VI سايلانعان الماتى قالاسى ءماسليحاتىنىڭ جەرگiلiكتi مەملەكەتتiك باسقارۋ جانە تۇرعىن ءۇي ماسەلەلەرi بويىنشا تۇراقتى كوميسسياسىنىڭ وتىرىسىندا الماتى قالاسى تىلدەردى دامىتۋ باسقارماسىنىڭ ونوماستيكا ءبولىمى الماتىداعى شاعىن اۋداندار مەن كوشەلەردىڭ اتاۋىن اۋىستىرۋ تۋرالى ۇسىنىس ەنگىزگەن ەدى. تاۋەلسىزدىك العانىمىزعا 27 بولعان تۇستا قازاق جەرىنىڭ قازاقشا اتالۋىنا قارسى توپ كەشەلى بەرى الەۋمەتتىك جەلىلەر ارقىلى قارسىلىق ءبىلدىرىپ، ەلباسىنىڭ "رۋحاني جاڭعىرۋ" يدەياسىن قولدامايتىنىن اڭعارتۋدا. 

ەلباسىنىڭ "رۋحاني جاڭعىرۋ" يدەياسىنىڭ تۇپكى ءمانى - ۇلتتىڭ رۋحاني تۇلەۋى. ۇلت رۋحاني تۇرعىدا جاڭارۋ ءۇشىن ءبىز قازاق تاريحىنا قىزىل قانمەن جازىلعان كەڭەستىك ءھام پاتشالىق رەسەي تۇسىنداعى قاڭسىق اتاۋلاردان ارىلۋىمىز كەرەك. تاۋەلسىز ەلدىڭ ۇستانىمىنا سايكەس جەر-سۋ اتتارىن قويۋعا ءتيىسپىز.

ماسەلەن، ءبىر عانا مىسال كەلتىرسەك. الماتى اكىمدىگى نيكولاي بۋتاكوۆتىڭ اتىنداعى شاتقالدى "مۇزتاۋ" دەپ اۋىستىرعالى جاتىر. بۇل باستامانى ءيسى قازاق قولدايدى. سەبەبى، نيكولاي  1860 جىلدارى قىلىش ۇستاپ قازاققا قارسى شاپقان، كەنە حاننىڭ ۇرپاقتارىنا وق اتقان كازاك جۇزدىگىنىڭ ساردارى.

وعان دالەل رەتىندە جۋرناليست سەرىك ابىكەنۇلىنىڭ مىنا دەرەگىن نازارلارىڭىزعا ۇسىنامىز.

ۇلتىمىزدى قىرعىنعا ۇشىراتقان وسىنداي قاراقشىنىڭ اتىن ءتۇرلى سىلتاۋلارمەن ساقتاپ قالعىسى كەلەتىن توپتىڭ كوزدەگەنى نە؟ ولار وسى بۋتاكوۆ، كولپاكوۆسكيلەردىڭ جوقشىلارى ما؟

ولار قارجىنى ءھام باسقا جايلاردى سىلتاۋراتىپ، ەلباسىنىڭ ساياساتىنا قارسى كەلىپ وتىرعان جوق پا؟

ءبىزدىڭ ويىمىزشا، تاۋەلسىز قازاق ەلىندە تۇرىپ،  "رەميزوۆكا", "دوروجنيك", "پەرۆومايسكي", "تەپليچنىي", ت.ب سەكىلدى نە ءمانى، نە ماعىناسى جوق اتاۋلاردى قولداۋشىلاردان ىعىپ، يگى باستامادان باس تارتۋعا بولمايدى.

الماتى قالاسىنا باۋىرجان بايبەك اكىم بولىپ كەلگەلى تالاي يگىلىكتى ىستەرتەر جۇزەگە استى. الماتى قالاسى تىلدەردى دامىتۋ باسقارماسىنىڭ ونوماستيكا ءبولىمى ۇسىنعان وسى ءبىر ەكى جۇزدەي اتاۋ وزگەرسە، تاعى دا جاس اكىمنىڭ ىسكەرلىگى سوقىرعا تاياق ۇستاتقانداي ايشىقتالار ەدى دەپ ويلايمىز. سوندىقتان دا، بار قازاقتى الماتىداعى جەر-سۋ، كوشە اتتارىن قازاقىلاندىرۋ باستاماسىن قولداۋعا شاقىرامىز!

ەلەۋ قالابايۇلى

Abai.kz