تۇركىستان وبلىسىندا ەلباسىنىڭ “قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ” اتتى قازاقستان حالقىنا ارناعان جولداۋى اياسىندا جۇمىسپەن قامتۋ باعدارلاماسىمەن تۇراقتى جۇمىسقا تۇرعان ازاماتتاردىڭ سانى ارتىپ كەلەدى.

جاستاردى جۇمىسشى ماماندىعىنا باۋلىعان باعدارلاما. ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى قىسقا ۋاقىتتا قوعامعا قاجەتتى مامانداردى دايارلاۋدا. سايرام اۋدانىنداعى دىنمۇحامەد قوناەۆ اتىنداعى №25 كوللەدجدە وسى باعدارلامامەن 300-جۋىق بالا ءبىلىم الۋدا. اۋداندا اگرارلىق سالا قارقىندى دامىپ جاتقاندىقتان، ورتا بۋىن ماماندارىنا سۇرانىس جوعارى دەيدى وقۋ ورنىنىڭ ۇستازدارى.

سايرام اۋدانى قارابۇلاق اۋىلىنداعى دىنمۇحامەد قوناەۆ اتىنداعى №25 كوللەدجدە قازىر 723 بالا 14 ماماندىق بويىنشا ءبىلىم الۋدا. ونىڭ 300-گە جۋىعى ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاما بويىنشا قابىلدانعان. بۇل باعدارلامانىڭ باستى تالابى قازىر قوعامعا اسا قاجەتتى جۇمىسشى ماماندىقتارىن قىسقا مەرزىمدە دايارلاۋ. سوندىقتان وسىنداعى 44 مۇعالىم مەن 50-گە جۋىق ءوندىرىس شەبەرى قازىر اۋىل شارۋاشىلىعى مەن كولىك جوندەۋ جانە تىگىنشى سىندى ماماندىقتاردىڭ داعدىلارىن وقۋشىلار ساناسىنا سىڭىرۋدە.

ۇعىلجان مىرزاەۆا

كوللەدج ستۋدەنتى

ءبىزدىڭ باقىتىمىزعا وراي پرەزيدەنتىمىزدىڭ تاپسىرماسىمەن جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى بويىنشا وسىنداي توپ اشىلىپ وتىر. ءبىز 11 سىنىپتى ءبىتىرى كەلىپ تىگىن تىگۋدى ۇيرەنىپ جاتىرمىز. قولونەر بۇيىمدارىن جاساۋدى دا مەڭگەرىپ جاتىرمىز. وسىندا ءبىر مەزگىل ىستىق تاماق بەرىلەدى. بۇل بىزگە قولايلى.

سوڭعى كەزدەرى ورتا بۋىن ماماندارىن جوعارى دەڭگەيدە دايارلاۋدا ءدۋالدى وقىتۋ مەن مودۋلدىك ءبىلىم بەرۋ جۇيەلەرى ۇلكەن ءرول اتقارۋدا. بۇرىن تەك وقۋ ورداسى قابىرعاسىندا تەوريالىق ءبىلىم الىپ، وندىرىستە قىسقا ۋاقىت تاجىريبەدەن وتەتىن جاستار ءدۋالدى ءبىلىم بەرۋ ەنگىزىلگەلى تاڭداعان ماماندىقتارىن تەرەڭرەك ۇيرەنۋدە. سەبەبى وقۋشى ەكى اپتا ۇستازداردان ءدارىس وقىسا تاعى ەكى اپتا بويى كاسىپورىندا سول العان ءبىلىمىن دالەلدەمەك. باتىس ەلدەرىنەن كەلگەن ءبىلىم بەرۋ جۇيەسىنىڭ ارتىقشىلىعى دا وسىندا. ال مودۋلدىك وقىتۋدا تالاپكەر ءبىر ماماندىقپەن قوسا سول ماماندىققا قاتىسى بار بىرنەشە بىلىكتىلىكتى قاتار الىپ شىعادى. ماسەلەن كوللەدجگە جۇرگىزۋشىلىكتى مەڭگەرۋگە كەلگەن جاس سول تەمىر تۇلپارعا تەحنيكالىق قىزمەت كورسەتۋ جانە تاعى باسقا دا قىزمەتتەردى بىردەي ۇيرەنبەك.

№25 كوللەدجدە استىق وراتىن كومبايىننان باستاپ جەر جىرتاتىن شىنجىر تاباندى جانە اۋىل شارۋاشىلىعىنا قىزمەت كورسەتەتىن 15-كە جۋىق تەحنيكا بار. وقۋ ورداسىنىڭ تاربيەلەنۋشىلەرى وسى تەحنيكالاردى وزدەرى كۇتىپ، جەر جىرتىپ استىق ەگىپ، ەگىندى جينايدى. وسىلايشا العان ءبىلىمدى تاجىريبەمەن ۇشتاستىرادى. قازىر تەحنيكا مەن تەحنولوگيا ۋاقىت وتكەن سايىن دامىپ، ءبىر ورىندا تۇرمايتىنىن ەسكەرسەك، كوللەدج ۇجىمى ستۋدەنتتەر قازىرگى جاڭاشىلدىقتاردان قول ءۇزىپ قالماسىن دەپ سۋ جاڭا وقۋ-تاجىريبەلىك كەشەندى پايدالانۋعا بەرمەكشى. 2,5 گەكتار اۋماقتى الىپ جاتقان جاڭا نىساننىڭ قۇرىلىسى 2017 جىلى باستالىپ، تاياۋ كۇندەرى سالتاناتتى تۇردە اشىلماق.

يريسماد يسمايلوۆ

د. قوناەۆ اتىنداعى №25 كوللەدجدىڭ ديرەكتورى

2011 جىلى اۋىل ادامدارىنىڭ اتىنان وبلىس باسشىلارىنا حات جازىپ، ءبىزدىڭ اۋىلدا زاۋىت پەن فابريكالار جو، حالىق جۇمىسسىز قالىپ بارا جاتىر، ازاماتتاردىڭ كۇنكورىسى تومەندەپ كەتۋى مۇمكىن دەگەن ءۋاج ايتتىق. ياعني اۋىلدا تۇرعىنداردىڭ ءبارىنىڭ وزىنە تيەسىلى ەگىستىك جەرلەرى بار سولارعا مەحانيزاتور جانە وزگە دە ماماندار كەرەك دەپ ايتتىق. وبلىس اكىمدىگى قولداپ 2011 جىلى قوناەۆ اتىنداعى №25 كوللەدج اشىلعان.

جارتى ميللياردقا جۋىق قارجى جۇمسالعان نىسانننىڭ ىشىندە 8 ماماندىقتىڭ نەگىزگى داعدىلارىن ۇيرەنەتىن تاجىريبە الاڭدارى بار. مۇندا ورناتىلعان قوندىرعىلار مەن قۇرال جابدىقتار قازىرگى ۋاقىتتا وندىرىستە قەڭ قولدانىلادى. سوندىقتان وسى ارادان شىڭدالىپ، جۇمىسشى ماماندىعىن الىپ شىققان جاس كەز-كەلگەن جۇمىس بەرۋشىنىڭ تالابىنان شىعادى دەيدى وسىنداعى ءوندىرىس شەبەرلەرى.