24-مامىر كۇنى م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا «MÝZEI TÚNI» اتتى ەرەكشە شارا ءوتتى. حالىقارالىق تەاتر كۇنىنە جانە اۋەزوۆ تەاترى مۇراجايىنىڭ تۋعان كۇنىنە وراي ۇيىمداستىرىلعان كەشتە كورەرمەن قازاق تەاتر ونەرىنىڭ بۇتىندەي ءبىر تاريحىمەن تانىسىپ، وتكەن كۇننىڭ ىزدەرىمەن قازاق تەاترىنىڭ «التىن عاسىرىنا» ساپار شەكتى.

«اننا كارەنينا» سپەكتاكلىندەگى كوپشىلىكتى ەلەڭ ەتكىزىپ، ەسىندە قالعان  پويىزبەن ساحنا ۇستىنەن دالىزگە قاراي ءجۇرىپ وتكەن ارتيستەر مەن كورەرمەننىڭ ورتاسىندا ەرەكشە بايلانىس ورنادى. سەبەبى، بۇل كەشتە بارلىعى بىردەي «مۋزەي ءتۇنىنىڭ» وتۋىنە ءبىر ادامداي اتسالىستى. جاندى تەربەتەر، بويدى شىمىرلاتار ءان ايتىلدى، جۇرەكتىڭ سويلەگەن ۇنىندەي پوەزيا دا وقىلدى،  بي دە، سپەكتاكل دە، ءبارى بولدى. تولىعىراق تارقاتساق...

رەسمي بولىمنەن كەيىن تەاتر جاستارى كورەرمەننىڭ ورتاسىنا شىعىپ، ل.تولستويدىڭ الەمدىك كلاسسيكالىق تۋىندىسى «اننا كارەنينا» قويىلىمىنداعى ءبيىن ۇسىندى. لەزدە قاراڭعىلىق ورناپ، ارتىنشا تەاترىمىزدىڭ اكتەرى، قازاقستاننىڭ ەڭبەك سىڭىرگەن قايراتكەرى – بولات ءابدىلمانوۆ كورەرمەننىڭ الدىندا «اباي»، تانىمال تەاتر جانە كينو اكتەرى، قازاقستاننىڭ ەڭبەك سىڭىرگەن قايراتكەرى – ەركەبۇلان دايىروۆ پەن جاس اكتريسا اسەل سايلاۋوۆا «عاسىردان دا ۇزاق كۇن»، مەرەي مۇحتارۇلى مەن جانەل ماقاجان «رومەن مەن دجۋلەتتا» جانە جاس اكتەر جىگىتتەر «بەيبارىس سۇلتان» سپەكتاكلىنىڭ ءۇزىندىسىن ويناپ شىقتى. سونداي-اق، كونتسەرتتىك باعدارلاما بويىنشا، تەاتر جاستارى «سىرلاسۋ» بۇرىشىندا مۇقاعالي پوەزيالارىنان ءۇزىندى وقىسا، «سەرپەر» جاستار سىيلىعىنىڭ يەگەرى ايان وتەپبەرگەن گيتارامەن سۇيەمەلدەپ، اجارلىم باقىتجانقىزى «مەن ساعان عاشىق ەمەس ەم»، «سەن مۇڭىڭدى بەر ماعان» اتتى سىرلى اندەردى شىرقاپ، تەاتردى ليريكالىق اتموسفەراعا بولەدى.

بۇل كەشتە كورەرمەن مۋزەيدىڭ تاريحىمەن تانىسىپ قانا قويعان جوق، ونى كوزبەن كورىپ، جۇرەكپەن سەزىندى دەۋگە تولىق نەگىز بار. سەبەبى. تەاترىمىزدىڭ كوركەمدىك جەتەكشىسى، كسرو حالىق ءارتيسى، كسرو، قازكسر مەملەكەتتىك سىيلىقتارىنىڭ لاۋرەاتى، تاۋەلسىز «تارلان» سىيلىعىنىڭ، «وتان»، «قۇرمەت»، «قازاقستاننىڭ ەڭبەك ەرى» وردەندەرىنىڭ يەگەرى – ءاسانالى ءاشىموۆ العىسوزدى باستاپ، جيىلعان قاۋىممەن امانداسىپ، بارلىق مۇراجاي جاناشىرلارىن مەرەكەمەن قۇتتىقتاپ قانا قويماي، تەاترىمىزدىڭ «مۋزەي» ءبولىمىنىڭ جەتەكشىسى – نارگيز تامابەكقىزىنا قازاقستان تەاترلار اسسوتسياتسياسىنىڭ اتىنان ارنايى ديپلوم تابىستاپ، قارجىلاي سىيلىق جاسادى. سونداي-اق، سپيكەرلەردىڭ قاتارىندا قازاقستاننىڭ حالىق ءارتيسى، پروفەسسور  ەسمۇحان وباەۆ، قازاقستاننىڭ حالىق ءارتيسى، مەملەكەتتىك سىيلىقتىڭ لاۋرەاتى، «ەڭبەك قىزىل تۋ»، «پاراسات»، «وتان»، 1-دارەجەلى «دوستىق»  وردەندەرىنىڭ، «مادەنيەت ۇزدىگى» توسبەلگىسىنىڭ يەگەرى – ءسابيت ورازباەۆ، تەاترىمىزدىڭ ديرەكتورى – قازاقستاننىڭ ەڭبەك سىڭىرگەن قايراتكەرى ءسابيت ابدىحالىقوۆ بولدى.

ءسابيت ابدىحالىقوۆ، تەاتر ديرەكتورى:

قايىرلى كەش، قىمباتتى ونەر سۇيەر قاۋىم، بۇگىنگى تەاترىمىزدىڭ ەرەكشە مادەني شاراسى "مۋزەي ءتۇنى" كەشىنە قوش كەلدىڭىزدەر!

ءبىرىڭىز بىلسەڭىزدەر، ەندى ءبىرىڭىز بەيحابارسىزدار، م. اۋەزوۆ اتىنداعى قازاق  مەملەكەتتىك اكادەميالىق دراما تەاترىنىڭ مۋزەيى  رەسمي تۇردە 1968 جىلى 24 مامىردا قازاقستاننىڭ ورتالىق مۋزەيىنىڭ فيليالى رەتىندە اشىلعان. ال قازىرگى كۇنى تەاترىمىزدىڭ مۋزەيى ەلىمىزدىڭ ۇلكەن، اۋقىمدى مۇراجايلارىمەن يىق تىرەستىرىپ، ەلگە قىزمەت ەتىپ كەلەدى.

كونەلەردىڭ كوزىندەي بولعان جادىگەرلەردى ساقتاپ، باپتاپ، ناسيxاتتاپ وتىرعان مۇراجاي قىزمەتكەرلەرىن مەرەكەمەن قۇتتىقتايمىن!

مۋزەي – تاريح قويماسى، ءومىر ايناسى. مۋزەي قىزمەتكەرلەرى مەن قازاقستاننىڭ مادەني مۇراسىن ساقتاۋ، كوپشىلىككە تانىتۋ يدەيالارىنا بەي-جاي قاراماۋ تاريx مۇرالارى الدىنداعى پارىزىمىز. مۋزەيدى ەرەكشە مادەني ورتالىق رەتىندە وزىنە قىمبات جانە جاقىن سانايتىن قىمباتتى قاۋىم، رۋxاني مۇرالارىمىزبەن تانىس بولىڭىزدار! تاعى دا قوش كەلدىڭىزدەر!

راسىندا، تەاتر مۋزەيى 51-گە تولدى. جارتى عاسىر ۋاقىت ىشىندە ءوزىنىڭ جادىگەرلەرىن تولىقتىرۋدان بولەك، حالىقتى تەاتردىڭ وتكەنىمەن تانىستىراتىن، اكتەرلەردىڭ ءومىرناماسىنىڭ ەل بىلە بەرمەيتىن بەتتەرىن جيناقتاپ، كورەرمەنگە جەتكىزەتىن ايرىقشا بەدەلگە يە بولا ءبىلدى.

قارا شاڭىراقتا 20 جىلداي ۋاقىت قىزمەت ەتىپ كەلە جاتقان نارگيز تامابەكقىزى جەتەكشىلىك ەتەتىن «مۋزەي» بولىمىندە جۇمىس ىستەيتىن ماماندار جىل سايىن شىعاتىن گازەت قيىندىلارىنا دەيىن ساقتاپ كەلەدى.

«مۋزەي ءتۇنىنىڭ» بولەر اسەرىن  كورەرمەنگە ەشبىر كىتاپ، ەشبىر ەل اۋزىنداعى ەستەلىكتەر دە بەرە الماسى انىق.

ايتا كەتەيىك، 2018 جىلى تەاتر مۋزەيىنە 50 جىل تولۋىنا وراي «مۋزەي ءتۇنى» جوعارى دەڭگەيدە وتكەن بولاتىن.

گۇلىم رىسقۇل

Abai.kz