ق. توقاەۆتىڭ توراعالىق ەتۋىمەن بولعان پارلامەنت سەناتى بيۋروسىنىڭ وتىرىسىندا دەپۋتاتتاردىڭ ايماقتارعا ساپارىنىڭ قورىتىندىسى شىعارىلدى.

پالاتا توراعاسىنىڭ ورىنباسارى بەكتاس بەكنازاروۆ سەناتورلاردىڭ جۇمىس ساپارى تۋرالى ءسوز سويلەدى. ونىڭ ايتۋىنشا، پارلامەنتشىلەر ەلىمىزدىڭ بارلىق ايماقتارىندا، ونىڭ ىشىندە شالعاي ەلدى مەكەندەردە جۇزدەگەن كەزدەسۋلەر وتكىزدى. مەملەكەت باسشىسىنىڭ جاڭا الەۋمەتتىك باستامالارى وسى شارالاردىڭ باستى تاقىرىبى بولدى. ايماق تۇرعىندارى پارلامەنت قابىلداعان زاڭدار تۋرالى جان-جاقتى حاباردار ەتىلدى.

كەزدەسۋلەردە كوپ بالالى وتباسىلارعا جانە از قامتىلعان ازاماتتارعا جاردەماقى تاعايىنداۋ ماسەلەلەرىنە باسا نازار اۋدارىلدى. شاراعا قاتىسۋشىلار ازاماتتاردى تۇرعىن ۇيمەن قامتاماسىز ەتۋ، جەرگىلىكتى اۆتوموبيل جولدارىن سالۋ، اۋىل مۇعالىمدەرىنىڭ ەڭبەكاقىسىن كوتەرۋ، جاڭا جۇمىس ورىندارىن اشۋ، كوممۋنالدىق قىزمەتتەر تاريفتەرىن رەتتەۋ جانە كۇندەلىكتى قاجەتتى تاۋارلارعا باعانى تومەندەتۋ ماسەلەلەرىن كوتەردى.

سەنات توراعاسى ق. توقاەۆ قازىرگى كەزەڭدە بارلىق مەملەكەتتىك ورگانداردىڭ قىزمەتى «نۇر وتان» پارتياسىنىڭ حVIII سەزىندەگى مەملەكەت باسشىسى العا قويعان ناقتى مىندەتتەردى شەشۋگە ارنالۋى ءتيىس ەكەنىن اتاپ ءوتتى.

«قازىرگى الەمدىك جانە ۇلتتىق ەكونوميكاداعى جاعدايعا سايكەس ەلدىڭ الەۋمەتتىك دامۋىنا قاجەتتى شارالاردى جۇزەگە اسىرۋ – ۋاقىت تالابىنان تۋىنداپ وتىرعان ماڭىزدى مىندەت. ونىڭ ىشىندە الەۋمەتتىك جاعىنان از قامتىلعان ازاماتتار مەن كوپ بالالى انالارعا قامقورلىق كورسەتۋ   مەملەكەتتىك ورگانداردىڭ ۇدايى نازارىندا بولۋى ءتيىس»، - دەدى ق.توقاەۆ.

ول دەپۋتاتتار مەن ۇكىمەتتى حالىقتىڭ الەۋمەتتىك تۇرمىس-تىرشىلىگىن جاقسارتۋ ماقساتىندا ناقتى جۇمىستاردى اسا جوعارى جاۋاپكەرشىلىكپەن اتقارۋعا شاقىردى. ۇلتتىق قور مەن رەسپۋبليكالىق بيۋدجەتتەن بۇل جۇمىستارعا قوماقتى قارجى بولىنەتىنى ايتىلدى.

سەنات توراعاسى قىسقا مەرزىمدە الەۋمەتتىك باعدارلامالاردى جانە رەسپۋبليكالىق بيۋدجەتتى ناقتىلاۋدى زاڭنامالىق تۇرعىدا قامتاماسىز ەتۋ جونىندەگى اۋقىمدى جۇمىستار اتقارىلاتىنىن اتاپ ءوتتى. ق.توقاەۆ حالىقتى الەۋمەتتىك قولداۋعا باعىتتالعان كەشەندى شارالاردى    كوپشىلىككە كەڭىنەن ناسيحاتتاۋدىڭ ماڭىزى ايرىقشا، دەپ سانايدى.

بيۋرو وتىرىسىندا پالاتانىڭ 14 ناۋرىزعا جوسپارلانعان كەزەكتى وتىرىسىنىڭ كۇن ءتارتىبى بەكىتىلدى. كەيبىر زاڭنامالىق اكتىلەرىنە بيزنەس-ورتانى دامىتۋ جانە ساۋدا قىزمەتىن رەتتەۋ، سونداي-اق بالانىڭ قۇقىقتارىن قورعاۋ جونىندەگى فۋنكتسيالاردى جۇزەگە اسىراتىن ۇيىمداردىڭ قىزمەتىنە بايلانىستى ماسەلەلەر بويىنشا وزگەرىستەر مەن تولىقتىرۋلار دەپۋتاتتاردىڭ نازارىنا ۇسىنىلادى. سەناتورلار سونداي-اق قازاقستان مەن وزبەكستان ۇكىمەتى اراسىنداعى ەنەرگەتيكا سالاسىنداعى ىنتىماقتاستىقتىڭ كەيبىر ماسەلەلەرى تۋرالى نەگىزدەمەلىك كەلىسىمدى راتيفيكاتسيالاۋ تۋرالى زاڭ جوباسىن دا قارايدى.

بيۋرودا ماجىلىستەن تۇسكەن زاڭ جوبالارى تۇراقتى كوميتەتتەرگە ءبولىنىپ بەرىلدى. حالىقارالىق قاتىناستار، قورعانىس جانە قاۋىپسىزدىك كوميتەتى «1995 جىلعى 23 جەلتوقسانداعى قازاقستان رەسپۋبليكاسى مەن رەسەي فەدەراتسياسى اراسىنداعى بايقوڭىر قالاسىنىڭ مارتەبەسى جانە ونداعى اتقارۋشى وكىمەت ورگاندارىن قۇرۋدىڭ ءتارتىبى مەن ولاردىڭ مارتەبەسى تۋرالى كەلىسىمگە وزگەرىس ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى بويىنشا باس كوميتەت بولىپ; قارجى جانە بيۋدجەت كوميتەتى «قازاقستان رەسپۋبليكاسىنىڭ ۇكىمەتى مەن قىتاي حالىق  رەسپۋبليكاسىنىڭ ۇكىمەتى اراسىنداعى قىتاي حالىق رەسپۋبليكاسىنىڭ  جەڭىلدىكتى  كرەديت  بەرۋى  تۋرالى  نەگىزدەمەلىك كەلىسىمدى راتيفيكاتسيالاۋ تۋرالى» زاڭ جوباسى بويىنشا باس كوميتەت بولىپ بەلگىلەندى.

 قازاقستان رەسپۋبليكاسى پارلامەنتى
سەناتىنىڭ ءباسپاسوز قىزمەتى

Abai.kz