10 جىل بۇرىن "جايدارماندا" - "وپەل گەرمانيادا تۋىپ، شىمكەنتتە ولەدى",-دەگەن ءازىل بولاتىن. سويتسەەم ول ءبىر كەرەمەت زامان ەكەن عوي. قازىر "ۆاز رەسەيدە تۋىپ، قازاقستاندا ولەدى",-دەپ جىلاۋعا شاق بولىپ ءجۇرمىن...

ستاتيستيكا بويىنشا 2015 جىلى دەۆالۆاتسيا بولعانعا دەيىن قازاقستاندا 162 مىڭ كولىك سالوننان ساتىلعان. 2018 جىلى ولاردىڭ سانى نەبارى 31 مىڭ عانا بولىپتى. ءبىزدىڭ زاڭ شىعارۋشىلاردىڭ تۇسىنىگىنشە، 10 جىلدان اسقان كولىك، ەسكى كولىك بولىپ ەسەپتەلەدى. سوندا قازاقستاندىقتاردىڭ 63 % ەسكى - قۇسقىمەن كۇن كورىپ ءجۇر ەكەن. ەڭ ەسكى كولىكتەر مىنۋدەن العاشقى ۇشتىكتى - جامبىل، الماتى، تۇركىستان وبلىستارى يەمدەنىپ تۇر.

"جاڭا" دەپ اۋىز تولتىرىپ ايتقاننىڭ باسىم بولىگى رەسەي مەن وزبەكستان كولىكتەرى. ولاردىڭ ساپاسى مەن قاۋىپسىزدىگى جايلى Euro NCAP نورمالارىندا 2 بالل دا جيناي المايتىنىن كوبىڭىز بىلەسىزدەر. ماسەلەن، رەسەيدىڭ سوڭعى تەحنولوگياسىمەن شىققان Lada Vesta عا ديلەرلەر كاروزياعا قارسى 6-اق جىل كەپىلدىك بەرەدى. 6-اق جىل! بۇل دەگەن ەكىنشى قوجايىنعا شىرىك ماشينا بارادى دەگەن ءسوز.1989 جىلى شىققان Mercedes پەن BMW ءوز كولىكتەرىنە - 30 جىلعا كەپىلدىك بەرگەن! مىنە ساپا!

ءبىزدىڭ اسا قۇرمەتتى مينيسترلەر مەن دەپۋتاتتار جاس كەزدەرىندە اسىق ويناۋدان ۇنەمى جەڭىلىپ، پايدا دەگەندى ۇمىتىپ قالعان سياقتى. مىسالعا، وزبەكتەر ءوز كولىكتەرىن قر اۋماعىندا ەركىن ساتسا، بىزدىكىن ەلدەرىنە كىرگىزبەيدى. بالانس قايدا؟ قازاقستان دسۇ 2015 جىلى قابىلداندى. پراكتيكا بويىنشا بۇل ۇيىمعا مۇشە بولعان سوڭ تۇتىنۋ تاۋارلارى ارزانداۋعا ءتيىس بولاتىن. بىراق، بىزدە كەرىسىنشە. بۇل ۇيىمعا مۇشە ەلدەردە باسقا ەلدەن كولىك اكەلۋ ءدال بىزدەگىدەي قىمبات ەمەس شىعار. اكەلسەڭ ەۋرو-4 ستاندارتتى كولىك اكەلۋ كەرەك. زاڭداعى تالاپ سۇمدىق ەندى. دىبىس باسقىشتا سو2 شىعۋىن انىقتايتىن چيپ بولۋ كەرەك ت.ب. قۇداي-اۋ، قازاقستاننىڭ 200 اۋدانىنىڭ، 190-دا تازا اي-92 جوق قوي! سوسىن، رەسەي كولىكتەرىندە سول چيپ بار ما ەكەن؟ مەن بىلەتىن ءبىر-ەكى جىگىت ەۆرو-5 ستاندارتتى كولىكتەرىنىڭ "پالەتسى" ۇرعان سوڭ، گازعا ءوتىپ كەتتى.

مەنى تۇڭىلدىرگەن تاعى ءبىر نارسە بولدى. كوپتەگەن ەلدەر ەلەتروموبيل الامىن دەگەن جاندى سالىقتان بوساتىپ، جەڭىلدەتىلگەن كرەديت بەرىپ قولداۋدا. ونداعى ويلارى سو2-دەن تابيعات پەن ادامدارىن قورعاۋ. بىزگە قاراساڭ تاعى دا سول كەرى كەتۋ. ەلەكتروموبيلدەرگە سالىقتان ەش جەڭىلدىك قاراستىرماعان. سەبەبىن مەن بىلەمىن. ويتكەنى رەسەي "Tesla" ساناتتى ەلەكتروموبيل شىعارمايدى. قىسقاسى كوكەلەر حالىقتى ۇمىتىپ كەتتى. سالونداعى كولىك ۋداي. سوندىقتان كوپتەگەن قازاقستاندىقتارعا "ەسكى كولىكپەن ءالى قانشا ءجۇرۋىم كەرەك؟",-دەگەن وي مازا بەرمەۋدە.

ءوزىمىزدى وتاندىق كولىكپەن قامتاماسىز ەتە الماساڭىزدار، قۇداي ءۇشىن كەدەندىك سالىقتار مەن قوسىمشا قۇن سالىعىن تومەندەتىڭىزدەرشى. "ەكولوگيا، حالىق دەنساۋلىعى",- دەپ الاڭداماي-اق قويىڭىزدار. رادياتسيا قابىلداپ، ارال تۇزىن جۇتىپ جۇرگەن حالىققا سو2 دەگەن قاۋىپ با ەكەن ءتايىرى...