مەملەكەت باسشىسى قاسىم-جومارت توقاەۆ جيىنعا قاتىسۋشىلاردى اقتوبە قالاسىنىڭ الداعى 150 جىلدىق مەرەيتويىمەن قۇتتىقتاپ، بۇگىندە ءوڭىردىڭ وندىرىستىك، لوگيستيكالىق جانە ترانزيتتىك الەۋەتى زور ەكەنىن ايتتى.

– ايماقتىڭ قارقىندى دامۋى ۇشىن بارلىق مۇمكىندىك بار. جەرگىلىكتى كاسىپكەرلەردىڭ بەلسەندىلىگىن اتاپ ءوتۋ كەرەك. «تۋعان جەر» باعدارلاماسى اياسىندا 1400-دەن استام جوبا ىسكە اسىرىلدى. بۇدان بولەك، شەتەلدىك ينۆەستورلار وڭىردە الەۋمەتتىك نىساندار سالۋعا بەلسەندى اتسالىسۋدا، – دەدى قاسىم جومارت توقاەۆ.

قازاقستان پرەزيدەنتى حالىقتىڭ ءومىر ءسۇرۋ ساپاسىن ارتتىرۋ جانە الەۋمەتتىك-ەكونوميكالىق ءوسىمدى قامتاماسىز ەتۋ ۇكىمەت پەن اكىمدەردىڭ نەگىزگى مىندەتى ەكەنىن ايتتى.

– ازاماتتارعا قاجەتتى جاعداي جاساۋ بارلىق دەڭگەيدەگى مەملەكەتتىك ورگانداردىڭ مىندەتىنە اينالۋى ءتيىس. مەملەكەتتىڭ باستى بايلىعى – ازاماتتار! ولاردىڭ تىلەكتەرىن ەسكەرىپ، تولعاندىرعان ماسەلەلەرىن شەشۋ ۇكىمەتتىڭ نەگىزگى قاعيداتى بولۋى ءتيىس، – دەدى مەملەكەت باسشىسى.

قاسىم-جومارت توقاەۆ جۇرتشىلىقپەن كەزدەسۋىندە ءوڭىردىڭ بىرقاتار شەشىلمەگەن ماسەلەلەرىن دە اتاپ ءوتتى.

– وبلىستاعى ورتاشا جالاقىنىڭ كولەمى – 141 مىڭ تەڭگە، ال رەسپۋبليكا بويىنشا 168 مىڭ تەڭگە. بۇدان بولەك، بىرقاتار اۋدان تۇرعىندارىنىڭ تابىس كولەمىندە ايتارلىقتاي ايىرماشىلىق بار. لايىقتى جالاقى – حالىقتىڭ ءال-اۋقاتىنا ىقپال ەتەتىن ماڭىزدى فاكتور. سوندىقتان، ازاماتتارىمىزدىڭ تابىسىن ارتتىرۋ ارقاشان مەنىڭ باستى نازارىمدا بولادى. تۇرعىنداردىڭ تابىس كولەمى وبلىس اكىمدىكتەرىنىڭ جۇمىس كورسەتكىشىنە اينالۋى ءتيىس، – دەدى قازاقستان پرەزيدەنتى.

مەملەكەت باسشىسى ۇكىمەتكە جانە جەرگىلىكتى اتقارۋشى ورگاندارعا ساپالى ءارى قولجەتىمدى تۇرعىن ءۇي سالۋدى، حالىقتىڭ تابىسىن ارتتىرۋدى، ىسكەرلىك بەلسەندىلىكتى قولداپ، ورتا تاپ قالىپتاستىرۋدى، سونداي-اق، ءوڭىردىڭ كولىك-ترانزيتتىك الەۋەتىن دامىتۋ جونىندە قاجەتتى شارالار قابىلداۋدى تاپسىردى.

قاسىم-جومارت توقاەۆ ەل ەكونوميكاسىنداعى شاعىن جانە ورتا بيزنەستىڭ ۇلەسىن 2050 جىلعا دەيىن 50 پايىزعا ارتتىرۋ تۋرالى ەلباسىنىڭ مىندەتتەمەسىن ەسكە سالىپ، الداعى بەس جىلدا بۇل كورسەتكىشتىڭ 30 پايىزعا جەتۋى ءتيىس ەكەنىن ايتتى.

– وبلىس اكىمىنە «بيزنەستىڭ جول كارتاسى – 2025» رەسپۋبليكالىق باعدارلاماسىنىڭ اياسىندا جۇيەلى شارالار قابىلداۋدى تاپسىرامىن. بيىلدان باستاپ وعان بولىنەتىن قارجى 30 ميلليارد تەڭگەگە ءوستى. كاسىپكەرلەر ءوز ءىسىن دامىتۋ ءۇشىن بەرىلەتىن ميكرونەسيەلەردى كەدەرگىسىز الۋى ءتيىس. ءبىز ولارعا جان-جاقتى قولداۋ كورسەتىپ، بولاشاعى بار ءار جوباعا كوڭىل ءبولۋىمىز قاجەت، – دەدى قاسىم-جومارت توقاەۆ.

سونىمەن قاتار، قازاقستان پرەزيدەنتى وڭىردەگى تسيفرلاندىرىلۋ دەڭگەيىنىڭ تومەن، اۋىلدارداعى ينتەرنەت شەكتەۋلى ەكەنىن ايتىپ، ەلدى مەكەندەردى دامىتۋ جونىندە بىرقاتار مىندەت قويدى.

– اگروونەركاسىپ سەكتورى – ءوڭىردىڭ الەۋمەتتىك-ەكونوميكالىق دامۋىنىڭ نەگىزگى ارقاۋى. اقتوبە وبلىسى – جەرىنىڭ كولەمى جاعىنان ەلىمىزدەگى ءىرى وڭىرلەردىڭ ءبىرى. اكىمدىك اۋىل شارۋاشىلىعىن دامىتۋ ءۇشىن ناقتى جۇمىس جوسپارىن ازىرلەۋى ءتيىس. ءوڭىر ازىق-تۇلىك قاۋىپسىزدىگىن قامتاماسىز ەتۋ ىسىندە ماڭىزدى ءرول اتقارۋى كەرەك، – دەدى قاسىم-جومارت توقاەۆ.

ءىس-شارا سوڭىندا قازاقستان پرەزيدەنتى اقىن ب.قالماعانبەتوۆتى، ەڭبەك ارداگەرى س.قۇسايىنوۆانى، قازاق كامەرالىق حورىنىڭ كوركەمدىك جەتەكشىسى ءارى ديريجەرى م.قۇسپانوۆتى، اقتوبە فەرروقورىتپا زاۋىتىنىڭ اۆتوكولىكتى پايدالانۋ جونىندەگى شەبەرى ۆ. پلۋگيندى جانە الەۋمەتتىك قىزمەت كورسەتۋ ورتالىعىنىڭ مەدبيكەسى ل.مارشەنينانى العىس حاتتارمەن ماراپاتتادى.

Abai.kz