كونسۋلدىق قىزمەتكەرلەرى ارىز يەلەرى قازاقستان ازاماتتارى ەكەنىن ايتىپ، حاتتى قابىلداۋدان باس تارتتى. ولار ارىز قازاقستان سىرتقى ىستەر مينيسترلىگىنە تاپسىرىلۋى ءتيىس دەيدى.

ۇيىم جەتەكشىسى رىسبەك توقتاسىن حاتتى بۇعان دەيىن سىرتقى ىستەر مينيسترلىگىنە تاپسىرعانىن ايتىپ، ەندى كونسۋلدىق ارىزدارىن قابىلدامايىنشا كەلە بەرەتىندەرىن جەتكىزدى.

قىتايداعى ەتنيكالىق قازاقتاردىڭ جاپپاي قىسىم كورىپ جاتقانى تۋرالى مالىمەت قازاقستاندىق اقپارات قۇرالدارىندا 2017 جىلدىڭ ءساۋىر ايىنان جاريالانا باستادى. كەيىن قىتايداعى از ۇلتتاردىڭ قىسىمعا ۇشىراعانى تۋرالى حالىقارالىق ۇيىمدار ءجيى-ءجيى مالىمدەمە جاسادى. ال قىتاي ۇكىمەتى قىسىمدى "ەكسترەميزمگە قارسى شارا" دەپ مالىمدەگەن جانە "قامالعاندار ءتىل ۇيرەنىپ، كاسىپ مەڭگەرىپ شىعاتىنىن" ايتقان.

26 قاراشا كۇنى قازاقستان سىرتقى ىستەر مينيسترلىگىنىڭ ءباسپاسوز حاتشىسى ايبەك سمادياروۆ "قوس ازاماتتىعى بار" دەگەن كۇدىكتى 14 ادام قىتايدان قايتا الماي وتىرعانىن ايتقان. ول جىل باسىنان بەرى قىتايداعى قىسىمعا قاتىستى 915 ادام شاعىمدانعانىن، 29 قازاقستاندىقتىڭ قىتاي بيلىگى تاراپىنان قوس ازاماتتىقتى پايدالاندى دەگەن كۇدىككە ءىلىنىپ، قاماۋعا تۇسكەنىن، ونىڭ 15-ءى قازاقستان بيلىگى اراشا تۇسكەن سوڭ بوساپ شىققانىن حابارلاعان.

Abai.kz