ناۋرىز مەرەكەسىنىڭ الدىندا عانا ەلىمىزدىڭ پارلامەنتى ەلباسىنىڭ اتىن ماڭگىلىككە ەستە قالدىرۋ ماقساتىمەن وبلىس ورتالىقتارىنداعى باستى كوشەلەرگە نۇرسۇلتان نازارباەۆتىڭ ەسىمىن بەرۋ تۋرالى شەشىم قابىلداعانى بەلگىلى.

الايدا، ءبىزدىڭ كەيبىر شەنەۋنىكتەرىمىز قاشاندا جاقسى باستامانى ناۋقاندىق دارەجەگە دەيىن قۇلدىراتىپ، قايتسە دە كوزگە ءتۇسىپ قالۋ ءۇشىن اسىعىستىققا سالىنىپ، تالاي يگى شارالاردىڭ ءوڭىن اينالدىرىپ، حالىقتى ءارى-ءسارى كۇيگە تۇسىرەتىنى ايتىلا دا، جازىلا دا جاۋىر بولعان تاقىرىپ. دەگەنمەن مۇنداي جاندار  وزدەرىنىڭ شالا ىستەرىنەن ەش ۋاقىتتا قورىتىندى شىعارعان ەمەس.

قوستاناي قالاسىنىڭ شەنەۋنىكتەرى  بۇل جولى دا ەرەكشە كوزگە ءتۇسىپ قالدى. ولار «تۇڭعىش پرەزيدەنتىمىزدىڭ اتىن كوشەگە بەرۋ كەرەك» دەگەن دۇرىس باستامانىڭ ءوڭىن اينالدىرىپ، وبلىس ورتالىعىنداعى حالقىمىزدىڭ باس اقىنى اباي حاكىمنىڭ داڭعىلىن ەشبىر ويلانباستان «نۇسۇلتان داڭعىلى» دەپ وزگەرتىپ تاستادى. ءبىزدىڭ پايىمداۋىمىزشا، بۇلارعا جوعارى جاقتان «سەندەر مىندەتتى تۇردە اباي كوشەسىن وزگەرتىڭدەر» دەگەن ەشبىر ماعىناسىز نۇسقاۋ كەلىپ تۇسپەگەنى اقيقات. مۇنداي ورەسكەل قىلىق - قوستانايلىق شەنەۋنىكتەردىڭ وزدەرىنىڭ ويلاپ تاپقان «جاڭالىعى».

ويتكەنى، كوشە اتتارىن وزگەرتۋدىڭ بۇدان باسقا دا نۇسقالارى جەتەرلىك ەدى. ماسەلەن، سول اباي داڭعىلىمەن قاتار گوگول اتىنداعى كوشە دە ءدال ورتالىقتا ورنالاسقان. قوستانايدىڭ اكىم قارالارىندا ەس بولسا بىردەن ابايعا اۋىز سالماي، گوگولدى تاڭداۋىنا ابدەن بولاتىن ەدى. ءسويتىپ، ەكى قوياندى ءبىر وقپان اتىپ الار ەدى. نۇرسۇلتان ەسىمى ورتالىقتان ورىن الار ەدى دە، قيسىنى كەلگەندە گوگول سەكىلدى كەڭەستىك داۋىردەن قالعان ءبىر ەسىمنەن قۇتىلار ەدىك. ال بۇل كوشەدە «نۇر وتان» پارتياسى وبلىستىق فيليالىنىڭ ەڭسەلى كەڭسەسى ورنالاسقان. سونداي-اق قالامىزداعى اسەم عيماراتتاردىڭ ءبىرى - قازاق-فرانتسۋز ورتالىعى دا الىستان كوز تارتادى. ءتىپتى وسىنداعى ورتالىق ساياباققا دا وسى كوشەمەن تەز جەتەسىز. قىسقاسى، كورشىمىزدىڭ گوگول دەگەن جازۋشىسى ءوزىمىزدىڭ ابايدان ارتىق ەمەس ەكەنىن كۇللى جۇرتقا بايقاتار ەدىك.

مىنە، بىزدەگى شەنۋنىكتەرىمىزدىڭ شالالىعىنان ابايدان ايىرىلىپ قالا جازدادىق. حاكىم اباي كەزىندە شولاق ويلى قازاقتاردان ءبىر تاياق جەپ ەدى، ەندى تاعى ءبىر اۋىر سوققىنى قوستاناي شەنەۋنىكتەرىنەن الىپ وتىر. سوندا قالاي، مۇنداعى قوستاناي قالالىق ونوماستيكا كوميسسياسىنداعىلار «اباي تەك سەمەيگە عانا قاتىستى، ال قوستانايدا كوشەسى بولماسا دا، ەشتەڭە قيراپ قالماس» دەگەن ويعا كەلگەن بە؟ نە سەبەپتى بۇكىل رەسپۋبليكادا تەك قوستاناي عانا جالعىز ابايعا اۋىز سالىپ وتىر؟

ايتەۋىر، ابىروي بولعاندا رەسپۋبليكالىق ونوماستيكا كوميسسياسى مۇنداي اسىعىستىققا توقتاۋ سالىپ، تولە بي، ابىلقايىر سىندى تۇلعالارمەن قاتار، قازاقتىڭ جالعىزى -  اباي حاكىمنىڭ ەسىمىن وگەرتپەي، بوتەن كوشەلەردى قاراستىرۋ تۋرالى شەشىپ قابالداپ، ءبىر ابىرويسىزدىقتان امان قالدىق.

تەك ءبىر اتتەگەنايى، جارايدى جاڭا عانا تاعايىندالعان قالا اكىمى قايرات احمەتوۆ كوزگە ءتۇسىپ قالۋ ءۇشىن اسىعىستىققا سالىنسىن دەلىك، الايدا اناۋ باتىس وڭىردە تۋىپ-ءوسىپ، قازاقى تاربيە العان وبلىس اكىمى ارحيمەد مۇقانبەتوۆتىڭ بۇعان توقتاۋ ايتىپ، ماسەلەنى بايىپتىلىقپەن شەشۋگە كەڭەس بەرە الماعانى ويلاندىرماي قويمايدى. ال، جالپى مۇنداي اسا ماڭىزدى ماسەلەنى قالا اكىمى وبلىس اكىمىمەن اقىلداسپاي شەشەدى دەگەنگە ەشكىم دە سەنبەيدى. دەمەك، بۇل بارىمىزدەن كەتكەن اعاتتىق ەكەنى داۋسىز اقيقات.

مىنە، ءسويتىپ، ايدىڭ كۇننىڭ امانىندا ابايدان ايىرىلىپ قالا جازدادىق..

ەندى قازىر قوستانايدىڭ شەنەۋنىكتەرى نە ىستەپ وتىر دەيسىز عوي؟ وزدەرىنىڭ اسىعىستىققا سالىنىپ، اسىرا سىلتەگەندەرىن جۋىپ-شايماق ماقساتىمەن «بۇل جولى حالىقتىڭ تالقىسىنا سالىپ، زاڭ جولىمەن شەشەمىز» دەپ ايداي الەمگە جار سالىپ وتىر. ەندى قازاعىنان ورىسى كوپ قوستانايدا نۇرسۇلتان نازارباەۆ اتىنا كوشە بەرۋ ءىسى قيىنداپ كەتۋى دە مۇمكىن. ورىس اعايىندار ءبىز ايتىپ وتىرعان گوگولدى وزگەرتۋگە ءبىراۋىزدان قارسى تۇرسا، ارحيمەد باستاعان اكىمدەر قايتەر ەكەن؟

ەندىگى ساۋال وسى!

جايبەرگەن بولاتوۆ

Abai.kz