قازاقستاندىق 5 ميللياردەر Forbes تىزىمىندە جوعارى ورىنعا كوتەرىلدى. امەريكالىق باسىلىم پرەزيدەنتتىڭ قىزى مەن كۇيەۋ بالاسى تيمۋر، دينارا قۇلىباەۆتاردىڭ جىلدىق تابىسىن  6,4 ميلليارد دوللار دەپ باعالاعان.

KAZ Minerals plc كومپانياسى مەن “قازاقمىس” كورپوراتسياسىنىڭ يەسى ۆلاديمير كيمنىڭ دە Forbes-تەگى ءتىزىمى ايتارلىقتاي جوعارىلاپ، تابىسى وسكەن. ول وتكەن جىلى 766 ورىندا بولسا، بيىلعى رەيتينگتە 424-ورىندا تۇر. كيمنىڭ جىلدىق تابىسى جارتى ميلليارد دوللارعا ءوسىپ، جالپى، 4,6 ميلليارد دوللاردى قۇراعان. ول ازىرگە قۇلىباەۆتاردىڭ الدىندا تۇر.

ال قۇلىباەۆتاردىڭ Forbes-كە سايكەس جيىنتىق جاعدايى - 6,4 ميلليارد دوللاردان وزگەرگەن جوق. امەريكالىق باسىلىم دينارا قۇلىباەۆانىڭ كاپيتالىن 3,2 ميلليارد دوللارعا باعالايدى، ونىڭ كۇيەۋىنىڭ دە تابىسى وسى دەڭگەيدە. وتكەن جىلى بۇل جۇپ Forbes-ءتىڭ ميللياردەرلەر تىزىمىندە 729-شى ورىندا بولعان. ال، بيىلعى ولار 715-ورىنعا كوتەرىلگەن. ولاردىڭ ەڭ ۇلكەن اكتيۆى – المەكس كومپانياسى. قۇلىباەۆتار سول ارقىلى ەلدەگى ءىرى كوممەرتسيالىق بانكتى باسقارادى. ولارعا تيەسىلى “حالىق بانك” ەلدەگى جالپى بانك سەكتورى اكتيۆتەرىنىڭ ۇشتەن بىرىنەن كوپ بولىگىن قۇرايدى. سونىمەن قاتار، قۇرىلىس يندۋسترياسىنا، مۇناي جانە گاز ۇڭعىمالارىن پايدالانۋعا جانە قىزمەت كورسەتۋگە تارتىلعان ينۆەستيتسيالىق كومپانيالار دا قۇلىباەۆتارعا تيەسىلى.

سونداي-اق، تيمۋر قۇلىباەۆ KAZENERGY قازاقستان مۇناي-گاز جانە ەنەرگەتيكالىق كەشەنى ۇيىمدارىنىڭ قاۋىمداستىعىنا جەتەكشىلىك ەتەدى. جانە 2009 جىلدان باستاپ رەسەيلىك «گازپروم» كومپانياسىنىڭ ديرەكتورلار كەڭەسىندە قىزمەت اتقاردى. ول قازىر ۇلتتىق وليمپيادا كوميتەتىنىڭ توراعاسى جانە ازيا وليمپيادا كەڭەسىنىڭ ۆيتسە-پرەزيدەنتى، قازاقستان بوكس فەدەراتسياسىنىڭ باسشىسى.

ال، پرەزيدەنتتىڭ قىزى دينارا قۇلىباەۆا بۇگىندە اكەسىنىڭ اتىنداعى ءبىلىم بەرۋ قورىن باسقارادى. ول 2017 جىلى ۇلتتىق عىلىم اكادەمياسىنىڭ «پەداگوگيكا» ماماندىعى بويىنشا الەۋمەتتىك جانە گۋمانيتارلىق عىلىمدار كافەدراسىنىڭ اكادەميگى بولدى.

Forbes تىزىمىندە تاسى ورگە دومالاعانداردىڭ ءبىرى - قازاقستان پرەزيدەنتىنىڭ بۇرىنعى مەنەدجەرى بولات وتەمۇراتوۆ. ول Forbes-تە وتكەن جىلى 924 ورىندا بولسا، بيىل 645-ءشى ورىنعا كوتەرىلدى. ونىڭ كاپيتالى ءبىر جىل ىشىندە 2,6-دان 3,5 ملرد دوللارعا دەيىن وسكەن. وتەمۇراتوۆتىڭ كاسىپكەرلىك مۇمكىندىگى جىلجىمايتىن مۇلىك، تەلەكوممۋنيكاتسيا، باق جانە بانك سەكتورىن قامتيدى. Forbes-ءتىڭ ايتۋىنشا، بيزنەسمەن جاقىندا Forte Bank-قا 400 ميلليون دوللار جۇمسادى جانە ونىڭ جىلجىمايتىن مۇلىك پورتفەلىن ءارتاراپتاندىردى.

ال، ERG تاۋ-كەن مەتاللۋرگيالىق كورپوراتسياسىنىڭ ورتاق يەسى اليجان يبراحيموۆتىڭ مارتەبەسى وزگەرگەن جوق. ونىڭ تابىسى 2,3 ميلليارد دوللارعا تەڭ. قازاقستان پاسپورتى بار وزبەكستاننىڭ تۋماسى وتكەن جىلى ول 1070-ءشى ورىندا بولسا، بيىل 1008 ورىنعا تۇراقتاعان.

ال، ونىڭ ىسكەرلىك ارىپتەستەرى پاتوك شوديەۆ پەن الەكساندر ماشكەۆيچ-تە Forbes تىزىمىنەن تۇسپەيتىن دوكەيلەر. امەريكالىق باسىلىمدا يبراگيموۆ، شوديەۆ جانە ماشكەۆيچ «Eurasian trio» نەمەسە «Eurasian troika» دەپ اتالادى - Eurasian Natural Resources Corp. (ENRC). ونىڭ اكتسيالارى لوندوندا 2007 جىلى ساتىلا باستادى. 2013 جىلى ENRC اكتسيالار نارىعى تومەندەدى.

ەندى ERG تاۋ-كەن ونەركاسىبى ەنەرگەتيكا، لوگيستيكا سالاسى بويىنشا 14 ەلدە باسشىلىق جاسايدى. ال، كومپانيانى ەۋرازيالىق بانك باسقارادى. ونىڭ ديرەكتورلار كەڭەسىنە الەكساندر ماشكەۆيچ پەن ءاليجان يبراگيموۆتىڭ ۇلى شۋحرات ءاليجانوۆ كىرەدى.

Forbes مالىمەتىنشە يزرايل ازاماتى الەكساندر ماشكەەۆيچتىڭ جىلدىق تابىسى  100 ملن. دوللاردان  2,4 ملرد.دوللار ارالىعىندا. ال، بەلگيالىق ازامات چوديەۆتىڭ وتكەن جىلعى تابىسى 2,2 ميلليارد بولسا، بيىل 2,1 ميللياردتى قۇراعان.

قازاقستان ميللياردەرلەرىنىڭ جالپى تابىسى 16,8 ملرد. اقش دوللارىن قۇرايدى. ال، ءبىر جىل ىشىندە بۇل كورسەتكىش ەكى ميللياردتان اسقان.

ءتۇيىن

جۋىردا Numbeo جۇيەسىنىڭ ساراپتاما ماماندارى 71 مەملەكەتتىڭ ىشىندە ءومىر ءسۇرۋ ساپاسى بويىنشا قازاقستان 69 – ورىندا ەكەنىن جاريالادى. ياعني، ءبىز ءىجو كولەمىنەن تەك يران مەن ەگيپەتتىڭ الدىندامىز. ال، قازاقستانداعى جۇمىسسىزدار سانى وتكەن جىلدىڭ مامىر ايىندا 6,5% بولعان. ياعني، ەلىمىزدە 1 ملن.نان استام جۇمىسسىزدار بار. دەمەك، حالىقتىڭ جاعدايى ناشارلاعان سايىن، ميللياردەرلەردىڭ تابىسى ءوسىپ جاتىر.

نۇربيكە بەكسۇلتانقىزى

Abai.kz