«اۋىل – ەل بەسىگى» جوباسى شەڭبەرىندە 2019 جىلى قازاقستاندا 52 اۋدان ورتالىعى جاڭعىرتىلىپ، بۇل جاقىن جىلدارى 700 مىڭ اۋىل تۇرعىنىنىڭ ءومىرىن وزگەرتۋگە مۇمكىندىك بەرەدى. بۇل تۋرالى ورتالىق كوممۋنيكاتسيالار قىزمەتىندەگى ءباسپاسوز كونفەرەنتسياسىندا ۇلتتىق ەكونوميكا ۆيتسە-ءمينيسترى ەرمەك الپىسوۆ حابارلادى.   

ونىڭ ايتۋىنشا، 450-گە تارتا شارا ىسكە اسىرىلادى. ونىڭ 229-ى كولىك ينفراقۇرىلىمىنا، 153-ءى الەۋمەتتىك ينفراقۇرىلىمعا جانە 66-سى تۇرعىن ءۇي-كوممۋنالدىق شارۋاشىلىققا تيەسىلى.

«جوبانىڭ نەگىزگى ماقساتى – اۋىلداعى ءومىر ءسۇرۋ ساپاسىن جاقسارتۋ، اۋىلدىق اۋماقتاردىڭ الەۋمەتتىك ورتاسىن جاڭعىرتۋ، ولاردى وڭىرلىك ستاندارتتارعا جەتكىزۋ. جوبا شەڭبەرىندە اۋىلدىق اۋماقتاردىڭ الەۋمەتتىك جانە ينجەنەرلىك ينفراقۇرىلىمىن دامىتۋ، اۋىل تۇرعىندارىنىڭ الەۋمەتتىك يگىلىكتەر مەن مەملەكەتتىك قىزمەتتەرگە قولجەتىمدىلىگىن قامتاماسىز ەتۋ، تۇتاستاي العاندا، اۋىل تۇرعىندارىنىڭ ءومىر ءسۇرۋ ساپاسىن جاقسارتۋ جونىندەگى بىرقاتار مىندەتتەر شەشىلەدى»، - دەدى ۆيتسە-مينيستر..    

تۇتاس العاندا، جوبانى ىسكە اسىرۋعا 2019-2021 جىلدارى رەسپۋبليكالىق بيۋدجەتتەن 90,0 ملرد.تەڭگە قاراستىرىلىپ، ونىڭ ىشىندە، 2019 جىلى 30,0 ملرد.تەڭگە ءبولىندى.

«اۋىل – ەل بەسىگى» جوباسىن ىسكە اسىرۋدىڭ ارقاسىندا قانداي ماسەلەلەر شەشىمىن تابادى؟ قارجى نەگە جۇمسالادى؟ «4 662 جۇمىس ورنى قۇرىلىپ، 73 مەكتەپ پەن بالاباقشا، 14 ەمحانا، 47 مادەنيەت ءۇيى مەن سپورت نىسانى جوندەۋدەن وتكىزىلەدى، 12 دەنەشىنىقتىرۋ-ساۋىقتىرۋ كەشەنى سالىنىپ، 12 اباتتاندىرۋ جوباسى ىسكە اسىرىلاتىن بولادى. سونداي-اق، 516 شاقىرىم جول، 35 شاقىرىم سۋمەن جابدىقتاۋ جەلىسى، 229 شاقىرىم ەلەكترمەن جابدىقتاۋ (جارىقتاندىرۋ), 136 شاقىرىم گازبەن جابدىقتاۋ، 20 شاقىرىم جانە 7 جىلۋمەن جابدىقتاۋ نىسانى جوندەلىپ، سالىنادى»، - دەدى ەرمەك الپىسوۆ..

جوبانى ءتيىمدى ىسكە اسىرۋ ءۇشىن ۇكىمەت دەڭگەيىندە جوبالىق وفيس جۇمىس ىستەيدى. وسىنداي وڭىرلىك وفيستەر اكىمدەردىڭ باسشىلىعىمەن وبلىستاردا قۇرىلعان. جوبانى تىكەلەي ۇيلەستىرۋدى جانە اكىمشىلەندىرۋدى ۇلتتىق ەكونوميكا مينيسترلىگى جۇزەگە اسىرادى.

ەرمەك الپىسوۆ جۇرگىزىلىپ جاتقان شارالاردىڭ اۋىلدىق اۋماقتاردىڭ دامۋىنا جاڭا سەرپىن بەرەتىنىن، اۋىل تۇرعىندارىنىڭ ءومىرىن بارىنشا قولايلى جانە جايلى ەتەتىنىن، جالپى ءوڭىر ەكونوميكاسىنا وڭ اسەرىن تيگىزەتىنىن اتاپ كورسەتتى.

Abai.kz