بۇگىن پارلامەنت پالاتالارىنىڭ بىرلەسكەن وتىرىسى ءوتىپ، وندا ەلوردا اتاۋىن نۇرسۇلتان قالاسى دەپ وزگەرتۋ تۋرالى زاڭ جوباسىن قوس پالاتا دەپۋتاتتارى ەكى وقىلىمدا دا ماقۇلدادى.

«تاريحي شەشىم قابىلداندى»، - دەپ مالىمدەدى ءماجىلىس توراعاسى نۇرلان نىعماتۋلين.

«قازاقستان كونستيتۋتسياسىنا سايكەس ۇكىمەت استانانىڭ اتاۋىن وزگەرتۋ تۋرالى تۇزەتۋ ەنگىزۋ ءۇشىن رەسپۋبليكالىق رەفەرەندۋم وتكىزۋ جونىندە قازاقستان پرەزيدەنتىنە ۇسىنىس جاسادى. پرەزيدەنت بۇل ۇسىنىستى رەفەرەندۋما شىعارماي، پارلامەنتتىڭ قاراۋىنا جىبەرۋ تۋرالى شەشىم قابىلدادى»، - دەدى نىعماتۋلين.

ول بۇل ماسەلە بويىنشا كونستيتۋتسيالىق كەڭەس ءوزىنىڭ وڭ قورىتىندىسىن بەرگەنىن اتاپ ءوتتى.

«مەملەكەت باسشىسى كونستيتۋتسيانىڭ 91-بابى 1-تارماعىنا سايكەس، پارلامەنتتىڭ قاراۋىنا قازاقستان كونستيتۋتسياسىنا وزگەرىستەر ەنگىزۋ تۋرالى قازاقستان رەسپۋبليكاسى زاڭىنىڭ جوباسىن ەنگىزدى. بۇل جوبا رەسپۋبليكا استاناسىنىڭ اتاۋىن استانا قالاسىنان نۇرسۇلتان قالاسىنا وزگەرتۋدى كوزدەيدى. ۇسىنعان تۇزەتۋلەردى قولداۋىڭىزدى سۇرايمىن»، - دەدى پرەزيدەنت اكىمشىلىگى باسشىسىنىڭ ورىنباسارى ءاليا راقىشەۆا.

Abai.kz