ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا ەلىمىزدە ءتۇرلى اۋقىمدى ىستەر اتقارىلىپ جاتىر. وسىعان سايكەس، تۇركىستان وبلىسىندا "تاڭبالى تاستار - بابالار ىزىمەن" اتتى ەكسپەديتسيا ۇيىمداستىرىلعان بولاتىن. 

جوبانىڭ ماقساتى – قازاقستاننىڭ كيەلى جەرلەرىنە ەنگەن وڭىردەگى 24 نىساندى تانىستىرۋ ءارى كيەلى ءوڭىردىڭ باي تاريحى مەن تاڭبالى تاستارىن ناسيحاتتاۋ. سونىمەن قاتار، وڭىرگە كەلەتىن قوناقتار ءۇشىن جاڭا تۋريستىك باعىتتاردى قالىپتاستىرۋ.

تۇركىستان وبلىسى ىشكى ساياسات باسقارماسىنىڭ ۇيىتقى بولۋىمەن وتكەن تۋر بايدىبەك، سوزاق اۋداندارى مەن  كەنتاۋ قالاسىن قامتىدى. اتاپ ايتقاندا، ەكى كۇنگە سوزىلعان ەكسپەديتسيا بارىسىندا جوباعا قاتىسۋشىلار بايدىبەك  اۋدانىنداعى بورالداي پەتروگليفتەرى مەن اقمەشىت ۇڭگىرىنە، سوزاق اۋدانىنداعى ىسقاق باب كەسەنەسى مەن ارپاوزەن پەتروگليفتەرىنە، سوزاق كونە قالاسى مەن قارابۋرا كەسەنەسىنە، سونداي-اق كەنتاۋ قالالىق ولكەتانۋ مۋزەيى باعىتتارى بويىنشا تاريحي جەرلەردى ارالادى.

جەرگىلىكتى ولكەتانۋشىلاردىڭ ايتۋىنشا، تۇركىستان وبلىسىندا 3 مىڭنان اسا پەتروگليفتەر بار. باسىم كوپشىلىگى ساق ءداۋىرىنىڭ جادىگەرلەرى. تاستاعى تاڭبالاردا كوبىنە كوشپەلىلەردىڭ تۇرمىس-سالتى بەينەلەنگەن.مۇنداي ەكسپەديتسيالاردىڭ ۇيىمداستىرىلۋى بابالاردان قالعان تاريحي باعا جەتپەس مۇرالاردى كوزدىڭ قاراشىعىنداي ساقتاپ، كەيىنگى ۇرپاققا جەتكىزۋگە زور مۇمكىندىك بەرمەك.

Abai.kz