ەۋرازيالىق ەكونوميكالىق وداق باسشىلارى استانادا جينالىپ جاتىر. مۇندا سامميت وتەدى. ەرتەڭ بۇل وداقتى قۇرۋ تۋرالى كەلىسىمگە قول قويىلعانىنا 5 جىل تولادى. بۇگىندە وداققا 5 مەملەكەت مۇشە. سول بەس ەلدىڭ  باسشىلارى بەس جىلدىقتىڭ جۇمىسىن قورىتىندىلايدى.

نە كەرەك، سامميتكە كەلگەن، كەلە جاتقان ءپۋتيننىڭ، لۋكاشەنكو مەن جەەنبەكوۆتىڭ كەۋدەلەرىنە پرەزيدەنت توقاەۆ وردەن تاقپاق. اناۋ-مىناۋ ەمەس، "قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازارباەۆ" وردەنىمەن ماراپاتتايتىن بولدى. ول ءۇشىن ارنايى قاۋلى قابىلدادى. قاۋلىدا بىلاي دەپ جازىلعان ەكەن:

قاۋلى ەتەمىن:

1. ەۋرازيالىق ينتەگراتسيا يدەياسىنىڭ 25 جىلدىعىنا جانە ەۋرازيالىق ەكونوميكالىق وداق تۋرالى شارتقا قول قويۋدىڭ 5 جىلدىعىنا وراي، سونداي-اق قازاقستان رەسپۋبليكاسىمەن ىنتىماقتاستىقتى تەرەڭدەتۋ مەن كەڭەيتۋگە قوسقان ايرىقشا ۇلەسى ءۇشىن "قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازارباەۆ" وردەنىمەن ناگرادتالسىن:

پۋتين ۆلاديمير ۆلاديميروۆيچ - رەسەي فەدەراتسياسىنىڭ پرەزيدەنتى

لۋكاشەنكو الەكساندر گريگورەۆيچ - بەلارۋس رەسپۋبليكاسىنىڭ پرەزيدەنتى

جەەنبەكوۆ سوورونباي شاريپوۆيچ - قىرعىز رەسپۋبليكاسىنىڭ پرەزيدەنتى.

2. وسى جارلىق قول قويىلعان كۇنىنەن باستاپ قولدانىسقا ەنگىزىلەدى.

سولاي، مىنە. توقاەۆ پۋتين، لۋكاشەنكو مەن جەەنبەكوۆتى "نازارباەۆ" وردەنىمەن ماراپاتتايتىن بولدى.

ال سامميتكە قاتىسۋ ءۇشىن قىرعىز پرەزيدەنتى سوورونباي جەەنبەكوۆ استاناعا بۇگىن كەلگەن. پرەزيدەنت قاسىم-جومارت توقاەۆپەن كەزدەستى. بەلارۋس پرەزيدەنتى الەكساندر لۋكاشەنكو دا قازىر استانادا. ول دا بۇگىن كەلگەن. پرەزيدەنتتىڭ قابىلداۋىندا بولدى.

ال رەسەي پرەزيدەنتى استاناعا ۇشىپ شىعىپتى. ورىس اقپاراتى سولاي دەپ جازدى. ايتپاقشى، وداق قۇرۋ يدەياسىنىڭ اۆتورى، قازاقستاننىڭ ەندىگى ەكس-پرەزيدەنتى نۇرسۇلتان نازارباەۆ تا سامميتكە قاتىساتىن بولدى. ول قۇرمەتتى قوناق بولىپ وتىرادى.

Abai.kz