بىلتىر قابىلدانعان "بايلانىس جونىندەگى" جاڭا زاڭعا سايكەس، 2019 جىلدان باستاپ گادجەتتەرى تىركەلمەگەن ابونەنتكە قىزمەت كورسەتە المايدى. ياعني ءموبيلدى تەلەفون ادامنىڭ جەكە مالىمەتتەرىنە ەنگىزىلەدى.

"قازىرگى مالىمەت بويىنشا، 26 ملن تۇتىنۋشىنىڭ 14 ملن-ى عانا تىركەۋدەن وتكەن. بۇل جەلتوقسان ايىنداعى مالىمەت. بىرنەشە ملن قازاقستاندىق جاڭا جىل تۇنىندە جاقىندارىن قۇتتىقتاي المايدى دەگەن ءسوز", – دەيدى قازاقستان پارلامەنتى دەپۋتاتى ميحايل چيركوۆ.

جىل باسىندا شەنەۋنىكتەر IMEI-كودتى تىركەۋ ۇيالى تەلەفونداردى زاڭسىز ساتۋمەن كۇرەستىڭ بىردەن-ءبىر جولى دەپ تۇسىندىرگەن. بيىلدىڭ وزىندە 40 مىڭ تەلەفون ۇرلانعان ەكەن. مۇنداي قىلمىستىڭ اشىلۋى 5 پايىز عانا.

پوليتسيا بولجامى بويىنشا، IMEI-كود تىركەلگەن جاعدايدا، ەگەر SIM-كارتا اۋىستىرىلاتىن بولسا، تەلەفون جۇمىس ىستەمەيدى، مۇنداي كەزدە ۇرلانعان تەلەفوندى تابۋ وڭاي.

ال اقپارات جانە كوممۋنيكاتسيا ءمينيسترى داۋرەن اباەۆ تەلەفون تىركەلسە تالايدان بەرى قولدانىلماعان تەلەفون نومىرلەرى جويىلاتىنىن ايتادى.

"بىزدە ۇيالى بايلانىس ابونەنتتەرىنىڭ سانى حالىق سانىنان 10 ميلليونعا اسىپ كەتەدى - 26 ميلليون ابونەنت، ال حالىق سانى - 18 ميلليون ادام. ياعني، بىرنەشە تەلەفون مەن SIM-كارتا ۇستاپ جۇرگەن ادامدار بار. قازىر تۇرعىندارعا ءتۇسىندىرىپ جاتىرمىز، بارلىق بايلانىس وپەراتورلارى بويىنشا مالىمەتتەر بار",- دەدى اباەۆ.

Abai.kz