تۇركىستان وبلىسى تۇلكىباس اۋدانىندا اۋىلشارۋاشىلىق ءونىمىنىڭ كولەمىن ۇلعايتۋ ءۇشىن سۋارمالى جەرلەردىڭ اۋماعى ۇلعايۋدا. وسى ورايدا سۋ رەسۋرستارىن پايدالانۋدى رەتتەۋ جانە قورعاۋ جونىندەگى ارال-سىرداريا باسسەيندىك ينسپەكتسياسى رەسپۋبليكالىق مەملەكەتتىك مەكەمەسىنەن 2018-2023 جىلدار ارالىعىنا (جىلدىق ليميت) 136,7 ملن. م3 اعىن سۋدى پايدالانۋعا رۇقسات الىندى. بۇل تۋرالى تۇركىستان وبلىسىنىڭ وڭىرلىك كوممۋنيكاتسيالار قىزمەتىندە وتكەن بريفينگتە تۇلكىباس اۋدانىنىڭ اكىمى نۇربول تۇراشبەكوۆ  مالىمدەدى.

سونداي-اق، اۋدان باسشىسىنىڭ ايتۋىنشا، اۋىل شارۋاشىلىق سالاسىنىڭ ءونىم كولەمى 2018 جىلدىڭ 10 ايىنىڭ قورىتىندىسىمەن 29 892,2 ملن. تەڭگەنى قۇراعان. بۇل تۋرالى تۇركىستان وبلىسىنىڭ وڭىرلىك كوممۋنيكاتسيالار قىزمەتى مالىمدەدى.

«اۋداندا ەت ءوندىرۋ اعىمداعى جىلدىڭ 10 ايىندا 13 864,7 توننا، ءسۇت - 43 738,3 توننا، جۇمىرتقا - 14,5 ميلليون دانانى قۇرادى. بۇدان وزگە، وسى كەزەڭدە 165 گەكتارعا باۋ ەگۋ جوسپارلانسا، مەجە 156,4 پايىزعا ورىندالىپ 258 گەكتاردى قۇرادى. سونىمەن قاتار، جاڭعاق ەگۋ 250 گەكتارعا جوسپارلانىپ، قازىرگى تاڭعا 257,5 گەكتار، تاڭقۋراي شارۋاشىلىعىنا 75 گەكتارعا جوسپارلانسا، 80,9 گەكتارعا، ءجۇزىم باۋ شارۋاشىلىعىنا 10 گەكتارعا جوسپارلانىپ، جوسپار 100 پايىزعا ورىندالدى»، - دەدى نۇربول ءابدىساتتارۇلى.

تۇلكىباس اۋدانىندا «سىباعا» باعدارلاماسى بويىنشا جوسپاردا 147 باس ساتىپ الىنىپ  جوسپار 196 پايىزعا،  «قۇلان» باعدارلاماسى بويىنشا 164 باس ساتىپ الىنىپ 155 پايىزعا، «التىن اسىق» باعدارلاماسى بويىنشا 450 باس الىنىپ 134,7 پايىزعا وسكەن.

سونىمەن قاتار، اۋداندا بارلىعى 32 كاسىپورىن جۇمىس اتقارۋدا. اعىمداعى جىلدىڭ 10 ايىنىڭ قورىتىندىسى بويىنشا ونەركاسىپ سالاسىندا 18 775,5 ملن. تەڭگەنىڭ ءونىمى ءوندىرىلىپ، ناقتى كولەم يندەكسى 102,8 پايىزعا ارتتى. ال بولشەك ساۋدا تاۋار اينالىمى قورىتىندىسىمەن 5 799 ملن. تەڭگەنى قۇراپ،  وتكەن جىلدىڭ ءتيىستى كەزەڭىمەن سالىستىرعاندا 5,1 پايىزعا ارتقان.

«تۇلكىباس اۋدانىندا اتقارىلعان جۇمىستاردىڭ ناتيجەسىندە 2018 جىلدىڭ 10 ايىنىڭ قورىتىندىسىمەن، جالپى وڭىرلىك ءونىم 60 974,4 ملن. تەڭگەنى قۇراپ، جان باسىنا شاققاندا 550,3 مىڭ تەڭگەگە ءوستى. سونداي-اق، اۋدانعا تارتىلعان ينۆەستيتسيالار كولەمى 8 129,1 ملن. تەڭگەنى قۇرادى. ونىڭ ىشىندە 1 653,5 ملن. تەڭگە -  رەسپۋبليكالىق بيۋدجەت ەسەبىنەن، 2 752,6 ملن. تەڭگە -  جەرگىلىكتى بيۋدجەت ەسەبىنەن، 3 722,7 ملن. تەڭگە - كاسىپورىنداردان جانە حالىقتىڭ ءوز قارجىسى ەسەبىنەن سالىنعان ينۆەستيتسيا. 2018 جىلدىڭ قورىتىندىسىمەن 13 ملرد.تەڭگەگە ينۆەستيتسيا تارتۋ جوسپارلانۋدا»، - دەپ مالىمدەدى نۇربول تۇراشبەكوۆ.

Abai.kz