وتكىزىلىپ، اۋدانداردان جينالعان بىلەكتىلەر مەن ۇلتتىق سپورتتىڭ شەبەرلەرى ءوزارا مىقتىلاردى انىقتادى. ۇزدىك اتانعان بارلىق قاتىسۋشىلار مەن سپورتشىلارعا باعالى سىيلىقتار تابىس ەتىلدى.