بۇگىن سۋ جاڭا ءتورايىم داريعا نازارباەۆانىڭ توراعالىعىمەن پارلامەنت سەناتىنىڭ جالپى وتىرىسى بولىپ ءوتتى.

ونداعى باستى وقيعا كۇندە ورىن الا بەرمەيتىن تۇراقتى كوميتەت توراعاسىن سايلاۋ بولدى.

باق وكىلدەرى مەن سەناتورلار جاقىندا عانا بوساعان حالىقارالىق قاتىناستار، قورعانىس جانە قاۋىپسىزدىك تۇراقتى كوميتەتىنىڭ توراعالىعىنا كىمنىڭ كانديداتۋراسى ۇسىنىلاتىنىن اسىعا كۇتتى.

پالاتا دەپۋتاتتارىنىڭ الدىندا داريعا نۇرسۇلتانقىزى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ توراعالىعىنا سەناتور مۇحتار ابرارۇلى قۇل-مۇحاممەدتىڭ كانديداتۋراسىن ۇسىندى.

بۇرىن ەلباسىنىڭ ءباسپاسوز حاتشىسى، پرەزيدەنت اكىمشىلىگى باسشىسىنىڭ ورىنباسارى، مينيستر، وبلىس اكىمى، مەملەكەتتىك حاتشى قىزمەتتەرىن اتقارعان تانىمال قايراتكەردىڭ كانديداتۋراسىن سەناتورلار ءبىراۋىزدان قولدادى.

ەل الدىندا بەدەلى زور، ۇلتجاندى ازامات مينيستر بولىپ قىزمەت ىستەگەندە «مادەني مۇرا» باعدارلاماسى مەن «قازاقتىڭ 1000 ءانى»، «قازاقتىڭ 1000 كۇيى» جوبالارىن جۇزەگە اسىرعان مۇحتار ابرارۇلىنىڭ بۇل سايلانۋىن ونىڭ ۇلكەن ساياساتقا قايتا ورالۋى رەتىندە باعالاعان ءجون. سوندىقتان ونىڭ جاڭا قىزمەتىنەن ءبىز دە جاقسىلىقتار كۇتەمىز.

Abai.kz