تۇركىستاندا اقپاراتتىق حاب قۇرىلۋى مۇمكىن
جۋىردا تۇركىستان وبلىسىنىڭ ورتالىعى تۇركىستان قالاسىندا جۋرناليستيكانىڭ مايتالماندارى جيىلىپ سالانىڭ وزەكتى ماسەلەلەرى مەن سالالىق ءبىلىم بەرۋدىڭ جاڭا مودەلدەرى، جاڭا مەديانىڭ شەكسىز مۇمكىندىكتەرى جونىندە تالقى جاسادى. بۇل تۋرالى Abai.kz اقپاراتتىق پورتالى ايقىن گازەتىنە سىلتەمە جاساي وتىرىپ حابارلايدى.
قوجا احمەت ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ بازاسىندا اقپاراتتىق حاب قۇرىلۋى مۇمكىن. بۇل تۋرالى تۇركىستان قالاسىندا وتكەن II حالىقارالىق جۋرناليستيكا فورۋمدا ايتىلدى.
تۇركىستان قالاسىندا ءبىلىم جانە عىلىم مينيسترلىگى مەن قوجا احمەت ياسساۋي اتىنداعى حالىقارالىق قازاق-تۇرىك ۋنيۆەرسيتەتى ۇيىمداستىرۋىمەن II حالىقارالىق جۋرناليستيكا فورۋمى ءوتتى.
«جۋرناليستيكا بويىنشا ءبىلىم بەرۋ باعدارلامالار مودەلدەرى: كاسىبي ستاندارتتار ينتەگراتسياسى» اتتى ءىى حالىقارالىق جۋرناليستيكا فورۋمىن ءبىلىم جانە عىلىم ءمينيسترىنىڭ PR كەڭەسشىسى مايراش تايكەنوۆا اشتى. قوجا احمەت ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ پرەزيدەنتى، پروفەسسور بولاتبەك ءابدىراسىلوۆ پەن ۋنيۆەرسيتەتتىڭ ءبىرىنشى ۆيتسە-پرەزيدەنتى، پروفەسسور جەنگيز تومار فورۋمنىڭ جۇمىسىنا ساتتىلىك تىلەدى.
سونىمەن قاتار جيىنعا بۇدان بولەك دەكاندار، قازاقستان، تۇركيا، وزبەكستان، قىرعىزستان جوو جۋرناليستيكا كافەدراسىنىڭ مەڭگەرۋشىلەرى، باق وكىلدەرى، عالىمدار، ماگيسترانتتار مەن جوو دوكتورلارى قاتىستى. فورۋم قاتىسۋشىلارى جۋرناليست كادرلاردى دايارلاۋ، وتاندىق باق-تى دامىتۋ ماسەلەلەرىن تالقىلادى.
اتاپ ايتقاندا، فورۋمنىڭ نەگىزگى باعىتتارى – جۋرناليستيكا بويىنشا ءبىلىم بەرۋ باعدارلامالارىن دامىتۋ، مەديا نارىققا مامان دايىنداۋدىڭ پراكتيكالىق قۇزىرەتتىلىكتەرى، ستۋدەنتتەردىڭ وي-ءورىسىنىڭ جاڭا تاسىلدەرى، جۋرناليستيكا كافەدراسى وقىتۋشىلارىنىڭ بىلىكتىلىگىن ارتتىرۋ ماسەلەسىن ىنتالاندىرۋ جانە كۇشەيتۋ.
وسىنداي اۋقىمدى دا وزەكتى تاقىرىپتاردى قامتىعان فورۋمنىڭ جالعاسى پلەنارلىق وتىرىسقا ۇلاستى. وندا وزگە ەلدەن كەلگەن باق وكىلدەرىمەن بۇگىنگى كۇننىڭ جۋرناليستيكاسى جايى ءسوز بولدى.
فورۋم الدىمەن «نارىققا باعىتتالعان ءبىلىم بەرۋ باعدارلامالارى: اكادەميالىق ورتاداعى جاڭا تاسىلدەر» تاقىرىبىندا ءباسپاسوز ماسليحاتىمەن باستالدى.
«بۇل وتە ماڭىزدى كەزدەسۋ، وندا ءبىز تمد كەڭىستىگىندە بىردەي جانە ءتان مەديا پروتسەستەردىڭ وزەكتى ماسەلەلەرىن كوتەرىپ، اشىق تالقىلايمىز. بىزگە مەديالىق نارىق كۇتىپ وتىرعان جۋرناليستەردى دايىنداۋ ساپاسى دا ماڭىزدى. ياسساۋي ۋنيۆەرسيتەتىنىڭ بازاسىندا تەحنيكالىق جانە زياتكەرلىك رەسۋرستاردى تارتا وتىرىپ، جابدىقتالعان، زاماناۋي، قۋاتتى اقپاراتتىق حاب قۇرۋ ءمۇمكىن جانە قاجەت دەپ سانايمىن. بۇل باق، جوعارى وقۋ ورىندارى، حالىققا ارنالعان جوعارى ساپالى كونتەنتتى ۇسىناتىن قۋاتتى اقپاراتتىق-تالداۋ ورتالىعى بولار ەدى»، – دەدى مايراش تايكەنوۆا.
Abai.kz
