قىزىلوردا قالاسىندا تۇرمىسى تومەن كوپبالالى وتباسىلارعا ارنالعان 100 باسپانا پايدالانۋعا بەرىلدى. 

بىرەر اي بۇرىن وبلىس ورتالىعىنداعى «بايتەرەك» شاعىن اۋدانىندا تۇرمىسى تومەن كوپبالالى وتباسىلار ءۇشىن 150 باسپانانىڭ قۇرىلىسى باستالعان بولاتىن. ونىڭ ىشىندە 50 پاتەر جەرگىلىكتى قازىنادان بولىنگەن قارجىعا سالىنۋدا. ال 100 باسپانانىڭ قۇرىلىسى «بولات وتەمۇراتوۆ» قايىرىمدىلىق قورىنىڭ قارجىسى ەسەبىنەن جۇرگىزىلدى. سول 100 پاتەر قىسقا مەرزىمدە سالىنىپ، ەل يگىلىگىنە پايدالانۋعا بەرىلگەلى وتىر. سوندىقتان، بۇگىن مۇندا جينالعان حالىقتىڭ قاراسى قالىڭ بولدى. جاڭا مەكەننىڭ العاشقى قونىستانۋشىلارى – كوپبالالى وتباسىلار، ولاردىڭ قۋانىشىنا ورتاقتاسۋعا كەلگەن ەل ازاماتتارى، قالا تۇرعىندارى كەلدى. شاڭىراق شاتتىعىنا بولەنگەلى وتىرعاندارعا ءوڭىر ونەرپازدارى دا مەرەكەلىك كوڭىل-كۇي سىيلادى.

سالتاناتتى جيىنعا وبلىس اكىمى قىرىمبەك كوشەرباەۆ پەن «بولات وتەمۇراتوۆ» قايىرىمدىلىق قورى قامقورشىلىق كەڭەسىنىڭ توراعاسى الماس شارمان قاتىسىپ، قونىستوي يەلەرىن قۇتتىقتادى.

«سوڭعى جىلدارى سىر ءوڭىرى قارقىندى قۇرىلىس الاڭىنا اينالىپ كەلە جاتىر. 2013 جىلى 230 مىڭ شارشى مەتر باسپانا سالىنسا، بيىلعى مەجەمىز 800 مىڭ شارشى مەترگە جەتىپ وتىر. ءتورت ەسەگە وسكەن. قوعام قايراتكەرى بولات وتەمۇراتوۆتىڭ قارجىلىق دەمەۋشىلىگىمەن «بالامەكەن» جوباسى اياسىندا قىزىلوردا قالاسىندا از قامتاماسىز ەتىلگەن كوپ بالالى وتباسىلاردى قولداۋ ماقساتىندا جانە بالالاردى قورعاۋ مەرەكەسى قارساڭىندا 100 پاتەردىڭ قۇرىلىسى رەكوردتىق ەكى اي مەرزىمدە سالىنىپ، پايدالانۋعا بەرىلدى. قوسىمشا وبلىستىق بيۋدجەتتەن 50 پاتەرگە قارجى ءبولىنىپ، قۇرىلىسى جۇرۋدە. ولار دا تولىققاندى ماۋسىم ايىندا ىسكە قوسىلادى. ايتا كەتۋ كەرەك، تۇرعىن ءۇي قۇرىلىسىن دامىتۋ ماقساتىندا سوڭعى 6 جىل ىشىندە قىزىلوردا قالاسىنىڭ وزىندە 15 شاعىن اۋدان پايدا بولدى. جاڭا اۋداننىڭ قۇرىلىسىنا كىرىستىك. قىزىلوردا تاريحىندا مۇنداي قارقىندى قۇرىلىس بولعان ەمەس. 2019 جىلدىڭ سوڭىنا قاراي قىزىلوردانىڭ سول جاعالاۋىندا 2 628 پاتەرلىك 13 كوپقاباتتى تۇرعىن ءۇي سالىپ، وعان 13 مىڭ ادامدى قونىستاندىرۋدى جوسپارلاپ وتىرمىز. ەلباسىنىڭ 2018 جىلدىڭ قاڭتارىنداعى جولداۋىنا وراي، بولاشاقتا ءبىر ادامدى 30 شارشى مەتر باسپانامەن قامتاماسىز ەتۋ جوسپارىمىزدا بار»، – دەدى قىرىمبەك كوشەرباەۆ. 

«بايتەرەك» شاعىن اۋدانىندا پايدالانۋعا بەرىلگەلى وتىرعان باسپانالاردىڭ جالپى اۋدانى – 6 500 شارشى مەتر.

وبلىس اكىمىنىڭ ايتۋىنشا، سالىنىپ جاتقان 150 باسپانانىڭ 149-ىنا كوپبالالى وتباسىلار قونىستانادى. 1-ەۋىنە شاعىن حالىق قىزمەت كورسەتۋ ورتالىعى ورنالاسپاق. ول كوپبالالى وتباسىلارعا جانە وسىنداعى جەكە ۇيلەرگە قىزمەت كورسەتەدى. سونىمەن قاتار، ايماق باسشىسى الداعى جىلى «بايتەرەك» شاعىن اۋدانىنا مەكتەپ پەن بالاباقشا قۇرىلىسىن سالۋدى جوسپارعا ەنگىزەتىنىن ايتىپ، تۇرعىنداردى قۋانتىپ قويدى.

«بۇدان بولەك، قىزىلوردا وبلىسىندا از قامتىلعان كوپبالالى وتباسىلارعا 431 پاتەردىڭ قۇرىلىسىنا بيۋدجەتتەن قارجى ءبولىنىپتى. جىلدىڭ سوڭىنا دەيىن 588 پاتەر كوپبالالى وتباسىلارعا بەرىلەتىن بولادى»، – دەدى وبلىس اكىمى. 

«بولات وتەمۇراتوۆ» قورى قامقورشىلىق كەڭەسىنىڭ توراعاسى الماس تورەگەلدىۇلىنىڭ ايتۋىنشا، مەملەكەت تاراپىنان عانا ەمەس، بيزنەس وكىلدەرى تاراپىنان دا حالىقتىڭ ءالجۋاز توپتارىنا قولداۋ كورسەتىلۋدە. سونىڭ ءبىر دالەلى – «بولات وتەمۇراتوۆ» قورىنىڭ ەلدىڭ ءال-اۋقاتىن ارتىرۋ باعىتىندا اتقارىپ وتىرعان جۇمىستارى.

«5 جىل بۇرىن ىرگەسى قالانعاننان بەرى وسى باعىتتا جۇمىسىن ۇزدىكسىز جالعاستىرىپ كەلەدى. قوردىڭ قۇرىلتايشىسى بولات وتەمۇراتوۆ ءوز تاراپىنان كوپبالالى وتباسىلاردى باسپانامەن قامتاماسىز ەتۋگە ءوز ۇلەسىن قوسۋدى ۇيعاردى. ءبىزدىڭ قورىمىز 450 ميلليون تەڭگە كولەمىندە قاراجات ءبولىپ، قىزىلوردا وبلىسى اكىمدىگىمەن بىرگە ناۋرىز ايىندا «بالامەكەن» جوباسىن ىسكە اسىرۋعا كىرىستى. بۇگىندە جوسپارىمىز تابىستى بولعانىنىڭ كۋاسى بولىپ وتىرمىز. سول سەبەپتى، كوپبالالى انالار، بالالار جايلى باسپانانىڭ يەسى بولاتىنىن ەرەكشە تەبىرەنىسپەن، ۇلكەن قۋانىشپىن ايتقىم كەلەدى»، – دەدى الماس شارمان. 

بۇدان كەيىن ەل ازاماتتارى كوپبالالى وتباسىلارعا پاتەر كىلتتەرىن سالتاناتتى تۇردە تابىستادى. باسپاناعا ءبىرىنشى كەزەكتە قول جەتكىزگەندەر – 10, 9, 8, 7 بالاسى بار وتباسىلار. دەپۋتاتتار مەن قوعام بەلسەندىلەرىنەن قۇرالعان تاۋەلسىز كوميسسيا وسىنداي شەشىم قابىلداپتى.

ماسەلەن، جاڭا پاتەر العان ايگۇل ابايدۋللاەۆا – 10 بالانىڭ اناسى. باسپانالى بولسام دەگەن ارمانى ورىندالعانى سەنە الار ەمەس. ءتىپتى كوز جاسىنا ەرىك بەردى.

«قاتتى قۋانىپ تۇرمىن. شيىتتەي بالا-شاعا بار. سولاردىڭ نەسىبەسى دەپ بىلەمىن. رامازان ايىندا وسىنداي سىي ءناسىپ ەتتى»، – دەيدى ول.
ال 7 بالانىڭ اناسى ۆەرا ءجۇسىپوۆا پاتەر جالداپ، كوشىپ-قونىپ جۇرەتىن كۇندەر ارتتا قالدى دەپ وتىر.

«جارىق، سۋ، گاز، جول، تەلەفون بايلانىس – ءبارى بار مىندا. ريزامىز. جالپى، وتباسىمنىڭ تۇرمىس جاعدايىمەن اكىمشىلىكتەگى ادامدار تانىس. باسپاناعا مۇقتاج ەكەنىمىزدى دە بىلەدى. كەشە ءۇي بەرەمىز دەپ حابارلاسقاندا قۋانىپ كەتتىم. تۋىستارىما ايتىپ، ءسۇيىنشى سۇراپ، ءماز بولىستىق»، – دەيدى كوپبالالى انا. 

7 بالانىڭ اناسى ىزىمكۇل تۇرسانوۆا دا قۋانىشىندا شەك جوق ەكەنىن ايتادى.

«بالامەكەن» دەگەن جوبانىڭ ارقاسىندا كوپ جىل كۇتكەن پاتەرىمىزدى الدىق. ەندى وسى جەر بالالار مەكەنىنە اينالادى دەپ ويلايمىن. ەلباسىنا، وبلىس باسشىلىعىنا وسىنداي قامقورلىق كورسەتىپ جاتقانىنا العىس ايتامىن»، – دەدى ىزىمكۇل تۇرسانوۆا.

Abai.kz