بانك وكىلدەرى اقش پرەزيدەنتى دونالد ترامپتىڭ بۇرىنعى سەرىكتەرىنىڭ ءبىرىن ايىپتاپ، ماسكەۋدەگى ترامپ مۇناراسىنىڭ جوباسىنا ۇرلانعان قارجىنى ينۆەستيتسيا رەتىندە سالماق بولدى دەيدى.
شاعىمدا كورسەتىلگەن ازاماتتاردىڭ اراسىندا نيۋ-يوركتەگى جىلجىمايتىن مۇلىك نارىعىندا جۇمىس ىستەگەن، FBI بۇرىنعى قىزمەتكەرى، قۇرىلىس جوبالارى بويىنشا بۇرىن ترامپپەن ارىپتەس بولعان فەليكس ساتەر دە بار.
ساتەر 27 ناۋرىزدا اقش-تا وكىلدەر پالاتاسىنىڭ بارلاۋ كوميتەتى الدىندا جاۋاپ بەرۋى ءتيىس. وندا ول ۇزاق جىلدار بويى ماسكەۋدە مۇنارا سالۋعا تالپىنعان قازىرگى اقش پرەزيدەنتى دونالد ترامپقا وسى ىستە قالاي كومەكتەسكەنى جايلى سۇراقتارعا جاۋاپ بەرەدى.
جاڭا شاعىمدا بانك وكىلدەرى 2011 جىلدان باستاپ ساتەر ءابليازوۆ پەن حراپۋنوۆقا اقش-تا ءتۇرلى ىسكەرلىك وپەراتسيالار ارقىلى شامامەن 40 ميلليون دوللار جىمقىرۋعا كومەكتەسكەن دەپ جازعان.
“ساتەر ءابليازوۆ پەن حراپۋنوۆقا جانە وزگەلەرگە ونداعان ميلليون دوللاردى جىمقىرۋعا كومەكتەستى" دەلىنگەن شاعىمدا.
وندا سونىمەن بىرگە ۇرلانعان قارجىنىڭ ءبىر بولىگىن حراپۋنوۆتىڭ اپكەسى مانحەتتەندەگى ترامپ مۇناراسىنان كوندومينيۋم ساتىپ الۋ ءۇشىن جۇمسادى دەپ كورسەتىلگەن.
شاعىمدا اقش پرەزيدەنتى ترامپتىڭ اتى اتالعانمەن ول "جىمقىرىلعان قارجى جايلى ءبىلدى" دەگەن ايىپ جوق.
"ساتەر ۇرلانعان قارجى ماسەلەسىن تالقىلاۋ ءۇشىن ترامپ مۇناراسىندا ءىلياس حراپۋنوۆپەن كەزدەسىپ قانا قويعان جوق، ول سونىمەن بىرگە ىقتيمال ينۆەستيتسيا جايلى سويلەسۋ ءۇشىن ءىلياس پەن دونالد ترامپ اراسىندا جەكە كەزدەسۋ ۇيىمداستىردى" دەلىنگەن شاعىمدا.
Abai.kz
