مەملەكەت باسشىسى ن.نازارباەۆ «ەلىمىزدىڭ ەرتەڭى بۇگىنگى جاس ۇرپاقتىڭ قولىندا، ال جاس ۇرپاقتىڭ تاعدىرى ۇستازداردىڭ قولىندا» – دەگەن ەدى. وسىعان وراي ەلىمىزدە ءار سالادا ءبىلىم الىپ جۇرگەن جاستارعا جان-جاقتى مۇمكىندىكتەر قاراستىرىلعان. ونىڭ ىشىندە اسا جاۋاپتى ماماندىق سانالاتىن بولاشاق دارىگەرلەر دە بار. سولاردىڭ ءبىرى سەمەي مەملەكەتتىك مەديتسينا ۋنيۆەرسيتەتىنىڭ ستۋدەنتتەرى.  

بۇگىن وسى ۋنيۆەرسيتەتتە «مەديتسينالىق ءبىلىمدى، عىلىمدى جانە پراكتيكانى مودەرنيزاتسيالاۋداعى زاماناۋي يننوۆاتسيالىق ادىستەر» اتتى حالىقارالىق عىلىمي-پراكتيكالىق كونفەرەنتسيا ءوتتى. حالىقارالىق عىلىمي-پراكتيكالىق كونفەرەنتسيا، سەمەي قالاسىنىڭ مەملەكەتتىك مەديتسينا ۋنيۆەرسيتەتىنىڭ 65 جىلدىعى اياسىندا ۇيىمداستىرىلعان. ونىڭ اشىلۋ سالتاناتىنا قر دەنساۋلىق ساقتاۋ مينيسترلىگىنىڭ جاۋاپتى حاتشىسى بولات توكەجانوۆ جانە شقو اكىمىنىڭ ورىنباسارى اسەم ءنۇسىپوۆا قاتىستى. ال عۇلامالار جيىنىنىڭ جۇمىسىنا اقش-عى جەتەكشى حيرۋرگتاردىڭ ءبىرى، تراۆماتولوگ-ورتوپەد جولداس قۇلجانوۆ، ايگىلى يتالياندىق پروفەسسور لۋكا برۋزاتي، جاپونياداعى كوچي ۋنيۆەرسيتەتىنىڭ پروفەسسورى كەن ينوە، قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ ديرەكتورى ديليارا قايداروۆا، نازارباەۆ ۋنيۆەرسيتەتى، مەديتسينا كافەدراسىنىڭ پروفەسسورى ساندرو ۆەنتو، سونداي-اق تسيۋريح قالاسىنداعى ۋنيۆەرسيتەت اۋرۋحاناسىنىڭ پروفەسسورى فيليپ گەرچ اتسالىسپاق.

-65 جىلدىڭ ىشىندە سەمەي مەملەكەتتىك مەديتسينا ۋنيۆەرسيتەتى، 26 مىڭنان استام مامانداردى دايارلاپ شىعاردى. باسىم بولىگى قازاقستان مەن الىس-جاقىن شەت مەملەكەتتەردە ابىرويلى قىزمەت ەتىپ كەلەدى. ولاردىڭ اراسىندا 7 جوعارعى وقۋ ورنىنىڭ  رەكتورى، 26 دەنساۋلىق ساقتاۋ سالاسىنىڭ جەتەكشىلەرى، 85 دەنساۋلىق ساقتاۋ مينيسترلىگىنىڭ قىزمەتكەرلەرى، 284 باس دارىگەر جانە 383 دوتسەنتتەر مەن پروفەسسورلار بار. ۋنيۆەرسيتەت تۇلەكتەرىنە سۇرانىس جوعارى. بۇگىندە ولار جاپونيا، يزرايل، اقش، پاكىستان، ءۇندىستان، پالەستينا، سيريا جانە تاعى دا بىرقاتار ەلدەردە تابىستى ەڭبەك ەتۋدە. وسى ارالىقتا 249 عىلىم كانديداتتارى، 65 عىلىم دوكتورلارى، 69 PhD دوكتورلارى ءارى 213 ماگيسترلار دايىندالدى، – دەگەن قر دەنساۋلىق ساقتاۋ مينيسترلىگىنىڭ جاۋاپتى حاتشىسى بولات توكەجانوۆ، بىلىكتى كادرلاردى دايىنداۋدا ۋنيۆەرسيتەتتىڭ قاۋقارى جوعارى ەكەنىن تىلگە تيەك ەتىپ، سالا ءمينيسترىنىڭ قۇتتىقتاۋ حاتىن جولدادى.

القالى باسقوسۋدا ءار الۋان سۇراقتار قاۋزالانۋدا. ماسەلەن، شۇعىل مەديتسينا دامۋىنىڭ زامانۋي باعىتتارى، كلينيكالىق مەديتسينانىڭ وزەكتى سۇراقتارى، يادرولىق مەديتسينا جانە ونكولوگيا، حيرۋرگيانىڭ، تراۆماتولوگيانىڭ جانە قازاقستانداعى كارديوحيرۋرگيانىڭ وزەكتى سۇراقتارى، سول سەكىلدى مەديتسينالىق ءبىلىم بەرۋدەگى يننوۆاتسيالىق تەحنولوگيالار سىندى بىرنەشە سەكتسيا بويىنشا عالىمدار ويلارىن ورتاعا سالىپ جاتىر. بۇدان باسقا، دۇنيە ءجۇزىنىڭ ءتىس قاققان مايتالماندارى شەبەرلىك ساعاتتارىن وتكىزىپ، ءتان ساۋلىعىن ەمدەۋدەگى وزىق ادىستەرىمەن بولىسەتىن بولادى.

Abai.kz