ءبىلىمدى جاستاردى جەمقورلىقتان قۇتقارىپ قالۋدىڭ قانداي جولى بار؟
ءبىر بەلگىلى وقۋ ورنىن ۇزدىك ءبىتىرىپ جاتقان ستۋدەنت قىزدىڭ اڭگىمەسى ەكى كۇننەن بەرى مازامدى قاشىردى.
ايتۋىنشا، ديپلوم جۇمىسىن جازاتىن كەزى كەلىپتى. جەتەكشىسى - كافەدرا مەڭگەرۋشىسى. بىراق "ديپلوم جۇمىسىن جازىپ اۋرە بولما. 170 مىڭعا دايىن جۇمىستى الاسىڭ" دەپتى. ستۋدەنت قىز ءوزى جازعىسى كەلەدى. ال جەتەكشىسى جازعان كۇندە دە باعىت بەرىپ كومەكتەسپەيتىنىن، ونى ەرتەڭ كوميسسيا قابىلداماۋى مۇمكىن ەكەنىن، ءبارى ويداعىداي بولسا دا ۋنيۆەرسيتەتتىڭ انتيپلاگيات تۋرالى باعدارلاماسىنان وتكىزبەيتىنىن ايتىپ قورقىتىپتى. ستۋدەنت قىز ويلانايىن دەپ كەتىپ، گرۋپپالاستارىنان سۇراسا، بارىنە وسى تالاپ قويىلعان ەكەن. ەندى ءبىر گرۋپپا تەگىس 170 مىڭنان جيناپ بەرىپ، ۋنيۆەرسيتەتتىڭ دايىن ديپلوم جۇمىسىن ساتىپ الماقشى...
ءبىز ونسىز دا بىلعانعان، جەمقورلىق جايلاعان ەلدە ءومىر ءسۇرىپ وتىرمىز. ەندى وسى بىلعانىشتى جاستارعا جۇقتىرىپ جاتىرمىز. ولار دا بۇنى قالىپتى، ءتىپتى قاجەت نارسە دەپ قابىلداي باستايدى...
وكىنىشتى ەمەس پە؟
ءوز باسىم اتىن اتاپ تۇرىپ جازايىن دەسەم، انا قىزعا زيانىم تيە مە دەپ قورقىپ وتىرمىن.
ول قىز اقىلسىز دا ەمەس. "انتيپلاگياتتى ءار ۋنيۆەرسيتەتكە بەرىپ قويماي، بۇكىل رەسپۋبليكالىق ورتاق باعدارلامامەن قاراسا عوي. ايتپەسە، قازىر مەنىڭ ىزدەنىپ جازعان جۇمىسىمدى ۋنيۆەرسيتەت ءوز باعدارلاماسىمەن قارايدى. ولار قولدان كەدەرگى جاساپ وتكىزبەي تاستاۋى مۇمكىن" دەيدى... ديپلوم جەتەكشىسى وسىلاي قورقىتىپ، بەتىن قايتارىپ تاستاعان عوي.
ءوز قولىن بىلعاعىسى كەلمەي، شىرىلداپ وتىرعان ستۋدەنت قىزدى اياپ كەتتىم.
جەمقورلىقتان وسىنداي جاستاردى قۇتقارىپ قالۋدىڭ قانداي جولى بار؟
الدە ارقايسىمىز "وزىمە زيانى ءتيىپ كەتەدى" دەپ، جەمقور قوعامنىڭ اعىسىمەن كەتە بەرەمىز بە؟
ءنازيرا بايىربەكتىڭ facebook پاراقشاسىنان
Abai.kz
