2005, قوڭىر كۇزدىڭ ادەپكى ءبىر كۇنى، تۇستەن كەيىن، مەنىڭ جۇمىستان تىس مەزگىلىم بولسا كەرەك. تەلەفون شىلدىرادى. بەيتانىس، ءسال-ءپال قارلىعىڭقى داۋىس.

«مۇحا، مەن سىزدەن كەشىرىم سۇرايىن دەپ ەدىم...» «كىم؟ نە بوپ قالدى؟» - دەيمىن عوي. «مەن - ءابدىلحاميت نارىمبەتوۆ. اناداعى «رۋحاني باسبۇزارلىق» دەيتىن ماقالا... وتىرار، كوڭىرات... مەن بايقاماي، اڭداۋسىزدا قول قويا سالىپ ەدىم...» ءيا، وسىدان بىرەر اي، بالكىم، ەكى-ءۇش اپتا بۇرىن سونداي ماقالا شىققان. باسى - اكادەميك، حالىق قاھارمانى، ورتاسى - عىلىم دوكتورى، پروفەسسور، سوڭى - قايراتكەر، باس رەداكتور - مەن «ون بەس اكادەميكتىڭ جالاقور عارىزناماسى» دەپ ايعاقتاعان (اۋەلدە مۇلدە ەلەمەي، بىراق دابىرا توقتالماعان سوڭ كەيىنىرەك، جىل اقىرىندا تيەسىلى جاۋابىن بەرگەن) وزگەشە لەپەس. «نەگە «اڭداماي» قول قويا سالاسىز؟» - دەدىم. «مۇحتار ءوتىنىش جاساپ ەدى. بولماي سۇراعان سوڭ...» «بۇگىنگى مۇحتار - مەن. اۋەزوۆ ءولىپ قالعان. سىزدىكى قاي مۇحتار؟» - دەيمىن. «شاحانوۆ...» «سولاي دەمەيسىز بە. شاحانوۆ تالاپ ەتكەننەن سوڭ، دەپ. ءىسىڭىز ءتۇسىپ تۇر ما ەدى؟» «جوعا. سونداي... نەتە الماي... ەندى وسى وعاش قىلىعىم ءۇشىن سىزدەن كەشىرىم سۇرايمىن...» - دەيدى. «بۇلاي بولمايدى، اعاسى، - دەدىم. - ءسىز اۋزىڭىزعا اق يت كىرىپ، قارا يت شىعىپ، جالالى ماقالا جازاسىز...» «جازعان مەن ەمەس»، - دەدى تەلەفونشىم تۇتىعىپ. «جەكە ءوزىڭىز جازعان جوقسىز، بىراق قول قويدىڭىز. ياعني، قوسانجار اۆتور. زاڭ تارماعى بويىنشا، ۇجىمداسقان قىلمىستىڭ جازاسى اۋىرىراق بولادى...» «قىلمىس ەمەس قوي ەندى، تەرىس تە بولسا پىكىر...» «مۇنداي پىكىر بولمايدى، - دەدىم. - جارىم قازاقتى موڭعول دەپ جاريالاعان جالعان تاريحشى، ۇلتتىڭ تۇتاستىعىنا سىنا قاعۋشى كىساپىر، ادەبي جۋرنالدى ءوزىنىڭ جەكە مۇددەسىنە پايدالانعان بۇزاقى رەداكتور، ادامدىق كەيىپتەن ايرىلعان مونستر دەپ، تاعى قانشاما پالە جاپسىرىپ، تۇپا-تۋرا رەسپۋبليكا پرەزيدەنتىنىڭ وزىنە جازاسىز. راس، اتۋ جازاسىن سۇراعان جوقسىز. قازىر باسقا زامان. بىراق مەنىڭ وي-پىكىرىمە شەكتەۋ، قالامىمدى تەجەۋ، باسقا دا كاتاڭ شارالار قولدانۋ تۋرالى تالاپتى ۇسىنىس بار...» «ەندى... ىڭعايسىز بولدى. سول ءۇشىن كەشىرىم سۇراپ تۇرمىن عوي»، - دەدى قاتايا باستاعان تەلەفونشى. «كەشىرىم سۇراۋ بۇلاي بولمايدى، - دەدىم. - ءسىزدىڭ جالاقور عارىزناماڭىز «قازاق ادەبيەتى»، «انا ءتىلى» باستاعان ونشاقتى گازەتكە شىقتى، «جالىن» باستاعان ەكى-ءۇش جۋرنالعا شىقتى، كەيبىر وبلىستىق باسىلىمداردا جاريالاندى. ونى از دەسەڭىز، قازاق ءتىلدى ينتەرنەتتىڭ بەتىندە ءورىپ ءجۇر. نيەتىڭىزدىڭ باستاۋى جاقسى ەكەن. ەندى الگى گازەت، جۋرنالدىڭ ارقايسىنا جانە اتاۋلى سايتتارعا: «قاتەلەستىم، وسى بىلعانىش ماقالاعا شاحانوۆتىڭ ازعىرۋىمەن بايقاماي قول قويىپ ەدىم، سول ءۇشىن مۇحتاردان، ياعني ماعاۋيننەن كەشىرىم سۇرايمىن دەگەن دات جازىپ، تەزىنەن جاريالاتاسىز...» «بۇل مۇمكىن ەمەس جاعداي عوي...» - دەيدى، كەشەگى عارىزنامانىڭ بەل ورتاسىندا ەسىم-سوي، اتاق-دارەجەسى تولىق كورسەتىلگەن «فيلولوگيا عىلىمدارىنىڭ دوكتورى، پروفەسسور ءابدىلحاميت نارىمبەتوۆ»، قايتادان كۇش العانداي قاتقىل داۋىسپەن. «جالاقور عارىزناماعا قول قويۋ مۇمكىن بولدى عوي، مۇمكىن عانا ەمەس، وپ-وڭاي جۇزەگە استى. ورىستىڭ ماتەلىن بىلەتىن شىعارسىز: «چتو ناپيسانو پەروم، - تو نە ۆىرۋبيش توپوروم» - «قالاممەن جازىلعان تاڭبانى بالتالاپ وشىرە المايسىز» - دەگەن. مىناۋ - قالام دا ەمەس، سان مىڭداعان تيراجبەن باسىلعان، ەفيرگە تارالعان ماڭگىلىك ەسكەرتكىش...» «مەنىكى قاتە بولدى...» - دەدى قايتادان كۇمىعىپ. «ەڭ ۇلكەن قاتەلىك - جاڭاعى ۇلگى بويىنشا تۇزەي المايتىنىڭىز»، - دەدىم مەن جىبىمەي. - الايدا، ءسىزدى قۇتتىقتايمىن. الگى باسشى، قوسشىلارىڭىزبەن بىرگە، مۇحتار ماعاۋيننىڭ ۇستىنەن جالاقور دونوس جازعان ادام رەتىندە تاريحتا كالاتىن بولدىڭىز...» تەلەفون تۇتقاسى جايلاپ، ءوز ورنىن تاپتى. الايدا، بار اڭگىمە بىتپەپتى. بىتپەۋ كەرەك ەكەن. وعان دەيىن جانە كەيىن، كۇنى بۇگىنگەشە، جاڭا عاسىردىڭ باسى - ون جەتى جىل بويى مەنىڭ ۇستىمنەن قانشاما عارىز، ماقالا، ءتىپتى، ولەڭ-تولعاۋلار جازىلعان. قايدا نە شىعىپ، قايسى قايدا كەتكەنىن تۇگەندەۋ مۇمكىن ەمەس. ناقتى اۆتورلارى مەن قوسانجار قولداۋشىلارىنىڭ جيىنتىق ەسەبى دە بەلگىسىز. وزىمە ءمالىمى - ءجۇز قارالى كىسى. مەن «اقمولالىق جيىرما التى كوميسسار» دەپ اتاعان، رەسپۋبليكالىق پارلامەنتتىڭ شاحانوۆ جەتەكتەگەن جيىرما التى دەپۋتاتى، ءاسانالى ءاشىموۆ باستاعان ادەبيەت پەن ونەر قايراتكەرلەرى، بيبىگۇل تولەگەنوۆا باستاعان «ءدىن جاناشىرلارى»، وتىرار اۋدانىنىڭ «ەڭبەك ارداگەرلەرى»... جەكەلەگەن تاريحشى، ونەرتانۋشى، جۋرناليست، سازگەر... ءوز ىنتاسىمەن دۇرمەككە قوسىلعان جالباعاي جەكەلەر تۇرىپتى، ماناعى، وسى، جانە بىزگە بەيمالىم، جاسىرىن قانشاما عارىزناما قالايشا ۇيىمداسا كالدى؟ توپ-توبىمەن جينالىپ، شۋلى تالقى ۇستىندە ماملەگە كەلگەن بە؟ سونداي، ۇجىمدى، بەرەكەلى ماجىلىستەردىڭ وتكەرىلۋىن تەرىسكە شىعارۋ قيىن. ايتكەنمەن، تولىق كەلىسىم اتاۋلىنىڭ اۋەلگى ءبىر كوزعاۋشىسى، ۇرانشىسى بولادى عوي. ءوزىم انىق بىلەتىن ەدىم. پروفەسسور ءابدىلحاميت نارىمبەتوۆ ناقتى ايتتى. سەنىمدى كۋاگەر - جالعىز وسى كىسى عانا ەمەس. ماعان قارسى سوۆەتتىك، پاتريوتتىق ناۋقان قىزىپ جاتقان كەزدە كەزەكتى بىلعانىش ماقالالاردىڭ ءبىرىن «الماتى اقشامى» گازەتى دە باسىپ ەدى. ادەپكى جاعداي - «قازاق ادەبيەتى»، «ەگەمەن قازاقستان»، «انا ءتىلى»، «جالىن»، «ايقاپ» دەي مە، «رۋح-داريا» دەي مە، تاعى قانشاما قۇنسىز باسىلىمدار بەتىندە قاندالاداي ءورىپ جۇرگەن كوپ ماقالانىڭ قاتارىندا. بىراق اي دالاداعى «الماتى اقشامى» - مەن ءۇشىن توسىن كورىنگەن. رەداكتورى ساعات... مىنە، قايىرا كوشىرگەن ەكىنشى اينالىمدا ەسىمە ءتۇستى، - ەرعالي ساعاتوۆ، الدە ساعات ەرعالي دەگەن جىگىتتى سىرتتاي تانيمىن، «جۇلدىزدا» الدەبىر دۇنيەلەرى شىققان، ەڭ باستىسى - ءبىزدىڭ تۇرىسبەك ساۋكەتاەۆپەن بىرگە وقىعان، ارالاس-قۇرالاسى بار سياقتى. سوسىن تۇرىسبەككە ايتتىم: «انا سەنىڭ دوسىڭنىڭ مەندە كانداي شارۋاسى بولا قالىپتى؟» - دەپ. تۇرىسبەك الدەقالاي كەزدەسكەن، نەمەسە ارنايى تەلەفون شالادى. مىنا داۋعا نەسىنە ارالاستى دەپ اعامىز رەنجىپ جاتىر، دەيدى عوي. انا جىگىت ايىلىن جيماي، «مۇحاڭ ءوتىنىش جاساپ ەدى» دەيدى. ارينە، اۋەزوۆ ەمەس، بۇگىنگى قازاقتا اۋەزوۆتەن، ءتىپتى ابايدان دا مىقتى بولىپ تۇرعان الىپ ادام. البەتتە، جالعىز ءوزى ەمەس، توڭىرەگىندە قانشاما جانكەشتى جاندايشابى بار. جانە اتاۋلى عارىزناما ۇيىمداستىرۋمەن شەكتەلمەيدى، تالابىنا قۇلاق اسپاعان، ءتىپتى كەزەكتى جالاقور جولداماعا قايشى كەلگەن كەز كەلگەن بەيباققا قىسىم جاسالاتىنى بار. وسى رەتتە دراما دا، كومەديا مەن تراگەديا دا بولىپ جاتتى. سونىڭ بىرەۋى.

ماناعى، شاحانوۆ باستاعان «اقمولالىق جيىرما التى كوميسساردىڭ» «دەپۋتاتتىق مالىمدەمەسى» جازبالاي جانە ءباسپاسوز بەتىندە دە «قازاقستان رەسپۋبليكاسى پرەمەر-ءمينيسترىنىڭ اتىنا ءھام مادەنيەت، اقپارات جانە سپورت ءمينيسترىنىڭ عۇزىرىنا» جولدانعان ەدى. ەكى-ءۇش كۇننەن سوڭ، ءبىزدىڭ تۇرىسبەككە مادەنيەت مينيسترلىگىنەن بەيرەسمي تەلەفون سوعىلادى. جاڭا باستاعان كەزىندە مەن جولىن اشۋعا سەپتەسكەن، بۇل كەزدە قازاقتىڭ ۇلكەن جازۋشىلارىنىڭ قاتارىنا قوسىلىپ ۇلگەرگەن روزا مۇقانوۆا قارىنداسىم. مينيسترلىك مىنا دەپۋتاتتاردىڭ قاتقىل تالابىنا وراي، «ءبىر اي مەرزىم ىشىندە» تيەسىلى جاۋاپ قايتارۋى شارت. بىزگە تۇسكەن مالىمدەمە ءباسپاسوز بەتىندە شىعىپ كەتكەن سەبەپتى، وعان جازۋشىلار قاۋىمىنىڭ ءبىر توبى اتاۋلى جاۋاپ بەرۋى قاجەت سياقتى. ار جاعىن وزدەرىڭىز بىلەسىزدەر، دەپتى. تۇرىسبەك مەنىڭ ماقۇلىمنان سوڭ، اسىعىس ەكى بەتتىك انىقتاما جازىپ، اتاق-دارەجەسى بار ون-ون بەس قالامگەر مەن بىرەر بەلگىلى تاريحشىعا قول قويعىزىپ، مينيسترلىككە جولدادى. ايتىلعان مەرزىم شەگىندە مينيسترلىك تارابىنان تيەسىلى جاۋاپ بەرىلسە كەرەك، مىنە، جازۋشىلار مەن تاريحشىلار قاۋىمىنىڭ تولعامى وسىنداي، عىلىمدا، ادەبيەتتە ارقيلى پىكىرلەر بولا بەرەدى، دەگەن تۇرعىدا. البەتتە، داۋ-داماي، ارىز-عۇرىز توقتالعان جوق، ەندى مۇلدە ءورشىپ، جاڭاشا سىپات العان. بۇل ارادا ايتايىن دەپ وتىرعانىم، الگى جاۋاپ حاتتان سوڭ، وعان قول قويعان كىسىلەردىڭ بارلىعىمەن اتاۋلى تاربيە ساباعى وتكىزىلىپتى. ارقايسىمەن جەكەلەي. وكىمەت، مينيسترلىك تارابىنان ەمەس، وسى «مالىمدەمەنى» ۇيىمداستىرۋشى الىپتىڭ ءوزىنىڭ تىكەلەي قاتىسىمەن. كەيبىرى - تەلەفون ارقىلى، كەيبىرىمەن ىقتىرما، بەتپە-بەت اڭگىمە. سوڭعى توپتا عىلىم اكادەمياسى تاريح ينستيتۋتىنىڭ ديرەكتورى مەن ادەبيەت ينستيتۋتىنىڭ ديرەكتورلارى دا بار. قالاي قول قويدىڭىزدار، بۇل ارەكەتتىڭ استارىندا نەندەي سۇمدىق جاتىر دەگەن تەرگەۋ جانە بۇدان بىلاي بايقاپ جۇرىڭىزدەر دەگەن بوپسا. ادەبيەت ينستيتۋتىنداعى سەيىت قاسقاباسوۆ - مەنىڭ ارىپتەس، ەسكىلىكتى دوسىم ەدى، اكادەميك، پروفەسسور، جاڭاعى الىپقا كۇنى قاراپ تۇرعان جوق، تۇرىسبەك ايتادى، مەن ۇيالتىپ، زورلاعانداي قىلىپ، ارەڭ قول قويعىزىپ ەدىم دەيدى، ەندى، وسىنداي تىكە شابۋىلدان سوڭ مۇلدە جاسىپ كالعانىن بايقادىم، الداعى زاماندا ارامىز الىستادى، ءتارىزى، جاڭاعى پۇشايمان پروفەسسور سياقتى، ول دا كەشىرىم سۇراپ، كەلەشەكتە ماڭىنان جۇرمەيمىن دەپ ارەڭ قۇتىلعان سياقتى، جانە پالەدەن ماشايىق كاشقان زامان.

2006 جىلى كۇزدە اياق استىنان بەلسەندى شىعىپ، «ءدىن جاناشىرلارىن» باستاپ، ول دا اناۋ-مىناۋ ەمەس، تۇپا-تۋرا رەسپۋبليكا پرەزيدەنتىنىڭ اتىنا عارىز جولداعان جانە مىناۋ پالەنى قۇرتۋ كەرەك دەپ، جالپاق جۇرتقا جار سالعان بيبىگۇل تولەگەنوۆا اپەكەممەن ارادا اي وتپەي، الدەبىر استا ۇشىراسىپ، ءبىر داستارقان باسىندا وتىرىپ قالعان ەدىك. بۇرىن دا ەرتەلى-كەش كەزدەسكەنىمىز بار، الايدا، ۇلى ادامدار ۇمىتشاق كەلەدى عوي، مۇلدە تانىمادى. ەندى مەن الدەنەنى ايقىنداۋ ەمەس، قىزىق ءۇشىن ايتتىم، اپەكە، مەن - پالەن دە تۇگەن دەگەن جەرلەس باۋىرىڭىز بولام، لاۋرەات جازۋشى، «جۇلدىز» جۋرنالىنىڭ باس رەداكتورى، كەزىندە ءسىز تۋرالى ۇلكەن ماقالا بەرگەنبىز، ءتۇرلى-ءتۇستى سۋرەتىڭىزدى باسكانبىز، ال ەندى كەشەگى، رەسپۋبليكا پرەزيدەنتىنىڭ اتىنا جولدانىپ، قانشاما گازەتكە شىققان عارىزناماڭىز تۇسىنىكسىز بولدى، ءسىز جۋرنالدىڭ وتكەن توعىزىنشى سانىندا ۇلىق پايعامبارىمىزعا، ونىڭ پاك زايىبى ايشا انامىزعا ءتىل تيگىزدى دەپ ايىپتاعان شىعارما مۇلدە باسىلعان جوق، قالايشا، جوق نارسەنى بار دەپ، ءبىزدى جازاعا تارتۋعا شاكىراسىز؟ - دەدىم. اپەكەم اڭىراپ وتىرىپ كالدى. «ونداي نارسە باسىلعان جوق پا؟..» «جوق. جۋرنالدى الىپ قاراڭىز. مۇنداي پالە اتىمەن جوق!» «ا... سولاي ما...» - دەدى اپەكەم. بار ءسوزى وسىمەن ءبىتتى. قىسىلۋ دا، كەيىس تە بايقالمايدى. مەن بۇل جولى دا ناقتى بىلەتىن ەدىم. ماناعى الىپقا تىكەلەي كاتىستى. ءوزى، نەمەسە جاقىن ءبىر جاندايشابى بارعان. اتاقتى، ابىرويلى بيبىگۇل تولەگەنوۆا ويلانىپ جان قيناماي، مايسىز بارماعىن باسا سالعان. ال ءبىز دىننەن بەزگەن مۇنافيق جالاقور ەسەبىندە قالا بەردىك.

بۇگىندە بارلىق جۇرت ۇمىتقان ۇزاق، پارمەندى ناۋقانعا قايىرا كوز سالساق، باياعى ونداعان عارىزناما، ونىڭ جاپپاي، قايتالاي، قانشاما رەت جاريالانۋىنا ۇيىتقى، جەتەكشى بولعان رەداكتورلار، جاپىرلاي ۇجىمداسا قول قويعان ون سان جۇرت ىشىندە مەنەن كەشىرىم سۇراعان ەكى-اق كىسى بولىپتى، بىرەۋى ارادا سەگىز جىل وزعاندا، رياسىز كوڭىلمەن الدىمنان ءوتىپ ەدى، ەكىنشىسى - ماناعى ءابدىلحاميت نارىمبەتوۆ، ءىزىن سۋىتپاي ءيىلدى، بىراق رەتى مۇلدە قيىس شىقتى. مەن وسىنشاما دابىرادان سوڭ اقىرى «جۇلدىز» جۋرنالىنان ىسىرىلىپ، ەتەك-جەڭىمدى جينادىم دا، ەميگراتسياعا كەتتىم. كەلەر جىلى ەلگە ءاتۇستى بارعاندا، اشۋ-رەنىشىم ءالى تارقاماعان ەدى. بەس جىلدان سوڭ بايسال تارتىپپىن. الدەبىر اتاۋلى قوناقاسىدا كەزدەيسوقتان جاڭاعى نارىمبەتوۆتىڭ دۇنيەدەن ءوتىپ كەتكەنىن ەستىدىم. مۇندايدا قازاق «يمانى جولداس بولسىن» دەپ بەت سىيپايدى، كورىسكەن جاقىنىنا كوڭىل ايتادى. مارقۇمنىڭ جەسىرىمەن ءبىر داستارقاندا وتىرساق تا، ەشقانداي يشارات جاسامادىم. ەندى، ارادا تاعى ءبىر مۇشەل وتكەن سوڭ ويلاپ وتىرمىن. سول ءجۇز جالاقوردىڭ ىشىندەگى جالعىز ادامى - وسى ءابدىلحاميت نارىمبەتوۆ ەكەن دەپ. الدە تىكەلەي جارلىق، الدە پارمەندى ۇگىتتەن سوڭ باسى اينالىپ كەتتى دە، ءبىزدىڭ «رۋحاني باسبۇزار»، وتىرارعا، تاريحقا، شاحانوۆقا، ايتماتوۆقا قارسى ارام پيعىلىمىزدان جيرەنىپ، نىق سەنىم، ىزالى كەكپەن، بوياۋلى بارماعىن باستى. ارادا اپتا وتپەي وي ءتۇسىپ، تاعى بىرەر اپتا دوڭبەكشىگەن تولعانىستان سوڭ، قانشا قىسىلسا دا بۋىنىن بەكىتىپ، ۇلكەن ەرلىكپەن بىزگە تەلەفون شالىپتى. شىندىعىندا، عىلىم اكادەمياسىندا قاتارلاس قىزمەت اتقارعانبىز، قازاق فولكلورىن زەرتتەۋگە قاتىستى شۋلى ءبىر ماقالاسىن باياعىدا، مەكتەپ وقۋشىسى كەزىمدە «جۇلدىزدان» وقىعانىمدى ايتىپ تاڭ كالدىرعام، بۇدان سوڭ ونشا جۇعىسپاساق تا، اراز-قۇرازىمىز بولماعان، سول ەسكى تانىستىق جونىمەن الدان وتپەك ەكەن. الايدا ءبىز جىبىمەدىك، كەرىسىنشە، ىسكە اسپايتىن شارۋاعا نۇسقاپ، جۇيكەسىنە تاعى ءبىرتالاي سالماق سالعان سياقتىمىز. ەندى امال جوق. ءبىز كەشىردىك دەگەنمەن، داۋسىمىز جەتپەيتىن جەردە. «ءتاڭىرى تارازى» دەگەننەن باسقا نە قالدى.

ال مۇندا جۇرگەن، كوپشىلىگى بۇرىنعى سارىنمەن ءبىزدى كۇنى بۇگىنگە دەيىن قارالاپ جاتقان اعايىنداردى قايتەمىز؟ بۇل رەتتە دە وزىمەن كەتسىن دەگەننەن وزا المايسىز. نەكەستىڭ قايسى ءبىرىن تۇگەندەرسىڭ. وسى جاۋىمىزدىڭ ءوزى ارتىق. تەك كەيبىر مەنشىكتى جالاقورلارىمنىڭ اۋزىمەن ايتىلىپ، ءالى دە بولسا ءبىراز اڭقاۋ اعايىن قايتالاپ جۇرگەن ءبىر ءسوز - زامانىمىزدىڭ الىپ تۇلعاسى، قويدان قوڭىر، قوزىدان جۋاس ءمۇشتار ماحانوۆتىڭ نە جازىعى بار ەدى، موڭعول شىڭعىس حاننىڭ داۋى ءبىتتى عوي، مىنا ماعاۋين دە قويمايدى ەكەن دەيتىن بوستەكى سوزگە تۇسىنىكتەمە ەمەس. قازاقتىڭ باس بيلىگى وزىنەن كەتىپ، اۋەلدە اق پاتشا ەزگىسى، كەيىندە قىزىل فاشيزم قۇرساۋىندا قالعان، جات جۇرت، جاۋ اكىمشىلىكتىڭ اۋزىنا قاراعان، جاعىمپاز بەن جالاقورعا كەڭشىلىك بەرىلگەن وتارلىق زاماندا بويعا جۇققان كاتەرلى ىندەت - پالەلى ارىزقويلىق توڭىرەگىندەگى، وزىمىزگە تىكەلەي قاتىستى، ەرتەڭگى بالا امالسىز نازار اۋداراتىن بىلعانىش ناۋقاننىڭ كەيبىر كورىنىستەرى. ارعى ەركىندىك زاماندا بۇقار جىراۋدىڭ ۇستىنەن ەشكىم ارىز تۇسىرمەگەن. بۇعاۋلى داۋىردە وڭ ءىسى ءۇشىن كەنەۋسىز عايباتكا العاش ىلىنگەن - ماحامبەت ەكەن. سودان سوڭ اباي. كەيىندە احاڭ، جاقاڭ، ماعجان. ۇلى مۇحاڭ. سول بەتىمەن جىلجي جايىلىپ، بىزگە جەتىپتى. بۇرىنعى دالباعاي، جابايى جالاقور ەمەس. كگب-نىڭ بىلىق تاسىلدەرىن اجەپتاۋىر يگەرگەن الابۇيرەك، زاندەم قاۋىم. ەندى بىزدەن كەيىنگىلەر... بىلسە كەرەك، تانىسا كەرەك. بىلە، تاني تۇرا جيرەنسە كەرەك. سوندا عانا جاڭا ۇرپاعىڭ - ۇلىعىنان كىشىگىنە دەيىن جالالى ارىز، بىلعانىش ناۋقاننان تىس قالماق. سۇيەككە ءسىڭىپ، قانعا تاراعان ىندەت تىم كۇرسا ەكى ۇرپاق اۋىسقانشا توزىپ بىتەر دەپ ۇمىتتەنەم. ويتكەنى، مەن كەيىنگى شيرەك عاسىردا ءبىرشاما اڭداپ، سوڭعى ونشاقتى جىل بويى ورتاسىندا عۇمىر كەشكەن باتىس الەمىندە مۇنداي پالەكەت اتىمەن جوق. كەرىسىنشە، جالاقوردىڭ ءوزى جاۋاپقا تارتىلادى. دەگەنمەن، ءبىزدىڭ الدىڭعى اعايىندار دا قۇلان-تازا كەتپەس دەپ ويلايمىن. سوندىقتان دا وشپەس اق قاعاز بەتىندە كۋالىك جاسادىق.

ماقالا Ult.kz سايتىنان الىندى

مۇحتار ماعاۋين، 4.ءحىى.2017, روكۆيلل، مەريلەند.

Abai.kz