قازاق بولىپ قالۋ ءۇشىن قازاقستانعا كوشكەن ەدىك، ەندى ...

ابسۋرد پەن لوگيكاعا قيسىنسىز شەشىمدەردەن كەيىن قازاقستاندا ءومىر سۇرگىڭ دە كەلمەيدى ەكەن. شەنەۋنىكتەر دە ادامدار عوي. باسشىلىق ايتتى ەكەن دەپ ابسۋرد بولسا دا بۇيرىقتاردى ورىنداي بەرۋىنە تاڭمىن. قازاقستان - نۇرسۇلتان دەپ ۇرانداتۋى، ەلدىڭ قالاۋى سول دەپ كورسەتۋگە تىرىسۋى كادىمگىدەي اشۋىڭدى كەلتىرىپ، جيىركەنىش ورناتا ەكەن. ەلدەن جاستاردىڭ جاپپاي شەتەلگە كوشۋىنە وسى دا يتەرمەلەيدى.

شەتەلگە كەتكىسى كەلىپ جۇرگەن ازاماتتاردىڭ سانى ارتىپ جاتقانى وكىنىشتى. سوڭعى ءبىر اپتادان بەرى دوستارىمنىڭ جانە مۇلدە ماعان تانىس ەمەستەردىڭ اراسىندا اقش-قا كەلگىسى كەلەتىندەردىڭ كوبەيگەنى بايقالىپ جاتىر. جەلىلەر ارقىلى جازىپ، ۆيزا تۋرالى ساۋالدارىن جىبەرىپ جاتىر. ءوزىم دە وقۋدان كەيىن، ەلگە قايتپاي، وسىندا قالۋدى نە ەۋروپاعا كەتۋدى "ويلاي" باستادىم. ويلاي باستادىم، شەشكەن جوقپىن.

حالىقپەن ساناسپايتىن ۇكىمەت پەن بيلىكتى ءبىز سايلامادىق. بىراق ولار بىزدەن سۇراماي، ءبىز ءۇشىن شەشىم قابىلدايدى. ءوز بىلگەندەرىن جاسايدى. قالاي ونداي قوعامدا ءومىر سۇرۋگە بولادى؟! قانتوگىس جاسامايىق دەيمىز. قانتوگىس بولمايدى، ەگەر بيلىك قارۋلى كۇشپەن بەيبىت شەرۋلەردى توقتاتۋعا تالپىنباسا.

مەن وزبەكستاننان كوشكەن قازاقپىن. اكە-شەشەمنىڭ تاشكەنتتە تۇراقتى جۇمىستارى بار بولاتىن. ءۇيىمىز بولىپ، ەش نارسەدەن قىسىلماي ءومىر سۇرگەنبىز. ءبىز دە وزبەكستانداعى قازاق تىلىندە وقىتاتىن جالعىز مەكتەپ-ينتەرناتىندا وقىدىق. بۇگىنگى جەتىستىكتەرىمدى ءدال سول مەكتەپتە العان باستاپقى ءبىلىمىمنىڭ ارقاسى دەپ بىلەمىن. بىراق بالا كەزىمىزدە اكەم ءبىزدى بولاشاقتا "وزبەك" بولىپ كەتپەسىن دەپ، ءبارىن تاستاپ، قازاقستانعا كوشۋگە شەشكەن. "اكەمنىڭ ەڭ دۇرىس شەشىمى" وسى بولدى دەپ بىلەمىن. تاشكەنتتەگى ءۇيىمىزدىڭ قۇنى شىمكەنتتە جەر الۋعا عانا جەتكەن. جەرگىلىكتى قازاقتاردى كورە الماي جەكىرەتىن، ورالماندارعا اقشالاي بەرىلەتىن "كۆوتانى" الۋ ءۇشىن دە اكەم جۇزدەگەن كەرەكسىز قۇجات جيناپ، كۆوتانىڭ ءبىر بولىگىن كوش-قون قىزمەتكەرىنە امالسىز بەرۋىنە تۋرا كەلگەن. ول كەزدە بالا ەدىم. كوپتى تۇسىنبەيتىنمىن. بىراق اكەمنىڭ سونى ايتىپ، ءبىر اشۋلانعانى ەسىمدە. قازىر ول كوررۋپتسيا بيىكتىڭ بيىگىنە جەتىپ ۇلگەردى. ودان ارى باراتىن نۇكتەسى قالمادى.

ەلدە باستاپقىدا قيىن بولعان بولسا دا، كونىپ، بەيىمدەلىپ، ءوسىپ، بۇگىنگى دەڭگەيگە دەيىن جەتتىك. اعام - وفيتسەر، قارىنداسىم دا، مەن دا جوعارى ءبىلىم الدىق. جۋرناليستيكاعا دەن قويىپ، ادىلدىك پەن تەڭدىك ءۇشىن كۇرەسۋگە از دا بولسا ات سالىسقانىم بار. ءبىر سوزبەن ايتقاندا، جۇمىس ىستەپ، قولدان كەلگەنشە العا ۇمتىلىپ، اكە-شەشەمىزدى قۋانتىپ ءجۇرمىز. قازاق بولىپ قالۋ ءۇشىن قازاقستانعا كوشكەن ەدىك. ەندى ابسۋرد بيلىكتىڭ مىناداي قىلىقتارى قازاق بولىپ قالۋ ءۇشىن "ەلدەن كوشۋ" سياقتى ويعا بارۋعا يتەرمەلەيدى ەكەن.

"بىراق سەن بولماساڭ، كىم؟" دەگىم دە كەلەدى. ارقايسىمىز بولماساق، كىم ابسۋرد بيلىكپەن كۇرەسەدى. كىم ءسوز بوستاندىعى ءۇشىن، ازات تاڭداۋ پەن اشىق بيلىك ءۇشىن كۇرەسەدى؟

P.S. ءبىر نارسە انىق، مۇنداي ابسۋدريزم كوپ ۋاقىتقا دەيىن جالعاسىن تاپپايدى. ميتينگتەر جالعاسا بەرەدى. پوليتسيا قىزمەتكەرلەرى ولاردى قۇرىقتاي بەرەدى. بىراق ول كوپكە بارمايدى. ءبارىبىر حالىقپەن ساناسۋعا تۋرا كەلەدى. بيلىكتىڭ ودان باسقا امالى جوق. ودان باسقا جولى دا جوق. بار. تەك كەتۋدى ۇيعارسا ... ال ونداي تولىق ءترانزيتتى كورىپ تۇرعان جوقپىز!!!

جولداس ورىسباەۆتىڭ facebook پاراقشاسىنان

Abai.kz