بقو وبلىسىنىڭ اكىم

ا.كولگىنوۆ نازارىنا!

اقىن الماس احمەتبەكۇلى:

"كوكتۋدىڭ جەلبىرەگەنى -

جانىما قۋات بەرەدى.

تالاسقا تۇسسە جان مەن تۋ جان ەمەس، ماعان كەرەگى-

كوكتۋدىڭ جەلبىرەگەنى" دەپ جىرلاعانداي،  ەلىمىزدىڭ  قاي  ءوڭىرى مەن قالاسىندا بولماسىن كوك بايراعىمىزدىڭ  وزگە ساياسي ۇيىمدار مەن قوعامدىق بىرلەستىكتەردىڭ جانە زاڭدى تۇلعالاردىڭ تۋلارىنان  بيىك جەلبىرەپ تۇرعانى قاجەت.

«قر مەملەكەتتى رامىزدەرى» تۋرالى 2007 جىلعى 4 ماۋسىمداعى  زاڭىنىڭ   5-بابىنىڭ  2-تارماعىندا: «قوعامدىق بىرلەستىكتەردىڭ جانە باسقا دا ۇيىمداردىڭ تۋلارى قازاقستان رەسپۋبليكاسىنىڭ مەملەكەتتiك تۋىمەن بىردەي بولماۋعا ءتيىس» دەپ انىق جازىلعان. دەسەك تە، باتىس قازاقستان وبلىسى اۋماعىنداعى جانە ورال قالاسىنداعى  «نەفتەك» جشس-ءنىڭ  جانار-جاعارماي بەكەتتەرىندە  زاڭدى تۇلعانىڭ ايرىقشا بەلگىسىن بىلدىرەتىن تۋلارى (اشىلعالى بەس جىل بويى) قازاقستان رەسپۋبليكاسىنىڭ  مەملەكەتتىك تۋىمەن  جارىسا  تالاسىپ، ءبىر دەڭگەيدە جەلبىرەپ تۇر. ال وسى زاڭنىڭ ورىندالۋىن قاداعالاۋ ءتول مىندەتى بولىپ سانالاتىن بقو  ىشكى ساياسات باسقارماسى 5 جىل بويى مۇنى كورمەي، كورسە دە ۇندەمەي نەمەسە ءسوزى وتپەي وتىر.

Əنشەيىندە «جاسۇرپاققا پاتريوتتىق تاربيە بەرۋ كەرەك» دەپ داڭعازا ۇران سالىپ،  جاستارمەن داقپىرت  «شوۋلار» وتكىزەتىن  ىشكى ساياسات باسقارماسى (باسشىسى ن.داۋموۆ)  زاڭعا باعىنباي وتىرعان «نەفتەك» جشس باسشىلارىنا مەملەكەتتىك رامىزدەردى قۇرمەتتەۋ تۋرالى  تۇسىنىك جۇمىستارىن نە سەبەپتى  جۇرگىزبەۋدە نەمەسە وعان كونبەسە  زاڭعا سايكەس جاۋاپكەرشىلىككە تارتۋدى نەگە ۇسىنباي وتىرعانى ءتىپتى تۇسىنىكسىز جاعداي؟!  الدە جانار-جاعارمايمەن ابدەن بايىعان «نەفتەككە» سوزدەرى  وتپەي مە، قۇزىرەتتەرى نەمەسە رۋحتارى جەتپەي مە؟! وسى ماسەلە تۋرالى بىرنەشە رەت باسقارما باسشىلىعىن اۋىزشا ەسكەرتىم، الايدا ەش ناتيجە بولمادى.

مەملەكەتتىك تۋ – بۇل  مەملەكەتتىمىزدىڭ  ەگەمەندىگى مەن بىرتۇتاستىعىن بەينەلەيتىن، ونىڭ اجىراعىسىز اتريبۋتتارىنىڭ ءبىرى.  وبلىسىمىزدا تىركەلگەن  بارلىق قوعامدىق  ۇيىمداردى  (سانى شامامەن  700 دەي)  جانە زاڭدى تۇلعالاردىڭ تۋلارىن قازاق ەلىنىڭ كوك بايراعىمەن بىردەي ەتىپ ىلە بەرسەك، وندا مەملەكەتتىك تۋىمىزدىڭ، قازاقستان تاۋەلسىزدىگىنىڭ  ەشقانداي ءمانى بولماس، ودان كەيىن جاستارعا وتانسۇيگىشتىك تاربيە قالاي بەرەمىز؟ اتالمىش زاڭنىڭ 13 بابىنا ساي، قازاقستان رەسپۋبليكاسىنىڭ ازاماتتارى، سونداي-اق رەسپۋبليكا اۋماعىندا جۇرگەن ادامدار قازاقستان رەسپۋبليكاسىنىڭ مەملەكەتتىك رامىزدەرىن قۇرمەتتەۋگە مىندەتتى.  ەندەشە، كىم بولسا دا، مەيلى ول اقشالى، مەيلى ول لاۋازىمدى، مەيلى ول ارباكەش، ەلدەگى جۇرگەن شەتەلدىكتەر  بولسىن رامىزدەرىمىزدى قۇرمەتتەۋلەرى ءتيىس!

2016 جىلى «رامىزدەرگى قۇرمەتتى وزىمىزدەن باستايىق!» اتتى سىن ماقالامنان كەيىن،  مەملەكەتتىك تۋمەن 20 جىل بويى ءبىر دەڭگەيدى جەلبىرەپ تۇرعان  ورال قالاسىنداعى قازاقستان حالقى اسسامبلەياسىنىڭ  تۋى تومەن ءتۇسىرىلىپ، قازاقستان تۋى بيىك، جوعارى جەلبىرەگەن ەدى.

بىزگە ەرتەڭگى بولاشاعى بۇلىڭعىر  قوعامدىق ۇيىمدار مەن  بىرلەستىكتەردىڭ جانە زاڭدى تۇلعالاردىڭ  تۋلارى ەمەس، بولاشاعى جارقىن ماڭگى قازاق ەلىنىڭ كوك بايراعى وزگەلەردەن اسقاق جەلبىرەپ تۇرعانى قاجەت.

تالعات قاتاۋوۆ، قوعام بەلسەندىسى

Abai.kz