اقتوبە وبلىسىنىڭ سولتۇستىك-باتىسىندا ورنالاسقان قوبدا اۋدانىندا ەلباسى نۇرسۇلتان نازارباەۆتىڭ الەۋمەتتىك باستامالارى مەن سارابدال ساياساتى تابىستى ءارى ءساتتى تۇردە جۇزەگە اسىرىلۋدا. بۇل تۋرالى «Nur Otan» پارتياسى توراعاسى ءبىرىنشى ورىنباسارى ماۋلەن اشىمباەۆتىڭ اقتوبە وبلىسىنا ساپارى كەزىندە بەلگىلى بولدى.

ساپار بارىسىندا پارتيا توراعاسىنىڭ ورىنباسارى ماۋلەن اشىمباەۆ قوبدا اۋدانىنا ارنايى ساپارمەن بارىپ، ەلباسى اقپان ايىنىڭ سوڭىندا وتكەن پارتيانىڭ كەزەكتى XVIII سەزىندە انىقتاپ بەرگەن «اۋىل – ەل بەسىگى» جانە «قۇتتى مەكەن» الەۋمەتتىك ءىرى جوبالارى اياسىندا اتقارىلعان جۇمىستارمەن تانىستى.

اتاپ ايتقاندا، ول قوبدا اۋىلىنداعى دەنە شىنىقتىرۋ جانە ساۋىقتىرۋ كەشەنىندە بولدى. زامان تالاپتارىنا ساي سالىنعان بۇل سپورت نىسانىندا باسسەين، فيتنەس جانە جاتتىعۋ زالى، فۋتبول، ۆولەيبول، باسكەتبول الاڭدارى بار. ەلباسىمىز نۇرسۇلتان نازارباەۆ ۇنەمى سالاۋاتتى ءومىر سالتىن ۇستانۋ جايلى ايتىپ جۇرەدى. قازاقستان حالقىنىڭ ساۋ دەنەلى ءارى سالاۋاتتى ءومىر ءسۇرۋى ءۇشىن سپورتپەن اينالىسۋ اۋاداي قاجەت. ەلباسىنىڭ وسى باستاماسىنا ساي، مەملەكەتىمىزدىڭ ءار وڭىرىندە ءتۇرلى سپورتتىق نىساندار سالىنىپ، وڭىردەگى تۇرعىنداردىڭ ءوزى قالاعان سپورت تۇرىمەن الاڭسىز اينالىسۋىنا جاعداي جاسالعان. سول سەكىلدى، قوبدا اۋدانىندا دا جەرگىلىكتى تۇرعىنداردىڭ تۇرمىس ورەسىن ءوسىرىپ، سالاۋاتتى ءومىر سالتىن ۇستانۋىنا نەگىز قالاۋ ماقساتىندا جوعارىدا ءبىز اتاپ وتكەن سپورتتىق نىساندار سالىنىپ، پايدالانۋعا بەرىلىپ وتىر.

سونداي-اق پارتيا توراعاسىنىڭ ءبىرىنشى ورىنباسارى ي.تايمانوۆ اتىنداعى قوبدا گيمنازياسىنا ات باسىن بۇرىپ، اۋداننىڭ «رۋحاني جاڭعىرۋ» جوبالىق كەڭسەسىندە، پارتيالىق جوباسى اياسىندا اشىلعان ءىت-سىنىپتا جانە مەكتەپ اسحاناسىندا بولدى.

ودان بولەك، كاسىپكەرلىككە بەت بۇرعان بەلسەندى اۋىل جاستارىمەن كەزدەسكەن ماۋلەن اشىمباەۆ ەلدىڭ بولاشاعى جاس بۋىننىڭ قولىندا ەكەنىن ايتتى. پارتيا توراعاسىنىڭ ءبىرىنشى ورىنباسارىنىڭ ايتۋىنشا، "ەلدىڭ ەرتەڭى، مەملەكەتتىڭ بولاشاعى - بۇگىنگى جاستار قاۋىمى". سول ءۇشىن ەلىمىزدە جاستارعا جوعارى دەڭگەيدە كوڭىل ءبولىنىپ وتىر. ونىڭ ايقىن مىسالى، 2019 جىل ەلباسى نۇرسۇلتان نازارباەۆتىڭ ۇسىنىسىمەن "جاستار جىلى" بولىپ جاريالانىپ وتىر.

– جاستار ارمانشىل بولۋى كەرەك. كوزدەگەن ماقساتقا جەتۋ ءۇشىن قاجىرلى ەڭبەك پەن تاباندىلىق قاجەت. ەلباسى جاستاردىڭ زامانعا ساي دامۋىنا بارلىق جاعدايدى جاساپ بەردى، – دەدى پارتيا توراعاسىنىڭ ءبىرىنشى ورىنباسارى.

سونىمەن بىرگە ماۋلەن اشىمباەۆ اقتوبە قالاسىنداعى ەرەكشە تالاپتاردى قاجەت ەتەتىن جاندارعا ارنالعان «Coworking space» ورتالىعىندا بولدى. «كەدەرگىسىز كەلەشەك» پارتيالىق جوباسى اياسىندا اشىلعان بۇل ورتالىق مۇمكىندىگى شەكتەۋلى جاندارعا قىزمەت كورسەتەدى.

ورتالىق جۇمىسىن ۇيلەستىرۋشى، «الاش» مۇگەدەكتەر قوعامىنىڭ توراعاسى الىبەك ەلەۋسىزوۆتىڭ ايتۋىنشا، مۇندا مۇمكىندىگى شەكتەۋلى جانداردىڭ شىعارماشىلىقپەن اينالىسىپ، ءوز مۇمكىندىكتەرىن دامىتۋعا جانە ءتۇرلى الەۋمەتتىك جوبالاردى جۇزەگە اسىرۋعا قاجەتتى بارلىق جاعداي جاسالعان. بۇدان باسقا، ورتالىقتا قامكوڭىل جانداردىڭ بوس ۋاقىتتارىن ءتيىمدى وتكىزۋلەرىنە ارنالعان كىتاپحانا جۇمىس ىستەيدى. ءتىپتى شاحمات، توعىزقۇمالاق، دويبى ويناپ، مۋزىكالىق اسپاپتارمەن كوڭىل كوتەرۋگە دە مول مۇمكىندىك بار.

مۇنداي ورتالىقتاردىڭ كەز كەلگەن قوعام ءۇشىن ماڭىزى زور ەكەنىن ايتقان پارتيا توراعاسىنىڭ ءبىرىنشى ورىنباسارى ەلىمىزدە مۇمكىندىگى شەكتەۋلى جاندار ءۇشىن «كەدەرگىسىز ورتا» قالىپتاستىرۋ ەلباسىنىڭ تىكەلەي تاپسىرماسى ەكەنىن جەتكىزدى.

– «Nur Otan» پارتياسى بۇل سالادا مۇمكىندىگى شەكتەۋلى جانداردىڭ ينكليۋزيۆتى ءبىلىم الۋىنا، ولاردىڭ جۇمىسقا ورنالاسۋىنا، ساياسي-قوعامدىق ءىس-شارالارعا بەلسەنە قاتىسۋىنا جانە قوعامدا كەدەرگىسىز ورتا قالىپتاستىرۋعا باعىتتالعان ناقتى باسىمدىقتار بويىنشا جۇمىس ىستەۋدە. بۇل ىستە اقتوبەدە اشىلعان وسىنداي ورتالىقتاردىڭ تيگىزەر اسەرى مول. سوندىقتان ونى ەلىمىزدىڭ بارلىق وڭىرىنە ۇلگى رەتىندە كورسەتەمىز، – دەدى ماۋلەن اشىمباەۆ.

ايتا كەتەيىك، «Nur Otan» پارتياسى توراعاسىنىڭ ءبىرىنشى ورىنباسارى ساپار بارىسىندا «حالىققا كومەك» جانە «باقىتتى وتباسى» جوبالارى بويىنشا دا وڭىردە قولعا الىنعان جۇمىستارمەن تانىستى. اتالعان الەۋمەتتىك جوبالاردى ەلباسى، پارتيا توراعاسى نۇرسۇلتان ءابىشۇلى نازارباەۆ پارتيانىڭ كەزەكتى XVIII سەزىندە انىقتاپ، ناقتى تاپسىرمالار بەرگەن بولاتىن.

Abai.kz