قازاق قاشاندا جوق-جىتىكتەن قينالعاندى نەمەسە اۋرۋ-سىرقاۋدان زارداپ شەگىپ، وزگەلەردەن كومەك كۇتىپ جۇرگەن جانداردى كورگەندە ەشقاشان سىرت اينالىپ، بۇرىلىپ كەتپەگەن. قولىندا بارىمەن بولىسكەن. قولىندا جوق بولسا، جىلى ءسوزىن اياماعان. مۇنى قازىرگى ۋاقىتتا دا ايقىن كورۋگە بولادى. وزگەسىن بىلاي قويعاندا انا ارۋجان ساين باسقاراتىن «مەيىرىمدىلىك» ەرىكتى قورىنىڭ ۆولونتەرلەرى تيىنداپ بولسا دا اقشا جيناپ، ەلىمىزدە ەمدەۋگە جارامايتىن قانشاما نارەستەلەردى شەتەلگە اپارىپ اجال اۋزىنان امان الىپ قالدى.

الايدا وسىنداي اسا ىزگىلىكتى دۇنيەدە، كەيدە سول اقشا جينايتىنداردىڭ  كەيبىر ىستەرىنىڭ كۇمان تۋعىزاتىندىعى دا جاسىرىن ەمەس. ماسەلەن، كەيىنگى كەزدەرى قالا كوشەلەرىندە قولدارىنا جاشىك ۇستاپ، جۇرتتان جىلۋ جيناپ جۇرگەن جاس بالالاردى كوپتەپ كەزدەستىرەسىز. ولاردىڭ وزدەرىنىڭ ايتۋىنشا «ءۇمىت جارىعى» قايىرىمدىلىق قورىنا كومەكتەسىپ جۇرگەن كورىنەدى. دەگەنمەن، ءالى دە كامەلەت جاسىنا تولماعان بالالاردى كوشە ارالاتىپ اقشا جيناۋ قانشالىقتى زاڭعا سايكەس كەلەدى؟ ونىڭ ۇستىنە بۇلار قالا ورتالىعىندا جۇرتتىڭ الدىن كەس-كەستەپ، مۇلدەم مازاسىن الىپ ءبىتتى. قايىرىمدىلىق  دەگەن وسىلاي، بىرەۋدىڭ جاعاسىنان الىپ، اقشا سۇراۋ ارقىلى جاسالا ما؟

- مەنىڭ بۇعان ۇلكەن كۇمانىم بار. جۇمىسقا بارا جاتىپ تا، جۇمىستان كەلە جاتىپ تا كورەمىن. ارينە، اۋرۋ بالاعا دەگەسىن قولىمنان كەلگەنشە اقشا سالامىن. الايدا كەيدە كۇدىكتەنەمىن. بىرىنشىدەن، مۇنىمەن نەگە جاپ-جاس بالالار اينالىسادى؟ ەكىنشىدەن، اقشا جينالاتىن بالانىڭ ءوزى دە بۇل جاقتان ەمەس. جينالعان اقشالار سول اتا-انانانىڭ قولىن تيە مە، جوق پا، ءبىر قۇدايدىڭ ءوزى ءبىلسىن، -دەيدى قالا تۇرعىنى الما ەسماعامبەتوۆا. .

ءبىز بۇل بۇلدىرشىندەردى سۋرەتكە ءتۇسرۋدى نيەت ەتكەنىمىزبەن، ونىمىزدان تۇك شىقپادى. بارلىعى سۋرەتكە تۇسۋدەن باستارىن الا قاشتى. مۇمكىن، ولارى دۇرىس تا شىعار. ارتىق كوزگە ءتۇسىپ، جۇرتشىلىقتىڭ نازارىن اۋدارۋدى قاجەت ساناماعان بولار. ماجبۇرلەۋگە ءبىزدىڭ دە قۇقىمىز جوق. سوندىقتان ءبىز  وزگەلەردىڭ تۇسىرگەن سۋرەتتەرىن پايدالانۋعا ءماجبۇر بولدىق.

كەيىن سۇراستىرىپ كورسەك، بۇل كىسىنىڭ كۇمانداناتىن ءجونىبار ەكەن. «باقساق، باقا ەكەن» دەگەندەي، الگى «ءۇمىت جارىعى» قورى كوپ جۇرتتىڭ ارىز-شاعىمىنىڭ نەگىزىندە قۇقىق قورعاۋ ورگاندارىنىڭ تەكسەرۋ ناتيجەسىندە ەلىمىزدىڭ  الماتى، قاراعاندى جانە وسكەمەن سەكىلدى قالالارىندا جابىلىپ قالعان ەكەن. ال بىزدە بولسا مىنە ەكى اي بويى ەشكىمنەن قىسىلماستان، ەشكىمنەن ايىلىن جيماستان «جەمىستى» جۇمىس ىستەپ جاتقان كورىنەدى.

اتالمىش قوردىڭ وسىنداعى وفيسىندەگى ۆولونتەرلەردىڭ ايتۋىنا قاراعاندا جۇرتقا الاقان جايىپ جۇرگەن بالالار سول جينالعان سومانىڭ 20 پايىزىن وزدەرىنە سىيلىق رەتىندە الاتىن كورىنەدى. مۇنىڭ ءوزى بالعىنداردى قايىرشىلدىققا باۋلۋ ما، الدە ونى بيزنەس كوزىنە اينالدىرۋ ما؟

- جينالعان سومادان ۆولونتەرلەردىڭ ءوز پايىزىن الۋ ەشبىر اقىلعا سىيمايدى. ءبىزدى «قر ۆولونتەرلىك قىزمەتى تۋرالى» زاڭ بار. ءدال وسى زاڭ ۆولونتەرلىك قىزمەتتى رەتتەيدى. وندا الگىندەي قىزمەت جانە باسقا دا قىزمەت ءۇشىن اقشا الۋىنا جول بەرىلمەيدى. قايىرىمدىلىق قاشاندا تەگىن كورسەتىلەدى. بۇل - ۆولونتەرلىك قىزمەتتىڭ باستى قاعيداسى،- دەيدى «گرين» ازاماتتىق اليانس ۆولونتەرلىك ورتالىعىنىڭ جەتەكشىسى اينۇر احمەنوۆا.

مۇنىڭ ءبارى دۇرىس شىعار، ارينە. الايدا وسى جاعدايدى كەيبىر ارانى اشىلعان ۆولونتەرسىماقتار مەن جۇمىرتقادان ءجۇن قىرىققان الاياقتار ءوز پايداسىنا قاراي ىڭعايلاپ، قينالماي تابىس تابۋ كوزىنە اينالدىرۋى ءتىپتى دە عاجاپ ەمەس. وسىدان ساق بولدايىق، اعايىن!

جايبەرگەن بولاتوۆ

قوستاناي

Abai.kz