بۇگىن قر ورتالىق سايلاۋ كوميسسياسى 2019 جىلدىڭ 9 ماۋسىمىنا تاعايىندالعان كەزەكتەن تىس پرەزيدەنت سايلاۋىنا كانديدات رەتىندە ءامىرجان قوسانوۆتى تىركەدى. 

ورتالىق سايلاۋ كوميسسياسى «ۇلت تاعدىرى» بىرلەسكەن ۇلتتىق-پاتريوتتىق قوزعالىسىنىڭ مۇشەسى، جۋرناليست ءامىرجان قوسانوۆتىڭ كانديداتتىق كۋالىگىن تاپسىردى.

قاۋلى جوباسى تۋرالى قازاقستان رەسپۋبليكاسى ورتالىق سايلاۋ كوميسسياسىنىڭ مۇشەسى اقىلبەك جامەلۇلى يحدانوۆ بايانداما جاسادى. ونىڭ ايتۋىنشا، بۇعان دەيىن ءا.قوسانوۆ مەملەكەتتىك ءتىلدى ەركىن مەڭگەرگەنىن راستادى. ال ورتالىق سايلاۋ كوميسسياسى ونى زاڭنىڭ بارلىق تالاپتارىنا ساي دەپ تانىدى. كانديدات قوسانوۆ قاجەتتى قولداردىڭ سانىن دا جيناپ شىقتى.

«حاتتامالاردىڭ ناتيجەلەرىنە سايكەس، قازاقستاننىڭ 14 وڭىرىنەن ءامىرجان ساعيدراحمانۇلى قوسانوۆتى پرەزيدەنتتىككە كانديدات رەتىندە قولدايتىن 131 189 ازاماتتىڭ قولى جينالدى، ولاردىڭ ىشىندە 129 582 قول راس بولىپ تانىلدى»، - دەدى يحدانوۆ.

«ورازانىڭ العاشقى كۇنى سايلاۋ كوميسسياسىنىڭ بىزگە كۋالىك بەرگەنىن جاقسى ىرىمعا بالاپ وتىرمىن. 7-ءشى ءنومىر ەكەن. مەن كۋالىكتى جەتىنشى بولىپ الىپ وتىرمىن. ونى دا جاقسىلىققا بالاپ وتىرمىن. جاسىراتىنى جوق، مەنى ۇسىنۋ جانە قول جيناۋ كەزىندە ءبىراز كۇمان بولدى. وسى قوسانوۆ سايلاۋعا تىركەلە مە، تىركەلمەي مە دەگەن كۇمان بولدى، ءارتۇرلى ارانداتۋلار بولدى. قاساقانا جاسالعان ءبىر اقپاراتتىق شابۋىلدار دا بولدى. وسى كۇنگە دەيىن مەن جانە مەنىڭ ارىپتەستەرىم تىركەۋ بولمايتىن شىعار دەپ ويلادىق. بىراق بۇگىنگى كۇن پرەزيدەنت قاسىم-جومارت توقاەۆتىڭ «ءادىل سايلاۋ وتكىزۋگە كەپىلدىك بەرەمىن» دەگەن ءسوزىنىڭ ءبىر نىشانى دەپ بىلەمىن، سولاي قابىلدايمىن»، - دەيدى ءا.قوسانوۆ.

Abai.kz