اپتا باسىندا قازاقستان پرەزيدەنتى نۇرسۇلتان نازارباەۆ جانسەيىت تۇيمەباەۆ تىزگىنىن ۇستاعان تۇركىستان وبلىسىن ءھام قالاسىن دامىتۋ جونىندە جيىن وتكىزگەنى ەدى. 

اتالعان جيىنعا قر پرەمەر-ءمينيسترىنىڭ ءبىرىنشى ورىنباسارى اسقار مامين مەن وبلىس جانە قالا باسشىلارى قاتىسقان.

مەملەكەت باسشىسىنىڭ 2018 جىلدىڭ 19-ماۋسىمىنداعى تۇركىستان قالاسىن جاڭادان قۇرىلعان تۇركىستان وبلىسىنىڭ ورتالىعى ەتۋ تۋرالى جارلىعى جاريا بولعانى بەلگىلى. سوعان سايكەس ءوڭىردى دامىتۋدىڭ جوسپارى مەن مۇمكىندىكتەرى جان-جاقتى تالقىلانعان كەڭەستە مەملەكەت باسشىسى بىرقاتار تاپسىرمالار بەردى.

نۇرسۇلتان نازارباەۆ، قر پرەزيدەنتى:

– ەلىمىزدە مەنىڭ جارلىعىم نەگىزىندە ءبىر ءوڭىر – تۇركىستان وبلىسىنىڭ پايدا بولعانى بەلگىلى. ءبىز كوپ ويلانىپ وسىنداي شەشىمگە كەلدىك. ونىڭ اتاۋى بويىنشا دا ءتۇرلى ءسوز جارىستار بولدى. دەگەنمەن دە، تۇركىستان دەپ اتاۋ تۋرالى توقتامعا كەلۋ دۇرىس تاڭداۋ بولدى دەپ سانايمىن. ەندى قازاقستاندا 16 ەمەس، 17 ءوڭىر بولادى. ال وبلىستىڭ ورتالىعىن تۇركىستان قالاسىنا كوشىرىپ جاتىرمىز. بۇل تاريحي جاعىنان دا، مادەني جاعىنان دا وتە كۇردەلى ۇدەرىس دەپ سانايمىز، – دەدى.

سونىمەن قاتار، مەملەكەت باسشىسى نۇرسۇلتان نازارباەۆ تۇركىستاننىڭ  تۇركى دۇنيەسىنىڭ ورتالىعى بولىپ تابىلاتىنىن، ەندى ەلىمىزدىڭ دە ورتالىعى بولاتىنىن، تالاي حاندار مەن باھادۇرلەردىڭ جاتقان كيەلى ورىن – تۇركىستاندى بىرتە-بىرتە دامىتۋعا كىرىسۋ كەرەك ەكەندىگىن قاداپ ايتتى.

ءوز كەزەگىندە قر پرەمەر-ءمينيستردىڭ ءبىرىنشى ورىنباسارى اسقار مامين تۇركىستان قالاسىنىڭ اۋماقتىق دامۋ تۇجىرىمداماسى تۋرالى بايانداما جاسادى.

ال وبلىس باسشىسى جانسەيىت تۇيمەباەۆ اكىمشىلىك-اۋماقتىق باسقارۋ ورگاندارىن جاڭا وبلىس ورتالىعىنا كوشىرۋدىڭ بارىسىن جەتكىزدى.

بۇدان بولەك ول، كيەلى كەنتتە ينفراقۇرىلىمدىق جانە الەۋمەتتىك نىسانداردى سالۋدىڭ جوسپارى، جەرگىلىكتى جەردى ەنەرگيامەن، سۋمەن قامتۋ باعىتىندا ۇسىنىلعان شەشىمدەر تۋرالى حاباردار ەتتى.

جيىن سوڭىندا مەملەكەت باسشىسى نۇرسۇلتان نازارباەۆ ۇكىمەت پەن وبلىس باسشىلىعىنا تۇركىستاندى جان-جاقتى دامىتۋ بويىنشا
بىرقاتار تاپسىرمالار جۇكتەدى.

ەلباسىنىڭ ناقتى مىندەتتەپ بەرگەن تاپسىرماسىنان كەيىن قۇرىلعان وبلىستىڭ ورتالىعى – تۇركىستاندى دامىتۋ بويىنشا مەملەكەت باسشىسىنىڭ زور سەنىمىنە يە بولعان جانسەيىت تۇيمەباەۆتىڭ ەندىگى بەدەلى قالانىڭ باعىندىرعان بەلەستەرىمەن تىعىز بايلانىستا بولاتىنى انىق.

Abai.kz