سابيلەرگە اسكەري فورما كيگىزۋ نەلىكتەن ناشار يدەيا؟
جەڭىس كۇنى رەسەيلىكتەر ءۇشىن شەكتەن تىس قاسيەتتى مەرەكە بولسا، سوعىسقۇمارلىقتى ناسيحاتتايتىن ءارتۇرلى تاۋارلار، كيىم-كەشەكتەر ساتاتىن ساۋداگەرلەر ءۇشىن دە مەرەكە. دۇرمەككە ىلەسكەن توبىرعا تاۋارلارىن وتكىزىپ، اقشاعا قارىق بولاتىن مەرەكە. قىزىل جالاۋلار، الاباجاق گەورگي شۇبەرەكتەرى، پيلوتكا، گيمناستەركا، سولدات بەلدىكتەرى، قىسقاسى مەليتاريستىك باعىتتاعى ءتۇرلى پالە ساتىلادى. ەڭ سوراقىسى - وسىنىڭ ءبارى كىشكەنتاي سابيلەرگە ارنالعان ولشەمدەر.

نەگە ەكەنىن ءيتىم ءبىلسىن، اتا-انالار سوڭعى جىلدارى بالالارىنا سەكسەن جىل بۇرىنعى اسكەري كيىمدەر كيگىزۋدى دارەجە سانايتىن بولىپتى. نەگە ەكەنىن دە تۇسىنەتىن دە سياقتىمىن. اسكەري كيىم كيگەن ءاپ-ادەمى ءسابيدىڭ سۋرەتىن ينستاگرامعا سالادى. ارىپتەستەرىنە كورسەتىپ ماقتانادى. ونى كورگەن جۇمىستاعى باستىعى «ويپىرماي، كەرەمەت پاتريوت ەكەن!» دەپ قىزمەت بابىندا ءوسىرۋى دە مۇمكىن. مۇنىڭ ءبارى سۇراپىل سوعىستا قىرىلعان اتا-باباسىنىڭ رۋحىنا كوك تيىن پايداسى جوق. اشەيىن پەندەشىلىك پەن بەيشارا ماسكاراد قانا.

ءبىر جامانى، ۇرپاق ساناسىن مەليتاريزاتسيا جاساۋمەن مەملەكەت اينالىسۋدا. مىسالى، بىرنەشە كۇن بۇرىن پياتيگورسك قالاسىندا «مەكتەپكە دەيىنگە بالالاردىڭ پارادى» ءوتتى. جو-جوق، كۇلمەڭىز، مۇلدە قالجىڭ ەمەس. «قالا بالاباقشالارىنىڭ بەس جۇزدەن استام بۇلدىرشىندەرى جاياۋ اسكەر، تانكيستەر، ۇشقىشتار، تەڭىزشىلەر مەن مەدبيكەلەر كيىمىن كيىپ، ماڭگىلىك الاۋ جانىنان ساپ تۇزەپ ءوتتى. شەرۋدى قالا اكىمى اندرەي سكريپنيك قابىلدادى».

مۇنىڭ ءبارى كىپ-كىشكەنتاي «جاۋىنگەردىڭ» ساناسىنا قالاي اسەر ەتەدى، ونىمەن ەشكىمنىڭ شاتاعى جوق. قاجەت دەپ تاپساڭىز، پسيحولوگ ەلەنا كۋزنەتسوۆانىڭ زەرتتەۋىنە ءمان بەرسەڭىز بولادى. «بالا پسيحيكاسىن زەرتتەپ جۇرگەن مامان رەتىندە ايتايىن، بۇلاي جاساۋعا بولمايدى. سوعىس - ادام ومىرىندەگى ەڭ جەكسۇرىن، ەڭ قورقىنىشتى نارسە بولۋى كەرەك. بالا ساناسىندا ونى كەرەمەت رومانتيكا، شاتتىق سەزىممەن كومكەرىلگەن مەيرام رەتىندە ءسىڭىرۋ جاقسى ەمەس.

ۇلكەندەردىڭ وسىنداي «تاربيەلىك شارالارى» بالا ءۇشىن «سوعىس - جاقسى نارسە ەكەن. ءبارىبىر سوڭىندا جەڭىسكە جەتىپ، بۇكىل حالىق تويلايدى عوي» دەگەن ۇعىم قالىپتاستىرادى. بۇل دۇرىس ەمەس. سوعىس - قىرشىنىنان قيىلعان عۇمىرلار. مىڭ-ميلليونداعان قابىرلەر. تۋىسقاندار زيراتى. ءار جەردە قالعان تومپەشىكتەر. ەكى جاقتان دا. سوڭىندا مۇلدە ىزدەۋشىسى جوق، كومۋسىز قالعان مۇردەلەر. پەندەلەر بەيبىت ءومىر سۇرە المايتىن بولسا، جازاسىن سوعىس بەرەدى. سوعىستا مەيىرىم جوق. تۇتاس اۋلەتتى دە قىرىپ سالادى. سوعىس دوس-دۇشپان دەپ تاڭدامايدى. شىبىن جانىڭدى شىرقىراتىپ قيا بەرەدى. مىنە، بالالارعا وسىنى ءتۇسىندىرۋ كەرەك.

بالالار اسكەري كيىمدى كيمەۋ كەرەك. سوعىستا بولعان اتالارىمىز ءۇشىن اسكەري كيىم ءارى كەبەنەك، ءارى كەبىن ەدى.

اسكەري كيىم - ءولىم سەبۋشىنىڭ كيىمى. كوكتەي سولدىراتىن، ءوزى دە كوكتەي سولۋشى كيەتىن كيىم. باسقان ىزىندە قايعى-مۇڭ مەن زار قالدىراتىن كيىم.
بالالاردىڭ ساناسىنا ومىرگە قۇشتارلىق پەن جاسامپازدىق يدەياسىن سىڭىرگەن دۇرىس».