"نۇر وتان" پارتياسى ۇيىمداستىرعان "ۇلى دالا" بايقاۋى ءوز مارەسىنە جەتتى، - دەپ حابارلايدى اباي-اقپارات ءتىلشىسى. جاس قالامگەرلەر مەن  ادەبيەتسۇيەر قاۋىمنىڭ قىزىعۋشىلىعىن تۋدىرعان الامان بايگەنىڭ پۋبليتسيستيكا نوميناتسياسى بويىنشا "مۇزداۋان مەرگەنباي اتتى عۇمىرباياندىق ەسسەمەن Abai.kz اقپاراتتىق پورتالىنىڭ باس رەداكتورى قانات ابىلقايىر جۇلدەلى ەكىنشى ورىندى جەڭىپ الدى. قر تۇڭعىش پرەزيدەنتى ەلباسىمىز نۇرسۇلتان نازارباەۆتىڭ "رۋحاني جاڭعىرۋ" ماقالاسىندا ايتىلعان ماسەلەلەردى نەگىزگە الىپ «نۇر وتان» پارتياسى ۇيىمداستىرعان بايگەدە وزا شاۋىپ، جۇلدەگە ىلىككەن ازاماتتار بۇگىن استانا قالاسىندا ماراپاتتالدى.

"ۇلى دالا" بايقاۋى جەڭىمپازدارىن ماراپاتتاۋعا "نۇر وتان" پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ باستاعان بىرقاتار مەملەكەت قايراتكەرلەرى قاتىستى. سولارمەن بىرگە قازاقستانعا بەلگىلى قالامگەرلەر مەن زيالى قاۋىم وكىلدەرى شاراعا اتسالىسىپ، جۇلدەگەرلەردى ماراپاتتاۋعا اتسالىستى.

بۇل بايقاۋ قر پرەزيدەنتىڭ نۇرسۇلتان نازارباەۆتىڭ "رۋحاني جاڭعىرۋ" باعدارلاماسى مەن "ۇلى دالانىڭ جەتى قىرى" اتتى ماقالاسىنا وزەك بولعان قۇندىلىقتاردى ناسيحاتتاۋعا تىڭ سەرپىن اكەلگەنى بايقالدى. قازىر نۇرسۇلتان نازارباەۆتىڭ "رۋحاني جاڭعىرۋ" باعدارلاماسى مەن "ۇلى دالانىڭ جەتى قىرى" اتتى ماقالاسىن قوعامعا كەڭ كولەمدە ناسيحاتتاۋ ماقساتىندا ىرگەلى ءىس-شارالار قولعا الىنىپ، ناقتى جۇيەلى جۇمىستار جۇزەگە اسىرىلىپ جاتىر. "نۇر وتاننىڭ" "ۇلى دالا" شىعارماشىلىق بايقاۋى دا سونىڭ ءبىر مىسالى ىسپەتتى.

مىڭنان وزا شاۋىپ، جۇلدەگەر اتانعان جەڭىمپازداردى قۇتتىقتاعان پارتيا باسشىسىنىڭ ورىنباسارى ماۋلەن اشىمباەۆ كەلگەن قوناقتاردى نۇرسۇلتان ءابىشۇلى نازارباەۆتىڭ "رۋحاني جاڭعىرۋ" باعدارلاماسىنىڭ ماڭىزىنا نازار اۋدارۋعا شاقىردى.

ماۋلەن اشىمباەۆ، "نۇر وتان" پارتياسى توراعاسىنىڭ ءبىرىنشى ورىنباسارى:

- ەلباسىمىز نۇرسۇلتان نازارباەۆتىڭ "ۇلى دالانىڭ جەتى قىرى" جانە "بولاشاققا باعدار: رۋحاني جاڭعىرۋ" اتتى باعدارلامالىق ماقالالارى مەملەكەتىمىزدەگى يدەولوگيا سالاسىن جاڭا ءبىر كەزەڭگە شىعۋىنا جول اشتى. اتالمىش ەكى ماقالانىڭ باستى قۇندىلىعى - ۇلتتىق كودتى ساقتاۋ، تاريحي جادىمىزدى قالىپتاستىرۋ دەپ بىلەمىن. وسى ۇلتتىق كودتى ساقتاۋ جانە تاريحي جادىمىزدى قالىپتاستىرۋ ارقىلى ءبىز رۋحاني كەمەلدەنگەن قوعامعا اينالامىز. قازىرگىندەي الماعايىپ زاماندا، قازاق قازاق رەتىندە ساقتالىپ، ماڭگىلىك تاۋەلسىز ەل بولىپ قالۋ ءۇشىن نە ىستەمەك كەرەك؟ وسى سۇراق تاۋەلسىزدىگىمىزدى ماڭگىلىك ەتۋدىڭ قانشالىقتى ماڭىزدى ەكەنىن اڭعارتادى. سول سەبەپتى دە، ءبىز "ۇلى دالا" بايقاۋىن ۇيىمداستىرىپ، نۇرسۇلتان ءابىشۇلى كوتەرگەن قۇندىلىقتار مەن يدەيالاردى ناسيحاتتاپ، ەلىمىزدىڭ رۋحاني جاڭعىرۋىنا ۇلەس قوسقىمىز كەلدى. بۇل ءبىزدىڭ پارتيانىڭ باستى مىندەتى دەپ بىلەمىز. 

قوش! ەندى بايقاۋ قورىتىندىسىنا كەلسەك. تالاي جاس تالاپتىڭ شابىتىنا قانات بىتىرگەن "ۇلى دالا" بايقاۋىندا 18 بەن 40 جاس ارالىعىنداعى قالامگەرلەر باق سىنادى. جاس قالامگەرلەردىڭ شىعارمالارى ءار نوميناتسيا بويىنشا قابىلداندى. شىعارما قابىلداۋ مەرزىمى از ۋاقىتتا وتكەنىمەن، بايقاۋعا  400-دەن استام تۋىندى كەلىپ تۇسكەن. وسى تۋىندىلاردى قوعامعا بەلگىلى جازۋشى-قالامگەر، پۋبليتسيست-سىنشىلار وقىپ، ادىلقازىلىق ەتتى. وسىلاي بەس بىردەي اتالىم بويىنشا جەڭىمپازدار مەن جۇلدەگەرلەر بەلگىلى بولدى.

ءبىرىنشى نوميناتسيا «پروزا» اتالىمىندا بەلگىلى جازۋشى ماقسات مالىكوۆ «قۇدىق باسىنداعى ەكەۋ» شىعارماسىمەن ۇزدىك دەپ تانىلىپ، ءبىرىنشى ورىندى يەلەندى.. ەكىنشى ورىن ادەبي قاۋىمعا "قاراشتىڭ اڭگىمەلەرى" جيناعىمەن بەلگىلى قانات تىلەۋحان «مەدال» اتتى تۋىندىسىمەن جەڭىپ الدى. ال ءۇشىنشى ورىنعا تاتيانا كرەتوۆا «كازاحستانەتس» اتتى شىعارماسىمەن لايىق دەپ تانىلدى.

ەكىنشى نوميناتسيا «پوەزيا» اتالىمىندا ءبىرىنشى ورىن – قاراعاندىلىق اقىن جانات جاڭقاشۇلى، ەكىنشى ورىن – نۇرگۇل ماۋلينا، ءۇشىنشى ورىن باتىرحان سارسەنحانعا بۇيىردى.

ءۇشىنشى نوميناتسيا «دراماتۋرگيا، كوركەم فيلمدەر مەن تەلەسەريالدار ستسەناريى» اتالىمىندا «كەيكى مەرگەن» تەلەسەريالىنىڭ ستسەناريىن جازعان سەرجان زاكەرۇلى ءبىرىنشى ورىندى يەلەندى. ەكىنشى، ءۇشىنشى ورىندار تيىسىنشە «ايسۇلۋ» ءفيلمىنىڭ ستسەناريىمەن ايدوس دىلدەباي جانە «ابدىعاپپار» درامالىق تۋىندىسىنىڭ اۆتورى ابىلاي ماۋدانوۆ جەڭىمپاز دەپ تانىلدى.

ءتورتىنشى نوميناتسيا «بالالارعا ارنالعان شىعارمالار» اتالىمىندا بەلگىلى اقىن باۋىرجان قاراعىزۇلى «ۇلى دالانىڭ جەتى قىرى» ولەڭدەر توپتاماسىمەن باس جۇلدەگەر اتاندى. ەكىنشى ورىن اسلان تىلەگەننىڭ «ۇلتتىق مۋزەيگە ەكسكۋرسيا» شىعارماسى لايىق دەپ تانىلدى. ءۇشىنشى ورىن سەرىكبول حاساننىڭ «جىلقى دەگەن جانۋار» ولەڭدەر توپتاماسىنا بۇيىردى.

بەسىنشى نوميناتسيا «پۋبليتسيستيكا» اتالىمىندا 1-ورىن "كوك ءبورى توتەمى" ماقالاسىن ماقپال جۇماشەۆاعا بۇيىردى.  ەكىنشى ورىندى "مۇزداۋان مەرگەنباي" اتتى ەسسەسىمەن ءبىزدىڭ Abai.kz اقپاراتتىق پورتالىنىڭ باس رەداكتورى قانات ابىلقايىر جەڭىپ الدى.  ال گۇلبانۋ تەبەگەنوۆاعانىڭ "رۋحاني جاڭعىرۋ – ۇشتىلدىلىك" اتتى ماتەريالىنا ءۇشىنشى ورىن بۇيىردى.

وسى جۇلدەگەرلەردىڭ ءبارى "نۇر وتان" پارتياسى تاعايىنداعان قوماقتى قارجىلاي سىياقىلار الدى. 1-ورىن جەڭىمپازدارىنا – 1,5 ملن، 2-ورىن جەڭىمپازدارىنا – 750 مىڭ، ال 3-ورىن جەڭىمپازدارىنا 500 مىڭ تەڭگەدەن بەرىلدى.

شىعارمالارعا تولەن ابدىك، الدان سمايىل، نەسىپبەك ايتۇلى، ۇلىقبەك ەسداۋلەت، نۇرتورە ءجۇسىپ، جۇسىپبەك قورعاسبەك، كوپەن امىربەك جانە ءاليا بوپەجانوۆا سياقتى بەلگىلى اقىن-جازۋشىلار توراعالىق ەتتى.

"نۇر وتان" پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ ماراپاتتاۋ سالتاناتىندا قالامگەرلەردىڭ قوعامدى رۋحاني جاڭعىرتۋداعى  ءرولىنىڭ ەرەكشە ەكەنىنە نازار اۋدارىپ، بۇل بايقاۋ الداعى جىلداردا دا جالعاساتىنىن ايتتى.

ماۋلەن اشىمباەۆ، "نۇر وتان" پارتياسى توراعاسىنىڭ ءبىرىنشى ورىنباسارى:

- نۇرسۇلتان نازارباەۆتىڭ "بولاشاققا باعدار: رۋحاني جاڭعىرۋ" اتتى باعدارلامالىق ماقالا اياسىندا جاستارمەن ۇزدىكسىز، جۇيەلى جۇمىس جۇرگىزۋگە ءتيىسپىز. بۇل ماقساتقا جەتۋ ءۇشىن جاستارعا قىزىقتى، زاماناۋي، دۇرىس قۇندىلىقتاردى دارىپتەيتىن تۋىندىلار اۋاداي قاجەت. سوندىقتان دا "ۇلى دالا" اتتى بايقاۋ جاريالاۋدى ءجون سانادىق. ءبىز وسى ءىسىمىز ارقىلى جاس قالامگەرلەرىمىزدىڭ تۋىندىلارىنىڭ ناسيحاتتالۋىنا، ولاردىڭ شىعارماشىلىق الەمنەن وزىندىك ورنىن الاتىن تالانتتى قالامگەر بولىپ تانىلۋىنا سەپ بولۋدى ماقسات ەتىپ وتىرمىز. الداعى ۋاقىتتا "نۇر وتان" پارتياسى تەك وسى "ۇلى دالا" بايقاۋمەن شەكتەلىپ قالمايدى. الدا جازۋشىلار وداعىمەن بىرلەسىپ، تاعى بىرقاتار جوبالاردى جۇزەگە اسىرامىز. سوندىقتان بۇگىن جەڭىمپاز اتانا الماي قالعان جاستاردى سول جوبالارعا بەلسەنە قاتىسۋعا شاقىرامىن.

سونداي-اق، "نۇر-وتان" پارتياسى "ۇلى دالا" بايقاۋىن قازاقستان جازۋشىلار وداعىمەن بىرلەسىپ ۇيىمداستىرعانىن ەسكە سالا كەتكىمىز كەلەدى. وتكەن جىلدىڭ قازان ايىندا «نۇر وتان» پارتياسى مەن جازۋشىلار وداعى ءوزارا ىنتىماقتاستىق تۋرالى مەموراندۋمعا قول قويىپ، بىرلەسىپ جۇمىس جاساۋعا كەلىسكەن بولاتىن. "ۇلى دالا" بايقاۋى سول مەموراندۋمنىڭ - ناقتى جەمىسى. سونىمەن قاتار، شىعارمالاردى قاراۋ، باعالاۋ، ءادىل قازىلىق جاساۋ سەكىلدى شىعارماشىلىق جۇمىستاردى جازۋشىلار وداعى، ال ماراپاتتاۋ ءراسىمى مەن قارجىلىق شىعىنداردى "نۇر وتان" پارتياسى ۇيىمداستىرعانىن تاعى دا ەسكەرتە كەتكەن ءجون.

ق.اقانۇلى

Abai.kz