رامازان ايىندا مۇسىلماندار وتىز كۇن اۋىز بەكىتىپ، تاڭنان قارا كەشكە دەيىن اش جۇرەدى. وسىعان وراي ورازا ۇستاۋعا ۇگىتتەگەن جانە ونىڭ شاراپاتى مەن ساۋابى تۋرالى ۋاعىز-ناسيحات كوبەيەدى. بىراق وسى جەردە ءبىر ماسەلە بار. سمارتفون ۇستاعان قازاق جۇرتى قازىر الەم حالقىمەن ارالاسىپ، الۋان ءتۇرلى ءدىن مەن مادەنيەتتى تانىعان سايىن، يسلامنىڭ اۋىر شارتتارىن باسقاشا پايىمدايتىن بولدى. ورازاعا قاتىستى كوزقاراسى دا وزگەرگەن. عىلىمعا سۇڭگىگەن جاستار الدىڭعى اعالارى سياقتى بۇل قۇلشىلىققا قۇلشىنىپ تۇرمايدى. كوبى ونى كەرەكسىز دەپ بىلەدى. ولاردى ابدەن تۇسىنەم. سەبەبى ۆيكتور فرانكل ايتقان «مورالدىق تانىم» ەسكىردى. ناقتى عىلىمنان ءنار الىپ، قۇبىلىستىڭ تۇپكى ناتيجەسىن ۇعىنىپ، ءار نارسەنىڭ سوڭعى شەشىمىن عىلىممەن ءتۇيىپ ۇيرەنگەن ساۋاتتى جاستار «ورازا ۇستاساڭ كۇناڭدى جويىلادى»، «ورازا ۇستاساڭ پەيىشكە كىرەسىڭ. حور قىزدارىن قۇشاسىڭ»، «اۋىز بەكىتپەسەڭ راببىمىز سەنى وتقا قاقتايدى» دەگەن سياقتى جۇپىنى ۋاعىزدى قابىلداي المايدى. مۇنداي ۋاعىز ولاردىڭ جۇيكەسىن جۇقارتىپ، مازاسىن قاشىرۋى مۇمكىن. ۋاعىز ايتىپ جىنىنا تيە بەرسەڭ، وزىڭمەن قوسىپ ءدىنىڭدى دە جەتى قىردان اسىرىپ بوقتاپ تاستاۋى بەك مۇمكىن.

سوندىقتان، ورازا تۋرالى باسقاشا ويتولعاپ كورۋ كەرەك. لوگوتەراپياعا سۇيەنىپ، سۇراقتى بىلاي قويالىق: وتىز كۇن اش ءجۇرۋدىڭ حيكمەتى نە؟ ۇلىق اللا اشتىقتى نە ءۇشىن پارىز ەتىپ جۇكتەدى؟ اشتىق ۇستاپ، كۇنى بويى قالجىراپ ءجۇرۋدىڭ جەكە باسقا نەمەسە قوعامعا قانداي پايداسى بار؟ ءتاڭىرى تاعالانىڭ وسى ءامىرىن بۇلجىتپاي ورىنداساق راسىمەن دە سانادا وڭ وزگەرىس بولا ما؟ پايعامبار نەلىكتەن ورازانىڭ شاراپاتى تۋرالى حاديستەردى كوپ ايتقان؟

لوگوتەراپيا ءبۇي دەيدى. ادام - رۋحاني بولمىس. ءتۇپتىڭ تۇبىندە كىسىنىڭ تاعدىرىن ءومىر ساحناسىندا وسى تابيعاتى انىقتايدى. ياعني رۋحاني بولمىس قانشالىقتى قايرات كورسەتىپ ايقاسادى، تاعدىرى سونشالىقتى حيكمەتپەن ورىلەدى. جاراتىلىسى بويىنشا قۇمارلىق دەگەن قىزىل يت رۋحتىڭ باقىلاۋىندا تۇرۋى ءتيىس. رۋح ماقسات-مۇراتىنا جەتۋ ءۇشىن قۇمارلىقتى قۋات كوزى رەتىندە ءساتتى قولدانعان سايىن، كىسى بالاسى اقىلدى تۇلعاعا اينالادى. قۇمارلىقتى دىندە ءناپسى دەيدى. ءدىني مازمۇندا ماعىناسى تىم كەڭ جانە وتە تەرەڭ. لوگوتەراپيا وعان اكادەميالىق انىقتاما بەرەدى. ءناپسى دەپ ينستينكت ارقىلى ادامدى راقاتقا تارتاتىن فيزيولوگيالىق جانە پسيحولوگيالىق يمپۋلستەردىڭ قايناعان قۋات كوزىن ايتادى. بۇل قۋاتتى يمپۋلستەردى رۋح اسقان سەرگەكتىكپەن باسقارىپ، قۇندىلىق وندىرەتىن مادەني سالاعا جەگىپ وتىرماسا، كورسوقىر قۇمارلىق پەندە شىركىندى تاقىرعا وتىرعىزادى. پەندە پاقىر ادام دەگەن ابىرويلى اتىنان تابان استىندا ايرىلىپ قالادى. ادام مەن ايۋان دا وسى نۇكتەدە اجىرايدى. جان-جانۋاردى ينستينكت جەتەككە العان. ونىڭ ۇستىنەن اقىلدى رۋح ارالاسىپ، كىرىسىپ، باسقارىپ تۇرمايدى. سوندىقتان ايۋاندى قۇمارلىعى قالاي سۇيرەسە، سولاي قاراي جۇرە بەرەدى. ول ءۇشىن ونى ەشكىم كىنالامايدى.

ادام – قۇمارلىعى تۇلا بويىن قىسقان كەزدە وعان «جوق!» دەپ ايتا الاتىن جالعىز تىرشىلىك يەسى. نەمەسە ءناپسىنى اقىلى شەگىنە دەيىن ەركىنە جىبەرىپ قاداعالاي الادى. (مىسالى كۇندەلىكتى ءىشىپ-جەمىن، نەكەلى جارىمەن ادالىمەن ويناپ-كۇلۋىن ساۋاتتى جولمەن رەتتەپ وتىرۋ) نەعۇرلىم ءناپسىنى قاتاڭ قاداعالاسا، سوعۇرلىق تۇلعالىق يدەنتيفيكاتسياسى ابىرويلى قالىپتاسادى. ياعني ءناپسىسىن يت سياقتى جەتەككە العان تاستاي تاقۋا، قىزىق پەن قۇمارلىققا جەڭىلگەن قالىڭ توپتان دارالانىپ تۇرادى. ال، جان-جانۋاردى مۇنداي ادىسپەن يدەنتيفيكاتسيا جاساي المايسىڭ. ولاردى تەك اسىل تۇقىمىنا قاراپ باعالايسىڭ. ايۋاندى باسقاشا باعالاۋ مۇمكىن ەمەس. وسىعان قاراپ ادامدا ەركىندىك نىعمەتى بارىن بىلەمىز.

ەركىندىك ادامعا وزالدان دارىعان قاسيەت. ونى دىندە «ادامنىڭ باسىنداعى التىن تاجى - ەركىندىگى» دەپ اسپەتتەپ جاتادى. بىراق قۇمارلىققا ءوز ەركىمەن جەڭىلگەن ساتىندە ادام وسى نىعمەتىنەن تابان استىندا ايرىلادى. سول كەزدە پەندە بايعۇس ماقاۋ ماقۇلىققا ۇقساپ قالادى. شىندىعىندا ەشكىم دە «مەنى قۇمارلىق ەركىمنەن تىس بيلەپ الدى» دەي المايدى. قۇمارلىق تۇلا بويدى قوزدىرىپ، اقىلىڭدى شىرماۋ ءۇشىن اۋەلى ەركىندىك  الاڭىن كەسىپ ءوتۋى كەرەك. بولمىستىڭ مەحانيزمى سولاي جاسالعان. ياعني ادام ءوزى وعان «ءيا، بيلەپ توستەي بەر» دەپ كەلىسىم بەرمەيىنشە قۇمارلىق قۇتىرىنا قوزبايدى. ادام ءوزى «ماقۇل، جارايدى!» دەپ كەلىسكەن ساتتەن باستاپ، قۇمارلىق ونىڭ تۇلا بويىن قالشىلداتىپ، تامىرلارىن بۇلكىلدەتىپ، ساناسىن تۇمشالاپ اكەتە جونەلەدى.

ەركىندىك پەن قۇمارلىق تارازى باسىندا تەڭ تۇر. قاي جاعى باسادى، سوعان سايكەس ادامنىڭ تۇلعالىق سۋرەتى سىزىلادى. ياعني قاھارمانداردى وسىعان قاراپ ۇلىقتايمىز. قاي تۇلعا قۇمارلىعىن اۋىزدىقتاپ، ەركىندىگىن ەلىنىڭ باعى ءۇشىن ءتيىمدى پايدالانسا، سونىڭ اتىن تاريحقا التىن ارىپپەن جازادى. كەرىسىنشە ەركىندىگىن قولدان بەرىپ، قۇمارلىعىن قاندىرۋ ءۇشىن قارا حالىقتىڭ قانىن ىشسە «اتىڭ ءوشسىن، اتىڭ وشكىر» دەپ ولگەنشە قارعايدى.
قوماعاي قۇمارلىق پەن تويىمسىز ءناپسى ادامدى ءتۇرلى شارتتارعا ماتاپ، اياعىن تۇساپ تۇرادى. مومىننىڭ مىندەتى وسى ارادا ايقىن. قالايدا وسى قۇرساۋدى بۇزىپ ءوتىپ، وزەكتەگى ءوزىن عايىپقا سامعاتۋى كەرەك. ونى عىلىمدا «ترانستسەندەنتسيا جاساۋ» دەيدى. ماعىناسى بولمىستىڭ دامۋ جولىن تاڭىرلىك الەمگە قاراي باعىتتاۋ. ياعني قاس تاقۋا كىرپىش ءتانى مەن پسيحولوگيالىق قاباتىنان بوساپ شىعۋى كەرەك. وسى كۇرەستى تۇراقتى جۇرگىزگەن تاقۋاعا قايسار رۋح دەگەن تەرمين قولدانامىز. قايسار رۋح قانا ادامدا ەركىندىك بارىن ايگىلەپ تۇر. ول ەركىن بولعاندىقتان دا ينستينكت قالاۋىنا قارسى تۇرا الادى.

وتىز كۇن ورازا بولمىستا بار ەركىندىك نىعمەتىن پراكتيكادا قولدانىپ كورۋگە مۇمكىندىك بەرەدى. قانشا جەردەن قينالىپ، نەشە جەردەن ءتىلىڭ اۋزىڭا سيماي قاتالاپ وتىرساڭ دا وزىڭە ءوزىڭ قارسى شىعىپ «جوق» دەپ وتىرا بەرەسىڭ. جوق – دەگەن سايىن ءوزىڭدى ونتولوگيالىق تۇرعىدا ماڭگىلىك بولمىس ەكەنىڭدى سەزىنەسىڭ. ءار كۇن بىتكەن سايىن جاۋدى جەڭگەن باتىر قۇساپ مارقايىپ قالاسىڭ.

ۆ. فرانكلدىڭ وسى ويلارىن ورازا جايلى مىناداي تاماشا قيسسامەن تۇيىندەۋگە بولادى:
ءبىر كۇنى مۇسا تۇر تاۋىندا تۇرىپ:
– ءيا، اللا، مەن عوي سەنىمەن تىكەلەي تىلدەسىپ تۇرمىن. ساعان مەنەن دە جاقىن كەلەتىن قۇلدارىڭ بار ما؟ – دەپ سۇرادى. اللا:
– ءاي، مۇسا، ءوزىڭدى ماعان جاقىن تۇرمىن دەپ ويلايسىڭ با؟ ءدال قازىر ەكەۋمىزدىڭ ارامىزدا جەتپىس مىڭ قابات پەردە ءبولىپ تۇر. سەن مەنىڭ قۇدىرەتىممەن عانا داۋىسىمدى ەستىپ تۇرسىڭ. ماعان سەنەن دە جاقىن كەلەتىن قۇلدارىم بار، – دەپ جاۋاپ بەردى. مۇسا:
– ولار كىمدەر؟ – دەدى. ۇلىق اللا:
– اقىردىڭ سوڭىندا مۇحامبەت اتتى ەڭ سوڭعى سۇيىكتى پايعامبارىم دۇنيەگە كەلەدى. ونىڭ ۇمبەتى ەڭ قيىن كەزدە حاقتىڭ جولىن ۇستانادى. اپتاپ ىستىقتا وتىز كۇن ورازا ۇستايدى. اۋىزاشارعا جينالعاندا، ولاردىڭ داستارقانىندا سان ءتۇرلى ءدامدى تاعام سامساپ تۇرادى. بىراق ولار قاتالاپ، قارنى اشسا دا، كۇن باتپاي اۋىزىن اشپايدى. مەنىڭ رازىلىعىمدى تابۋ ءۇشىن، مول داستارقانعا قول سوزبايدى. سول كەزدە مەنىڭ راحمەتىم مەن شاراپاتىم ولارعا بارىنشا جاقىنداي تۇسەدى، – دەپتى. مۇسا تاڭ قالىپ ۇيىنە قايتتى.

راسىمەن دە ءححى عاسىر مۇسىلمانى شىجىعان ىستىقتا اۋىز بەكىتەدى. كەشكە اۋىزاشاردا داستارقاندا جوق نارسە جوق. سوندا دا كۇن ۇياسىنا باتقانشا ءوزىڭدى تەجەپ، اۋىزدىقپەن الىسقان اساۋ قۇساپ، ءوز وزىڭمەن ارپالىسىپ وتىراسىڭ. ارپالىس ارتقان سايىن ءوزىڭدى تاڭىرلىك ءبىر كۇشكە قول جەتكىزگەن اۋليە سياقتى سەزىنىپ، شابىتتانىپ جۇرەسىڭ.

ءدىن پسيحولوگياسىندا «راتسيونالدى دىندارلىق» دەگەن تۇسىنىك بار. ول نە؟ ول دىنگە يمانمەن ەمەس، تازا لوگيكامەن جاقىنداۋ. كوزى اشىق كىسىلەر پراكتيكالىق تۇرعىدا ءدىننىڭ پايداسىن تازا اقىلمەن تارازىعا تارتادى. ەگەر زيانى از، پايداسى مول بولسا ءدىندى تۇتىنىپ، كەي شارتتارىن ءومىر سالتىنا ەنگىزەدى. ەندى تاقىرىپقا وسى تاراپتان ءتۇسىپ كورەلىك. يۋۆال ءحاراريدىڭ «قۇداي ادام» (Homo Deus) ەڭبەگىندە مىناداي دەرەك بار. تاريحتا بەرتىنگە دەيىن «تويىپ تاماق جەمەۋ» دەگەن ادامزاتتىڭ باس اۋرۋى بولدى. الىسقا بارماي-اق كۇنى كەشە دۇنيە سالعان اكەمىز 1955 جىلداردان باستاپ قانا تويىپ اس ىشكەنىن ەموتسيامەن اڭگىمەلەپ وتىراتىن. ءالى دە اشتىق بولۋى مۇمكىن دەگەن قاۋىپپەن ولە-ولگەنشە ناننىڭ قالدىعىن كەپتىرىپ، قاپقا جيناۋدى جولعا قويىپ، قاتاڭ باقىلاپ ءجۇردى. وتكەن عاسىردىڭ وزىندە ەگىنگە قۇرت ءتۇسىپ، مالعا جۇت كەلىپ، جاۋىن-شاشىن بولماي، قۋاڭشىلىق ۇرسا مال ساۋىپ، جەر ەمىپ وتىرعان قارا حالىق ءتورت-بەس ايدا اشتىقتان تەنتىرەپ، جۇرتىن تاستاپ جوسىپ كەتەتىن.

اشارشىلىق ادامزاتتى ەرىكسىز ءدىندار قىلاتىن. قولايسىز اۋا-رايىنان قورىققان حالىق قۇدايعا قۇرباندىق شالۋدان جالىقپايتىن. وسىعان وراي نەشە ءتۇرلى ءدىني ريتۋالدار شىقتى. ورتا عاسىرداعى ەۋروپا ەلدەرىنىڭ جىلناماسىن وقىساڭ، ولاردىڭ دا سورى وسى بولعانىن بىلەسىڭ. قۋاڭشىلىق جىلدارى ەلدىڭ ۇشتەن ەكىسى تالعاجاۋ تاپپاي جەر جاستاناتىن. بىراق حح عاسىردا ادامزات وسى پروبلەمانى اقىرى شەشتى دەسە دە بولادى. تەحنولوگيالىق، ەكونوميكالىق جاڭالىقتار مەن ساياسي جۇيەلەر اشتىقتىڭ الدىن الۋدى جولعا قويدى. كەي ولكەدە قۋاڭشىلىق بولسا دا ودان شىعىنسىز شىعاتىن ءتۇرلى جولدار تابىلدى. گۋمانيتارلىق كومەك دەگەن جانە بار. افريكانىڭ كەي ولكەسىندە ءالى دا ادام اشتان ءولىپ جاتىر. بىراق ونىڭ نەگىزگى سەبەبى ساياسي. تيران باسشىلاردىڭ وڭباعان ساياساتىنىڭ كەسىرىنەن قارا حالىق اشتان ولەدى. قازىر كەز كەلگەن ەلدە جۇمىسىن جوعالتقان ادام تار تۇرمىسقا ءتۇسىپ قالۋى مۇمكىن. بىراق اشتان بۇراتىلىپ ولمەيدى. دامىعان ەلدەردە جۇمىسسىزدى ەڭ تومەنگى دەڭگەيدە قۇلاتپاي ۇستاپ تۇراتىن ءتۇرلى الەۋمەتتىك جوبالار جۇمىس ىستەپ تۇر. ءتىپتى دامۋشى ەلدىڭ وزىندە ادامنىڭ جاپپاي اشتان ولەتىن جايى جوق. البەتتە از اۋقاتتىڭ كەسىرىنەن دەنساۋلىقتا پروبلەما بولۋى مۇمكىن. بىراق ونىڭ ءوزىن وتكەن داۋىردەگى سۇراپىل جۇتپەن سالىستىرۋعا كەلمەيدى. قازاقشا ايتقاندا «اشتان ولگەننىڭ مولاسى جوق».

ماو دزە دۋن كوكەمىز كەزىندە قىتايدا «ۇلكەن سەكىرىس» دەگەن جوبانى قولعا العان. توپاس جوباسى از جىلدا قۇردىمعا كەتىپ، سونىڭ كەسىرىنەن ميلليونداعان قىتاي قىناداي قىرىلعان. سوعان وراي 1974 جىلدارى جاعداي ءالى بۇدان دا جامان بولادى دەپ اقىرزاماندى بولجاعاندار بولعان. بىراق تاريح دوڭگەلەگى باسقاشا اينالدى. دەن سياو پين رەفورماسىنان كۇش العان قىتاي اشتىقتان سىتىلىپ كەتتى. قازىر ولار تويىنىپ الدى. ەندى كەرىسىنشە توقتىقپەن كۇرەسەدى.

اڭگىمەنىڭ توقەتەرى مىناۋ: ءبىزدىڭ عاسىردا «تويىپ اس ىشپەۋ» دەگەن پروبلەمانى «ارتىق تاماقتانۋ» دەگەن اۋرۋ ىعىستىرىپ شىعاردى. ءحۇىىى عاسىردا حالىق جەۋگە نان تاپپاي اشتان قاتىپ جاتىر دەگەن حاباردى ەستىگەندە ماريا انتيونەتتە اتتى فرانتسيانىڭ قاتىن پاتشاسى «جەۋگە نان تاپپاسا ورنىنا پيروگ» جەسىن دەگەن ەكەن. سول قاتىننىڭ ايتقانى اينىماي ءدال كەلدى-ءاي. اقش-تىڭ بايلارى قىمبات رەستوراننان اۋقاتتانىپ وتىرعاندا، كوشەدە قالعان جۇمىسسىزدار مەن قايىرشىلارى ءدامدى گامبۋرگەر مەن پيتستسا جەپ جاتادى. 2014 جىلعى ەسەپ بويىنشا 2,1 ميلليارد ادام اۋقاتتى ارتىعىمەن جەپ اۋرۋ تاپقان. وسىلايشا «اۋرۋ استان، داۋ قارىنداستانعا» قايتا اينالىپ كەلدى. تويا جەۋدىڭ كەسىرىنەن ادام ۇرپاعى توقسان ءتۇرلى كەسەلگە شالدىققان. ال، تويىپ اس ىشپەيتىندەردىڭ سانى 850 ميلليوننىڭ ماڭايىندا. 2030 جىلى ادام ۇرپاعىنىڭ تەڭ جارتىسى اجالىن اشتىقتان ەمەس، توقتىقتان تابادى دەپ بولجاپ وتىر. 2010 اشارشىلىق پەن تويىپ تاماق ىشپەۋدىڭ كەسىرىنەن ءبىر ميلليون ادام تالقانى تاۋسىلىپ، تابىتقا ءتۇستى. ءدال وسى جىلى سەمىزدىكتەن ءۇش ميلليون مەشكەي و دۇنيەگە مەزگىلسىز اتتاندى.

قىسقاسى، ەسكىدە ادامزاتتىڭ دىندارلىعىنا اشارشىلىق سەبەپ بولدى دەسە، ەندى توقشىلىق تۇرتكى بولادى دەۋگە تولىق نەگىز بار. سوندىقتان ورازاعا يمانمەن كەلسەڭىز دە، عىلىممەن كەلسەڭىز دە، لوگيكامەن كەلسەڭىز دە پايداسى شاش ەتەكتەن ەكەنى انىق. تاعدىرعا تىستان اسەر ەتىپ، كەلەشەكتى ءوز بەتىنشە ايقىنداعىسى كەلەتىن بارلىق دەتەرمينيستىك سەبەپتەرگە قارسى شاعاتىن رۋح قايسارلىعىن ءوز بويىڭدا ءوز ەركىڭمەن 30 كۇن بويى سىناپ كورۋدىڭ ءوزى نەگە تۇرادى دەسەڭشى! اۋەلدەن ادام قامىن اللا ويلاعان دەگەندەي ءتاڭىرى تاعالا ورازانى ادامزاتتىڭ اماندىعى ءۇشىن پارىز قىلعانىنا كۇمان جوق ايتەۋىر. سوندىقتان دا جازبانى ورازا جايلى قيسسامەن تۇيىندەگەن ەڭ دۇرىسى.

بىردە ۇلىق اللا دارگەيىنە ەسەپشى پەرىشتەسىن شاقىردى. ونىڭ قۇلاعى مەن كوزى جەردەگى قۇم مەن اسپانداعى جۇلدىزدان ءجۇز ەسە كوپ ەدى. ۇلىق اللا وعان:
- دەرەۋ مۇحيت پەن تەڭىزدەگى سۋدىڭ تامشىسىن ساناپ، ەسەبىن الدىما قوي، - دەدى. پەرىشتە بوگەلمەدى. سول زاماتتا سۋ تامشىسىن ساتىر-سۇتىر ساناپ، قيساپسىز سان-ساناقتى اللانىڭ الدىنا جايىپ سالدى.
- جارايسىڭ،- دەدى راببىسى. - ەندى اۋەلدەن اقىرعا دەيىن كەلىپ-كەتەتىن بۇكىل اعاش پەن وسىمدىك جانە گۇلدىڭ جاپىراعىن سانا، - دەدى. پەرىشتە ساسپادى. سارت-سۇرت ەتكىزىپ دالمە-ءدال سانىن سول زاماتتا ايتىپ سالدى. ءتاڭىرىسى وعان ريزا بولىپ:
- ەندى جەردەگى قۇمنىڭ قيىرشىعىن سانا. قيسابى قانشا ەكەن؟ -دەدى. پەرىشتە بۇ جولى دا قينالمادى. كوزدى اشىپ-جۇمعانشا انىق سانىن سارت ەتكىزدى.
- باركەلدى! – دەدى ءتاڭىرسى. - ەندى رامازاندا اۋىز بەكىتكەن مومىننىڭ ءبىر كۇندىك ساۋابىن سانا، - دەدى. سول كەزدە سۇمدىق بولدى. جاڭا عانا ەسەپتەن جاڭىلماي قيساپسىز ساندى شىر اينالدىرىپ تۇرعان قۇدىرەتتى پەرىشتە تۇتىقتى دا قالدى. سانسىز قۇلاقتارى قىبىرلاپ، ەسەپسىز كوزدەرى جىپىلىقتاپ، ءابىرجىپ كەتتى. مىڭ-ميلليارد ەرىندەرى جىبىرلاپ، مومىننىڭ ورازاداعى ءبىر كۇندىك سۋابىنا جەتە الماي زورىعىپ كەتتى. اقىرىندا قيسابىنان جاڭىلدى دا ساجدەگە ءوزىن تاستاپ كەپ جىبەردى. گۇرس ەتىپ قۇلادى دا، ساجدەدەن تۇرماعان قالپى:
- ۋا، جاراتۋشى راببىم! بۇل ءىس ماعان قول ەمەس. اۋىز بەكىتكەن قۇلىڭنىڭ ءبىر كۇندىك ساۋابىنا جەتە المادىم. شاتاسىپ كەتتىم. ونىڭ قيسابىن ءوزىڭ بىلمەسەڭ، مەنىڭ شەكتەۋلى قابىلەتىم سارقىلدى، - دەپ شىنىن ايتىپ جىلادى. سول كەزدە ۇلىق اللا:
- جارايدى، باسىڭدى كوتەر. ءوزىڭدى ارتىق قيناما. ونىڭ سانى وزىمە عانا ءمالىم. سول نىعمەتتەرىممەن ورازا ۇستاعان مومىندى ءوزىم جارىلقايمىن، - دەدى.

سانجار كەرىمبايدىڭ facebook پاراقشاسىنان

Abai.kz