قازاقستان پرەزيدەنتى نۇرسۇلتان نازارباەۆ ەلىمىزدەگى جاستاردىڭ ماسەلەسىن شەشۋ ءۇشىن قاراپايىم جانە ايقىن قۇرالدارعا سۇيەنۋدى ۇسىنىپ وتىر. قر پرەزيدەنتى جانىنداعى قسزي ديرەكتورىنىڭ ورىنباسارى Cانات كوشكىمباەۆ جاستار جىلىنا باستالۋىنا قاتىستى وسىنداي پىكىر ءبىلدىردى

«ەلباسىنىڭ جاستار جىلىنىڭ اشىلۋىندا ايتقان سوزىندە جاستار سالاسى مەن ساياساتىندا پايدا بولاتىن تەكتونيكالىق ۇردىستەر تەرەڭ جانە ەگجەي-تەگجەيلى تالدانىپ كورسەتىلگەن. جاستار قوعامنىڭ بەلسەندى، ىزدەنۋشى، دەموگرافيالىق ءموبيلدى بولىگى بولىپ تابىلادى. سونىمەن بىرگە، الەۋمەتتىك وسال جانە كوبىنەسە ءتۇرلى باعىتتاعى ترەندتتەردىڭ ىقپالىنا ۇشىرايدى. سوندىقتان، جاستار ساياساتى جالپى مەملەكەتتىك دامۋ ستراتەگياسىنىڭ باستى باسىمدىقتارىنىڭ ءبىرى. باسقاشا ايتقاندا، اسىرا سىلتەۋسىز، جاستار - ەلدىڭ بولاشاعى»، - دەيدى سانات كوشكىمباەۆ.

ساراپشىنىڭ ايتۋىنا قاراعاندا، ەرتەڭگى كۇنىن، بولاشاعىن ويلايتىن ساياساتكەر كۇن تارتىبىندەگى جاستاردىڭ وزەكتى ماسەلەلەرىن جاقسى تۇسىنەدى. ياعني، ەلباسى ءسوزىنىڭ باستى باعدارى - جۇيەلى شارالاردى رەتىمەن جۇزەگە اسىرۋ ارقىلى كورىنىس تاپقان مەملەكەتتىڭ جاستارعا قامقورلىعى مەن قولداۋى.

«ءوز كەزەگىندە پرەزيدەنتتىڭ ويلارى كاسىپتىك ءبىلىم بەرۋ جانە جۇمىسپەن قامتۋ، تۇرعىن ءۇي جانە وتباسى، دەنساۋلىق ساقتاۋ جانە دەمالىس ۋاقىتىن وتكىزۋ، تاربيە بەرۋ جانە وتانسۇيگىشتىككە بايلانىستى وزەكتى ماسەلەلەرگە باعىتتالعان. پرەزيدەنت اتالعان ماسەلەلەردى شەشۋدە قاراپايىم جانە ايقىن قۇرالدارعا سۇيەنۋدى ۇسىنادى»، - دەيدى ول.

Cانات كوشكىمباەۆ ءىرى قالالاردا جاس وتباسىلارعا ارنالعان جالعا بەرىلەتىن تۇرعىن ءۇي باعدارلامالارىنىڭ شەڭبەرىندە جىلىنا كەمىندە ءبىر مىڭ پاتەر سالىناتىن ەسكە سالدى.

«7-20-25» باعدارلاماسى قازىردىڭ وزىندە ىسكە قوسىلعان.  «جاس كاسىپكەر»، «ديپلوممەن اۋىلعا»، «باستاۋ»، «اۋىل - ەل بەسىگى» جوبالارى، «بيزنەس-2020» جول كارتاسى جاستار بيزنەسىن دامىتۋعا جانە جۇمىسپەن قامتىلۋ دەڭگەيىن ارتتىرۋعا باعىتتالعان. ءبىلىم بەرۋدىڭ قولجەتىمدىلىگىن ارتتىرۋ ءۇشىن قوسىمشا 20 مىڭ گرانت ءبولىنىپ، 75 مىڭ ورىنعا ارنالعان جاڭا ستۋدەنتتىك جاتاقحانالاردىڭ قۇرىلىسى باستالدى. قاشىقتان وقىتۋ سالاسى ۇسىنىلعان «Open University - اشىق ۋنيۆەرسيتەت» مىسالىندا كەڭەيتىلەتىن بولادى. جالپى، ەلىمىزدە جاڭارتىلعان باعدارلامالار بويىنشا 20 ۋنيۆەرسيتەت جانە 180 كوللەدج جۇمىس ىستەيتىن بولادى. وسىنىڭ ءبارى دە جاستار ءۇشىن اتقارىلىپ جاتقان شارۋالار»، - دەيدى ساراپشى.

ەسكە سالا كەتسەك، كۇنى كەشە پرەزيدەنتتىڭ قاتىسۋىمەن قازاقستاندا جاستار جىلى رەسمي تۇردە باستالعان بولاتىن. مەملەكەت باسشىسى استانادا ۇيىمداستىرىلعان «تاۋەلسىزدىك ۇرپاقتارى» اتتى سالتاناتتى شارادا جاس ماماندار مەن وتباسىلاردى قولداۋعا قاتىستى بىرقاتار تاپسىرمالاردى جۇكتەگەن ەدى.

Abai.kz