بيىل رف ۇكىمەتىنىڭ گرانتى ەسەبىنەن ءبىلىم العان ماسكەۋ مەن سانكت - پەتەربۋرگتىڭ جەتەكشى جوعارى وقۋ ورىندارىنىڭ 117 جاس مامانى وقۋىن ءتامامدايدى دەپ كۇتىلۋدە.

وبلىس اكىمىنىڭ، مەملەكەتتىك ورگان باسشىلارىنىڭ، ءوڭىردىڭ ونەركاسىپ كاسىپورىندارى مەن ۇيىمدارى وكىلدەرىنىڭ قاتىسۋىمەن وتكەن ماجىلىستە جاس مامانداردى جۇمىسقا ورنالاستىرۋ ماسەلەسى تالقىلاندى.

ءماجىلىستى اشقان ايماق باسشىسى ق.كوشەرباەۆ 2014 جىلدان باستاپ ءوڭىر مەكتەپتەرىنىڭ 500-دەن استام تۇلەگى رف ۇكىمەتىنىڭ گرانتتارىنا يە بولعانىن اتاپ ءوتتى.

"وزدەرىڭىز بىلەسىزدەر، ءبىز 2014 جىلدان باستاپ مەكتەپ تۇلەكتەرىن ماقساتتى تۇردە ۇزدىك وتاندىق جانە رەسەيلىك جوعارى وقۋ ورىندارى مەن كوللەدجدەرگە جىبەرىپ كەلەمىز. بىلتىر العاشقى 74 جاس مامان ديپلومدارىن الىپ، ەلگە ورالدى، قىزمەتتەرىن باستادى. بيىل تاعى 177 جاس مامان وقۋىن بىتىرەدى. قاجەتتى ماماندىقتاردى، اتاپ ايتقاندا مەتاللۋرگ، تەحنولوگ، حيميك، ەنەرگەتيك، جەر قاتىناستارى جانە ت.ب. ماماندىقتاردى يگەرگەن بۇل ينجەنەر ماماندار الداعى ۋاقىتتا ەلىمىزدىڭ، ءوڭىردىڭ ودان ءارى ءوسىپ-وركەندەۋىنە ءوز ۇلەستەرىن قوساتىن بولادى. سوندىقتان، جىل سايىن ءبىتىرۋشى جاس مامانداردىڭ جۇمىسپەن قامتىلۋى بارشامىزعا اسا ماڭىزدى ءارى جاۋاپتى ءىس", - دەدى ايماق باسشىسى.

جاستار ساياساتى جونىندەگى باسقارما باسشىسى قۋانىش جانۇزاقوۆتىڭ ايتۋىنشا، بيىل 117 ستۋدەنت «مبجقي» ۇلتتىق زەرتتەۋ تەحنولوگيالىق ۋنيۆەرسيتەتىن (53 تۇلەك),  ك.ا.تيميريازەۆ اتىنداعى  رەسەي مەملەكەتتىك اگرارلىق ۋنيۆەرسيتەتىن (41 تۇلەك), تەحنولوگيا جانە ەنەرگەتيكا جوعارى مەكتەبىن (سانكت-پەتەربۋرگ ق.، 23 تۇلەك) ءتامامدايدى دەپ كۇتىلۋدە. ولار "نانوتەحنولوگيا جانە ميكروسيستەمالىق تەحنيكا", "مەتاللۋرگيا", "تەحنولوگيالىق ماشينالار مەن جابدىقتار", "ەلەكتر ەنەرگەتيكاسى جانە ەلەكتروتەحنيكا", "اگروينجەنەريا" جانە ت. ب. 22 ماماندىق بويىنشا وقۋىن بىتىرەدى. ولاردىڭ 50 ماگيستراتۋرادا وقۋىن جالعاستىرۋدى جوسپارلاپ وتىر، ال 67 تۇلەك ەلگە ورالادى.

"بيىل وڭىردە اگروونەركاسىپ كەشەنى سالاسىندا 76 جوبا ىسكە اسىرىلۋدا. ايماقتا ىسكە قوسىلۋى جوسپارلانعان 4 جوبا بويىنشا 400-دەن اسا ادامدى جۇمىسپەن قامتۋ جوسپارلانعان. جاس ماماندار وسى جوبالار جانە باسقا دا ءىرى كاسىپورىندار مەن مەكەمەلەرگە جۇمىسپەن قامتىلۋى ءتيىس»،-دەدى ايماق باسشىسى.

ءماجىلىس قورىتىندىسى بويىنشا وبلىس اكىمى ورىنباسارلارىنا ءاربىر تۇلەكتىڭ جۇمىسقا ورنالاسۋىنا جەكە جاۋاپتى ەكەنىن اتاپ ءوتتى.

Abai.kz