كەشە قازاقستان حالقى اسسامبلەياسى توراعاسىنىڭ ورىنباسارى - قر پرەزيدەنتى اكىمشىلىگى قحا حاتشىلىعىنىڭ مەڭگەرۋشىسى جانسەيىت تۇيمەباەۆ الماتىدا قازاقستان كورەيلەرى قاۋىمداستىعىنىڭ بەلسەندىلەرىمەن كەزدەستى.

كەزدەسۋگە قازاقستان كورەيلەرى قاۋىمداستىعىنىڭ بەلسەندىلەرى، تەاتر ارتىستەرى، قحا جاستار ۇيىمدارى، قوعام وكىلدەرى قاتىستى.

ءىس-شارا مەملەكەتتىك رەسپۋبليكالىق اكادەميالىق كورەي مۋزىكالىق كومەديا تەاترىنىڭ شىعارماشىلىق ۇجىمىمەن كەزدەسۋدەن باستالدى. وعان قاتىسۋشىلار «ناۋرىز» مەرەكەسىنە ارنالعان تەاترلاندىرىلعان  قويىلىمدى تاماشالادى.

ودان كەيىن ءىس-شارا «Korean House» كورەي ۇيىندە قازاقستان كارىستەرى قاۋىمداستىعىنىڭ بەلسەندىلەرىمەن كەزدەسۋمەن جالعاستى. قوناقتارعا قازاقستان كارىستەرى قاۋىمداستىعىنىڭ قىزمەتى تۋرالى س. وگاي بايانداپ، قازاقستان كارىستەرى قاۋىمداستىعىنىڭ 15 جىلدىعىنا ورايلاستىرىپ سالىنعان مادەني ورتالىقتىڭ تاريحىمەن تانىستىردى.

الماتى كورەي ۇلتتىق ورتالىعىنىڭ قىزمەتى تۋرالى مول اقپارات بەرگەن ب. شين بۇگىنگى كۇنى ورتالىق ەلىمىزدە وتكىزىلەتىن رەسپۋبليكالىق جانە حالىقارالىق ءىس-شارالارعا بەلسەنە ارالاساتىنىن ايتىپ، مىسالدار كەلتىردى.

كەزدەسۋگە قاتىسۋشىلارعا 1923 جىلى نەگىزى قالانعان باسىلىم «كورە يلبو» گازەتىنىڭ رەداكتسياسىن ك. كيم تانىستىردى. ءوز سوزىندە ول «كورە يلبونىڭ» قازاقستانداعى ءىرى ەتنوستىق باسىلىمداردىڭ ءبىرى ەكەنىنە نازار اۋدارتتى.

جينالعانداردىڭ الدىندا سويلەگەن سوزىندە قازاقستان حالقى اسسامبلەياسى توراعاسىنىڭ ورىنباسارى كەزدەسۋدىڭ ماقساتى قازاقستان كارىستەرى قاۋىمداستىعىنىڭ قىزمەتىمەن تانىسۋ، الداعى كەزەڭدە بىرلەسە اتقارىلاتىن جۇمىستاردىڭ باعىتى مەن مىندەتتەرىن تالقىلاۋ ەكەنىن اتاپ كورسەتتى.

«قازاقستان كورەيلەرى رۋحتىڭ كۇش-جىگەرىنىڭ، بىرلىكتىڭ، ەڭبەك سۇيگىشتىكتىڭ ارقاسىندا بارلىق سىناقتاردان ءوتىپ، ەلىمىزدە تۇراتىن ەڭ ءىرى ون ەتنوستىڭ بىرىنە اينالدى» - دەدى ج. تۇيمەباۆ.

ول سونداي-اق، كورەي ەتنوسى قازاقستان حالقىنىڭ اجىراماس بولىگى رەتىندە ءبىزدىڭ تاۋەلسىز مەملەكەتىمىزدىڭ قالىپتاسۋى مەن دامۋىنا لايىقتى ۇلەس قوسىپ وتىرعانىن اتاپ ءوتتى.

سونىمەن قاتار، قحا توراعاسىنىڭ ورىنباسارى قازاقستان كورەيلەرى قاۋىمداستىعىنىڭ بىرقاتار باعىتتارى بويىنشا جۇمىسىن جانداندىرۋدىڭ ماڭىزدىلىعىن اتاپ ءوتتى. ولاردىڭ ىشىندە ەتنوسقا قوعامدىق سانانى جاڭعىرتۋ ۇدەرىسىنە تارتۋ، جاستار جىلىن وتكىزۋگە قاتىسۋ، جاستار ستارتاپتارىن قولداۋ جانە جاڭا الەۋمەتتىك تۇرعىدان قالىپتاستىرۋ، قايىرىمدىلىق سالاسىنداعى الەۋمەتتىك جۇمىس جانە كوپ بالالى وتباسىلاردى قولداۋ، قحا كاسىپكەرلەر قاۋىمداستىعىن نىعايتۋعا جاردەمدەسۋ بار.

انىقتاما ءۇشىن: قازاقستان كورەيلەرى قاۋىمداستىعى (قكق) الماتى قالاسىندا 1990 جىلى ناۋرىز ايىندا قۇرىلدى. وسى جىلدارى قكق ماتەريالدىق-تەحنيكالىق بازاسى قالىپتاستى، ناقتى ۇيىمدىق قۇرىلىمى، جاستار قوزعالىسى قۇرىلدى. 2015 جىلدان باستاپ قكق پرەزيدەنتى سەرگەي گەننادەۆيچ وگايدىڭ باسشىلىعىمەن شەتەلدىك كورەي ۇيىمدارىمەن حالىقارالىق ينتەگراتسيا بويىنشا جۇمىس جۇرگىزۋدە. جىل سايىن قكق رەسپۋبليكالىق جانە حالىقارالىق اۋقىمداعى 20-دان استام ءتۇرلى جوبالار مەن باعدارلامالاردى وتكىزدى.

Abai.kz