وسى اپتادا ۋكراينانىڭ تاعى ءبىر ايماعى ورىس تىلىنە شەكتەۋ قويدى. ناقتىراق ايتساق، يۆانو-فرانكوۆسك وبلىسىنىڭ دەپۋتاتتارى رەسەيدىڭ ەگەمەندى ۋكرايناعا قارسى اگرەسسياسى تولىق باسىلعانشا ورىستىڭ مادەني ونىمدەرىن قولدانۋعا تيىم سالدى.

جوبا اۆتورلارىنىڭ سوزىنشە، اگرەسسورلاردىڭ ونىمىنە – رەسەيلىك ازاماتتار مەن كومپانيالار شىعارعان اندەر، اۋەندەر مەن فيلمدەر جاتادى.

وبلىستىق كەڭەستىڭ تاعى ءبىر دەپۋتاتى، “سۆوبودا” ۇلتتىق پارتياسىنىڭ وكىلى  ۆاسيلي پوپوۆيچ بۇل ۇسىنىستى قولداۋ ءۇشىن “ماسكەۋدى ءولتىر” فلەشموبىن دا ۇسىنعان.

بۇعان دەيىن مۇنداي شەشىمدەر ەكى ايماقتىق كەڭەستە: لۆوۆتە (18 قىركۇيەك) جانە جيتوميردە (25 قازان) جاسالعان. ال ورىس تىلىنە بارلىق موراتوري پرەزيدەنتتىك اكىمشىلىكتىڭ باستاماسى بويىنشا ەنگىزىلەدى. جانە ول پ.پوروشەنكونىڭ «ءبىر ءتىل» سايلاۋ ۇرانىن ىسكە اسىرۋعا باعىتتالعان.

ءبىزدىڭ دەپۋتاتتار ورىس تىلىنە شەكتەۋ قوياتىنداي باتىلدىققا بارا الماس، بىراق، قوعامنىڭ قازاق تىلىنە دەگەن سۇرانىسى ارتىپ كەلە جاتقانى راس. ناتيجەسىندە، ورىس ءتىلىنىڭ ىقپالى تومەندەگەنى بايقالادى.

ماسەلەن، جۋىردا الماتى قالالىق ءماسليحاتى قالاداعى بىرقاتار شاعىن اۋدانداردىڭ اتاۋىن قازاقشالاۋ تۋرالى باستاما كوتەردى. ءسويتىپ، جەرگىلىكتى ءوزىن-ءوزى باسقارۋ جانە تۇرعىن ءۇي كوميسسياسى وتىرىسىنىڭ حاتتاماسىنا سايكەس، الماتىداعى  رەميزوۆكا - اسقارتاۋ، دۋبوك ش/ا - شابىت، بۋتاكوۆكا – مۇزتاۋ، دوروجنيك ش/ا - كوكمايسا، ترۋدوۆيك - توميريس، پەرۆومايسكي - كەمەل، زاريا ۆوستوكا – شاپاعات بولىپ وزگەرمەك.

سونداي-اق، الەۋمەتتىك جەلىدە دە “كينونى قازاقشا كورگىم كەلەدى” دەپ اتالاتىن پيكەت جاريالاندى. كينو مەن ءمۋلتفيلمدى قازاق تىلىندە، ىڭعايلى ۋاقىتقا قويۋدى تالاپ ەتكەن بۇل ۇندەۋگە از ۋاقىتتىڭ ىشىندە 30 مىڭنان اسا قول جينالىپتى. ناتيجەسىندە، استاناداعى جانە الماتىداعى كەيبىر كينوتەاترلار قازاق تىلىندەگى مۋلتفيلمدەردى ىڭعايلى ۋاقىتقا قويا باستاعان.

دەمەك، قوعامدا قازاق تىلىنە دەگەن سۇرانىس كۇن سايىن ارتىپ كەلەدى. ەندى وسىنى بيلىك وكىلدەرى تۇسىنسە دەيمىز.

بىراق، انا تىلىندە ەكى اۋىز ءسوزدىڭ باسىن قۇراي المايتىن ءبىزدىڭ دەپۋتاتتاردىڭ  “ورىس ءتىلىن شەكتەۋ تۋرالى” باستاما كوتەرۋگە باتىلى جەتپەيتىنى تۇسىنىكتى. الايدا، سول شەندىلەر ۋكرايندىق ارىپتەستەرىنىڭ ەرلىگىنەن ۇلگى الۋعا بولاتىنداي...

ايتپاقشى، سول ۋكراين پرەزيدەنتى پ.پوروشەنكو 11-جەلتوقسان كۇنى رەسەيمەن اراداعى دوستىق كەلىسىمنەن شىعۋ تۋرالى زاڭعا قول قويدى. “رەسەيمەن كەلىسىمنەن شىعۋ – وتارلىقتان قۇتىلىپ، ەۋروپاعا بەت الۋ ستراتەگيامىزدىڭ ءبىر بولىگى” دەگەن پوروشەنكو مىرزا، رەسەيدىڭ ىقپالىنان شىعا الماي وتىرعان وزگە دە پوستسوۆەتتىك ەلدەرگە ۇلگى كورسەتىپ كەتكەنى راس.

نۇربيكە بەكسۇلتانقىزى

Abai.kz