قىرعىز ەلىنىڭ باس پروكۋراتۋراسى بۇرىنعى پرەزيدەنت المازبەك اتامباەۆتىڭ ۇستىنەن قىلمىستىق ءىس قوزعاۋعا جول اشۋ ءۇشىن قول سۇعىلماۋشىلىق يممۋنيتەتىن الىپ تاستاۋى مۇمكىن. دەپۋتاتتىق كوميسسيانىڭ ايىپتاۋى مەن باس پروكۋراتۋرانىڭ قورىتىندىسى تومەندەگىدەي:

1. دەپۋتاتتار، سوتتار، قوعام قايراتكەرلەرى مەن باق وكىلدەرىن قۋدالادى دەگەنگە نەگىز جوق. ول ءۇشىن اتامباەۆتىڭ كىناسى دالەلدەنۋى كەرەك.
2. قوي-تاش اۋىلىنداعى جەردى تارتىپ الىپ، اتامباەۆتىڭ ءۇي سالعانى. اسا اۋىر قىلمىس جاسادى دەگەن دەرەكتەر بار.
3. قىلمىس الەمىنىڭ سەركەسى ءازيز باتۋكاەۆتى زاڭسىز بوساتىپ جىبەرۋ. اسا اۋىر قىلمىس جاسادى دەگەن دەرەكتەر بار.
4. زاڭسىز بايىعان. اسا اۋىر قىلمىس جاسادى دەگەن دەرەكتەر بار.
5. بىشكەكتەگى جىلۋ ەلەكتر ستانساسىن جاڭارتۋ كەزىندە جەمقورلىققا جول بەرۋ. اسا اۋىر قىلمىس جاسادى دەگەن دەرەكتەر بار.
6. بىشكەكتەگى جىلۋ ەلەكتر ستانساسىنا كومىردى زاڭسىز جولمەن جەتكىزۋگە قاتىسى بار بولۋى مۇمكىن. اسا قاۋىپتى قىلمىس جاسادى دەگەن دەرەكتەر بار.
المازبەك اتامباەۆتان قول سۇعىلماۋشىلىق يممۋنيتەتىن الىپ تاستاۋ ءۇشىن جوعارعى كەڭەستىڭ 100 دەپۋتاتى قولداپ داۋىس بەرگەن. 5 ادام قارسى بولعان. ءالى وسىنداي 8 كەزەڭنەن وتكەندە بارىپ، ناقتى قورىتىندى شىعادى.

قىرعىز ەلىندە بۇرىنعى پرەزيدەنت دارەجەسى روزا وتىنباەۆا مەن المازبەك اتامباەۆتا بار. تاقتان تايدىرىلعان اسقار اقاەۆ پەن قۇرمانبەك باكيەۆ پرەزيدەنت دارەجەسىنەن ايىرىلعان دەپ سانالادى.

ال بۇگىن، ارمەنيادان جەتكەن اقپاراتقا جۇگىنسەك، 25 ماۋسىمدا ارمەنيانىڭ بۇرىنعى پرەزيدەنتى روبەرت كوچاريان قاماۋعا الىندى.

ءمادي ماناتبەكتىڭ facebook پاراقشاسىنان

Abai.kz