قوجاحمەتوۆانىڭ سوزىنشە، پاۆلودار وبلىسىنىڭ اكىمدىگى كوپ بالالى شاڭىراقتارعا كومەكتەسۋگە ءازىر ەكەنىن ايتىپ، ۇسىنىس جاساعان سوڭ مامىردىڭ باسىندا نۇر-سۇلتاننان ەكىباستۇزعا 18 شاڭىراق كوشكەن. "نۇرلى ەرتىس" دەپ اتالاتىن باعدارلاما اياسىندا كوشىپ بارعاندارعا جاڭا سالىنعان تۇرعىن ۇيدەن ءۇش بولمەلى پاتەر بەرىلگەن. اكىمدىك جۇمىسقا جارامدى ادامدارعا قىزمەت ۇسىنىپ، بالالاردى مەكتەپكە، بالاباقشاعا ورنالاستىرۋعاعا كومەكتەسپەك.

— ولارعا ءبىر جىل بويى كومەك بولادى. ياعني، كوممۋنالدىق قىزمەت پەن جالداۋ اقىسىن اكىمدىك تۇگەل ءوزى كوتەرمەك. قازىر كوشكىسى كەلەتىن وتباسىلارمەن سويلەسىپ جاتىرمىز. ەكىباستۇز اكىمدىگى ءبىزدىڭ ءۇش-ءتورت بالاسى بار وتباسىلارعا دا كومەكتەسۋ تۋرالى ۇسىنىسىمىزدى قابىل الدى. ولارعا ەكى بولمەلى پاتەرلەر بەرىلمەك، — دەدى نۇرسۇلۋ قوجاحمەتوۆا.

اقپان ايىندا نۇر-سۇلتاندا (سول كەزدەگى - استانا) ءبىر وتباسىنىڭ بەس بالاسى ورتتەن قازا تاپقان سوڭ كوپ بالالى انالار نارازىلىق تانىتىپ، بيلىكتەن جاردەماقى ءوسىرۋدى تالاپ ەتكەن. 27 اقپاندا وتكەن "نۇر وتان" پارتياسىنىڭ سەزىندە سول كەزدەگى پرەزيدەنت نۇرسۇلتان نازارباەۆ ۇكىمەتكە ءار بالاعا ساۋىردەن باستاپ 21 مىڭ تەڭگە بەرۋدى تاپسىرعان. بۇل تاپسىرما نەگىزىندە پارلامەنت ازىرلەگەن زاڭعا قازىرگى پرەزيدەنت قاسىم-جومارت توقاەۆ ءساۋىردىڭ باسىندا قول قويعان.

Abai.kz