پارلامەنت سەناتىنىڭ توراعاسى قاسىم-جومارت توقاەۆ ارمەنيا، قىرعىزستان، تۇرىكمەنستان جانە جاپونيا ەلدەرىنىڭ قازاقستانداعى ەلشىلەرىن
ولاردىڭ وتىنىشتەرى بويىنشا قابىلدادى.

سەنات توراعاسى ارمەنيانىڭ قازاقستانداعى جاڭا ەلشىسى گاگيك گالاچياندى قابىلداۋ بارىسىندا ارمەنيانىڭ كەزەكتەن تىس پارلامەنتتىك سايلاۋدى تابىستى وتكىزۋىمەن قۇتتىقتادى جانە ءبىزدىڭ ەلدەرىمىزدىڭ زاڭ شىعارۋ ورگاندارى اراسىنداعى دوستىق قاتىناستاردى جالعاستىرۋعا ىقىلاستى ەكەنىن جەتكىزدى. ق.توقاەۆتىڭ ايتۋىنشا، قازاقستاندا ارميان مەملەكەتى مەن ونىڭ حالقىنا، مادەنيەتى مەن سالت-داستۇرىنە جىلى شىرايلى كوزقاراستى بەرىك ۇستانادى. قازاق جانە ارميان حالىقتارى اراسىندا ەجەلدەن دوستىق ءداستۇرى قالىپتاسقان، سوندىقتان، پارلامەنتىڭ جوعارعى پالاتاسىنىڭ توراعاسى عاسىرلار قويناۋىنا كەتەتىن مادەني بايلانىستار مەن ىنتىماقتاستىقتى زەرتتەۋ جۇمىستارىنىڭ ماڭىزى زور دەپ سانايدى. ق.توقاەۆ قازاقستان مەن ارمەنيانىڭ ەقىۇ مەن ەاەو-داعى، سونداي-اق باسقا دا حالىقارالىق ۇيىمدارداعى ءوزارا ءىس-قيمىلى باسىمدىققا يە ەكەنىن اتاپ ءوتتى.

ق.توقاەۆ قىرعىزستان ەلشىسى جەەنبەك كۋلۋباەۆپەن كەزدەسۋ بارىسىندا قازاقستان مەن قىرعىزستاننىڭ زاڭ شىعارۋ ورگاندارىنىڭ تمد پارلامەنتارالىق اسسامبلەياسى، ۇقشۇ پارلامەنتتىك اسسامبلەياسى مەن ەقىۇ پارلامەنتتىك اسسامبلەياسى اياسىنداعى تىعىز ىنتىماقتاستىعىن جوعارى باعالادى. سەنات توراعاسى ساۋدا-ەكونوميكالىق جانە مادەني گۋمانيتارلىق ىنتىماقتاستىقتى ودان ءارى نىعايتۋدىڭ ماڭىزدىلىعىن اتاپ ءوتتى. كەزدەسۋگە قاتىسۋشىلار ايماقتاعى، ونىڭ ىشىندە ەجەلگى جىبەك جولى اياسىنداعى تۋريستىك باعىتتاردى ودان ءارى دامىتۋ مۇمكىندىكتەرى تۋرالى پىكىر
الماستى.

ق.توقاەۆ پەن تۇرىكمەنستاننىڭ ەلشىسى تويلى كومەكوۆ ەكى جاقتى كۇن تارتىبىندەگى اۋقىمدى ماسەلەلەر بويىنشا پىكىر الماستى. سەنات توراعاسى 2018 جىلدىڭ تامىز ايىندا كاسپي تەڭىزىنىڭ قۇقىقتىق مارتەبەسى تۋرالى كونۆەنتسياعا اقتاۋدا قول قويىلۋى نەگىزىنەن ەكى ەلدىڭ ءتيىستى مەكەمەلەرىنىڭ ءوزارا ناتيجەلى ىنتىماقتاستىعىنىڭ كورىنىسى دەپ سانايدى. كاسپي ماڭى مەملەكەتتەرىنىڭ ەكىجاقتى جانە كوپجاقتى سيپاتتاعى ساياسي، ساۋدا- ەكونوميكالىق جانە گۋمانيتارلىق ىنتىماقتاستىقتى دامىتۋعا جاڭا مۇمكىندىكتەر اشاتىن بۇل قۇجاتتى قازاقستان مەن تۇرىكمەنستان پارلامەنتتەرى راتيفيكاتسيالاعان بولاتىن.

ق.توقاەۆ جاپونيانىڭ ەلشىسى تاتسۋحيكو كاسايدى استاناداعى جۇمىسىنىڭ باستالۋىمەن قۇتتىقتادى جانە ونىڭ قىزمەتى ساياسي ۇنقاتىسۋدى ودان ءارى ىلگەرىلەتۋگە، ساۋدا-ەكونوميكالىق جانە ينۆەستيتسيالىق قاتىناستارعا قارقىن قوسۋعا ەلەۋلى ۇلەس قوساتىنىنا سەنىم ءبىلدىردى. سەنات توراعاسى پرەزيدەنت ن.نازارباەۆتىڭ 2016 جىلى جاپونياعا جاساعان ساپارىنىڭ قورىتىندىلارى جونىندەگى دەكلاراتسيادا ءبىزدىڭ ەلدەرىمىزدىڭ باسشىلارى ەكىجاقتى قاتىناستاردى جاڭا ساپالىق دەڭگەيدەگى كەڭەيتىلگەن ستراتەگيالىق ارىپتەستىككە شىعارۋدى ناقتىلاعانىن ەسكە سالدى. قازاقستان مەن جاپونيادا جەر جۇزىندە يادرولىق قارۋدى تاراتپاۋ سالاسىنداعى ىنتىماقتاستىقتىڭ مول تاجىريبەسى جيناقتالدى. جۇزدەسۋشىلەر پارلامەنتارالىق ۇنقاتىسۋدى ودان ءارى دامىتۋ مۇمكىندىكتەرىن دە تالقىلادى.

قازاقستان رەسپۋبليكاسى پارلامەنتى
سەناتىنىڭ ءباسپاسوز قىزمەتى

Abai.kz