ەلباسى نۇرسۇلتان نازارباەۆ ءبىر جىل بۇرىن پرەزيدەنتتىڭ بەس الەۋمەتتىك باستاماسى دەپ اتالاتىن ۇندەۋ جاريالاعان بولاتىن. ونداعى باسپانا الۋ مەن جۇمىسشىلار جالاقىسىن كوتەرۋ، ءبىلىم الۋدىڭ قولجەتىمدىلىگىن ارتتىرۋ مەن شاعىن نەسيە بەرۋدى كوبەيتۋ جانە ەلدى گازبەن قامتاماسىز ەتۋ سىندى ءار باستاما حالىق تاراپىنان ۇلكەن قولداۋعا يە بولدى.

اسىرەسە، اتالعان باستاماداعى تۇرعىن ۇيگە قولجەتىمدىلىكتى ارتتىرۋ بويىنشا ءار وڭىردە ىرگەلى ىستەر اتقارىلدى. قازاقستان رەسپۋبليكاسى يندۋستريا جانە ينفراقۇرىلىمدىق دامۋ مينيسترلىگىنىڭ  مالىمەتىنشە، 2018 جىلى قازاقستاندا 12,5 ملن.شارشى مەتر تۇرعىن ءۇي پايدالانۋعا بەرىلگەن. بۇل دەگەنىمىز 113 مىڭنان استام وتباسى تۇرعىن ءۇي جاعدايىن جاقسارتتى دەگەن ءسوز. مينيسترلىكتىڭ سوزىنە سەنسەك، بىلتىر تۇرعىن ۇيلەردى پايدالانۋعا بەرۋ رەسپۋبليكانىڭ بارلىق وڭىرىندە ارتقان. ماسەلەن، ماڭعىستاۋدا – 1,4 ەسە، اتىراۋ، جامبىل، تۇركىستان وبلىستارىندا 1,2 ەسەدەن جوعارى بولعان.

بيىل دا ەلباسىنىڭ «7-20-25» باعدارلاماسى بويىنشا بىرقاتار  شارالار اتقارىلىپ جاتىر. بۇل تۋرالى قر ۇلتتىق بانك باسقارماسى مالىمدەدى. ۇلتتىق بانك مالىمەتىنشە، 2018 جىلعى 31 مامىرداعى № 107 قاۋلىسى نەگىزىندە تۇرعىن ءۇي كرەديتتەۋ باعدارلاماسى بەكىتىلگەن.

باعدارلاما مەملەكەت باسشىنىڭ تاپسىرمالارىن ىسكە اسىرۋ ماقساتىندا ازىرلەندى. جانە بىرنەشە تالاپتار بويىنشا يپوتەكالىق تۇرعىن ءۇي كرەديتتەۋدى كوزدەيدى. ياعني، جىلدىق سياقى مولشەرلەمە - 7%، باستاپقى جارنا - 20%، قارىز مەرزىمى – 25 جىلعا دەيىن.

بۇل باعدارلاماعا نەگىزىنەن قارىزدى كاسىپكەرلىك جانە (نەمەسە) ەڭبەك قىزمەتىنەن تابىس الاتىن، سونداي-اق مەنشىك قۇقىعىندا باسپانا يەلەنبەيتىن كەز كەلگەن قازاقستان ازاماتى الا الادى.

ال، «7-20-25» باعدارلاماسىنىڭ اۆتورلارى تۇرعىن ءۇيدىڭ قۇنىن قالاي انىقتادى؟

يپوتەكالىق كرەديتتەردى بەكىتۋدەگى نەگىزگى فاكتورلار تولەم قابىلەتتىلىگى مەن تۇراقتى تابىسى بولىپ تابىلادى. قازىرگى ۋاقىتتا بانكتىك ۇيىمدار قوسىمشا كريتەريلەردى وڭدەيدى. كريتەريلەردى ودان ءارى قاتايتۋ جوققا شىعارىلمايدى. بۇل تۇرعىن ءۇي ساتىپ الۋدى قاجەت ەتەتىن ادامدارعا (تابىسى از، تۇرمىسى ناشار وتباسىلار، جاس وتباسىلار جانە ت.ب.) ازاماتتار كەپىلدىككە يە بولۋى ءۇشىن قاجەت. ءۇشىنشى پاتەردى تالاپ ەتەتىن تابىس دەڭگەيى جوعارى ازاماتتار ارتىقشىلىقتى باعدارلامانى پايدالانا المايدى.

ساتىپ الىناتىن تۇرعىن ءۇيدىڭ ەڭ جوعارى قۇنى:

-نۇر-سۇلتان، الماتى قالالارى مەن ولاردىڭ قازاقستان رەسپۋبليكاسىنىڭ زاڭناماسىمەن بەلگىلەنگەن شەكارالار شەگىندەگى قالا ماڭى ايماقتارى، اقتاۋ، اتىراۋ، شىمكەنت ءۇشىن 25 ملن تەڭگە

-باسقا وڭىرلەر ءۇشىن – 15 ملن تەڭگە

قارىزدىڭ ەڭ جوعارى سوماسى:

-كەپىلدىك قامتاماسىز ەتۋ قۇنىنىڭ 80 %

جەكە تۇلعا باعدارلاما بويىنشا قارىز الۋ ءۇشىن مىناداي تالاپتارعا سايكەس كەلۋگە ءتيىس:

1.بانكتىڭ قالاۋى بويىنشا مىنا قۇجاتتىڭ بىرەۋىمەن:

- بىرىڭعاي جيناقتاۋشى زەينەتاقى قورىنىڭ جەكە زەينەتاقى شوتىنان سوڭعى التى ايداعى ءۇزىندى-كوشىرمەسىمەن;

- جۇمىس ورنىنان سوڭعى التى ايداعى كىرىستەرى تۋرالى انىقتامامەن;

- قارىز الۋشى-جەكە تۇلعانىڭ سوڭعى سالىق كەزەڭى ءۇشىن جەكە تابىس سالىعى بويىنشا سالىق دەكلاراتسياسىمەن;

- بانكتىڭ ىشكى قۇجاتتارىنا سايكەس يپوتەكالىق تۇرعىن ءۇي قارىزى شارتى بويىنشا قارىز الۋشىنىڭ مىندەتتەمەلەرىن ورىنداۋ مۇمكىندىگىنىڭ بولۋىن كورسەتەتىن وزگە دە قۇجاتتارمەن راستالعان ەڭبەك جانە (نەمەسە) كاسىپكەرلىك قىزمەتتەن الىناتىن كىرىسىنىڭ بولۋى;

1.كرەديتتىك بيۋرونىڭ كرەديتتىك ەسەبىمەن راستالعان باعدارلاما بويىنشا يپوتەكالىق تۇرعىن ءۇي قارىزدارى جانە وزگە دە يپوتەكالىق تۇرعىن ءۇي قارىزدارى بويىنشا وتەلمەگەن بەرەشەكتىڭ بولماۋى;

2.كەلەسىنى قوسپاعاندا قازاقستان رەسپۋبليكاسىنىڭ اۋماعىندا قۇقىقتىق كاداستر مالىمەتتەرىمەن راستالعان مەنشىك قۇقىعىنداعى تۇرعىن ءۇيدىڭ بولماۋى:

- ءاربىر وتباسى مۇشەسىنە پايدالى الاڭى 15 شارشى مەتردەن كەم جاتاقحانالاردا بولمەلەردىڭ بولۋى;

- قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن اۆاريالىق دەپ تانىلعان تۇرعىن ءۇي.

Abai.kz