ءماجىلىس توراعاسى ەرلان قوشانوۆ گرۋزياعا رەسمي ساپارى اياسىندا ەل پرەزيدەنتى ميحايل كاۆەلاشۆيليمەن، پرەمەر-مينيستر يراكلي كوباحيدزەمەن جانە پارلامەنت توراعاسى شالۆا پاپۋاشۆيليمەن كەزدەستى.

ءماجىلىس دەلەگاتسياسىنىڭ تبيليسيدەگى جۇمىسى گرۋزيا پارلامەنتىنەن باستالدى. ەرلان قوشانوۆ ارىپتەسى شالۆا پاپۋاشۆيليمەن كەزدەسۋدە قازاقستان حالىقتارىمىزدىڭ ورتاق تاريحى مەن بەرىك دوستىعىن ايرىقشا باعالايتىنىن اتاپ ءوتتى. مۇنىڭ ءبارى ەكى ەل اراسىنداعى تابىستى ءارى ۇزاق مەرزىمدى ىنتىماقتاستىقتىڭ كەپىلى ەكەنىنە نازار اۋداردى.

سۋرەتتەردى تۇسىرگەن ت.تانىباەۆ.

– وسىدان جارتى جىل بۇرىن گرۋزيانىڭ پرەمەر-ءمينيسترى كوباحيدزە مىرزا ءبىزدىڭ ەلگە رەسمي ساپارمەن كەلگەن بولاتىن. پرەزيدەنت قاسىم-جومارت توقاەۆپەن كەزدەسۋ بارىسىندا ەلدەرىمىز كوپ قىرلى قارىم-قاتىناستاردى ناتيجەلى دامىتۋعا باعدار العانى تۋرالى ايتىلدى. ساۋدا، ەنەرگەتيكا، ونەركاسىپ، ينۆەستيتسيا، تۋريزم سالاسىنداعى ىنتىماقتاستىقتىڭ كەڭ پەرسپەكتيۆالارى تالقىلاندى. ءبىزدىڭ پارلامەنتتىك ديپلوماتيامىز جوعارى دەڭگەيدەگى ۋاعدالاستىقتاردى ىسكە اسىرۋعا ەلەۋلى ۇلەس قوساتىنىنا سەنىمدىمىن، – دەدى ءماجىلىس سپيكەرى.

ول سونداي-اق سپيكەر شالۆا ءپاپۋاشۆيليدىڭ 2024 جىلى استاناعا رەسمي ساپارمەن كەلگەنىن، سول ساپاردا قوس ەل پارلامەنتتەرى اراسىنداعى ىنتىماقتاستىقتى جانداندىرۋ جولدارى قارالعانىن ەسكە سالدى.

سۋرەتتەردى تۇسىرگەن ت.تانىباەۆ.

ەرلان قوشانوۆ گرۋزيالىق ارىپتەسىنە قاسىم-جومارت توقاەۆتىڭ باستاماسىمەن قازاقستاندا جۇزەگە اسىرىلىپ جاتقان ساياسي جانە ەكونوميكالىق وزگەرىستەر تۋرالى، سونىڭ ىشىندە ءبىر پالاتالى پارلامەنتكە كوشۋ جوسپارى جايىندا ايتىپ بەردى. بۇل رەفورما پارلامەنتاريزم ينستيتۋتىن كۇشەيتەتىنىن اتاپ ءوتتى. باستاما بارلىق ساياسي پارتيانىڭ جانە جالپى جۇرتشىلىقتىڭ قاتىسۋىمەن تالقىلانىپ جاتقانىنا ءمان بەردى.

ءماجىلىستىڭ زاڭ شىعارۋ قىزمەتىنە توقتالعان ەرلان قوشانوۆ الەۋمەتتىك ادىلدىكتى قامتاماسىز ەتۋگە، «زاڭ مەن ءتارتىپ» قاعيداتىن ىسكە اسىرۋعا، ەكونوميكانى دامىتۋعا باعىتتالعان زاڭدار تۋرالى ەگجەي-تەگجەيلى ايتتى.

سۋرەتتەردى تۇسىرگەن ت.تانىباەۆ.

ءوز كەزەگىندە شالۆا پاپۋاشۆيلي گرۋزين جانە قازاق حالىقتارىن تاريحى تەرەڭنەن تامىر تارتاتىن ەرەكشە دوستىق قارىم-قاتىناس بايلانىستىرىپ تۇرعانىن اتاپ ءوتتى. ول بۇگىنگى تاڭدا وسى بەرىك بايلانىستى جوعالتىپ الماي، نىعايتا ءتۇسۋ ءۇشىن بار كۇش-جىگەردى جۇمساۋ قاجەتتىگىن جانە بۇل باعا جەتپەس مۇرانى جاستارعا امانات ەتۋ ماڭىزدى ەكەنىن باسا ايتتى. گرۋزيا پارلامەنتىنىڭ توراعاسى ءماجىلىس سپيكەرىنىڭ ساپارى ساياسي ديالوگقا تىڭ سەرپىن بەرەتىنىنە سەنىم ءبىلدىردى. سونداي-اق ساۋدا-ەكونوميكا، مادەني-گۋمانيتارلىق، كولىك-لوگيستيكا جانە باسقا دا سالالارداعى ناقتى ماسەلەلەردى شەشۋدە ەكى ەل دەپۋتاتتارى اراسىنداعى تىكەلەي بايلانىستاردى كەڭەيتۋدىڭ ماڭىزدىلىعىن اتاپ ءوتتى.

كەزدەسۋ بارىسىندا تاراپتار ينۆەستيتسيا، تۋريزم، ءوندىرىس، اگروونەركاسىپ جانە يننوۆاتسيالاردى دامىتۋ باعىتىندا ءوزارا ءتيىمدى ىنتىماقتاستىقتى تەرەڭدەتۋگە زاڭنامالىق تۇرعىدا قولداۋ كورسەتۋگە دايىن ەكەنىن ءبىلدىردى. دەپۋتاتتار الداعى ۋاقىتتا دا زاڭ شىعارۋ باعىتىندا تاجىريبە الماسۋعا، دوستىق توپتارى، سالالىق كوميتەتتەر، پارتيالىق فراكتسيالار جانە پارلامەنتتەر اپپاراتتارى جەلىسى بويىنشا بايلانىستى نىعايتا تۇسۋگە ۋاعدالاستى.

سۋرەتتەردى تۇسىرگەن ت.تانىباەۆ.

سپيكەرلەر پارلامەنتارالىق وداق جانە ەقىۇ پارلامەنتتىك اسسامبلەياسى سىندى كوپجاقتى الاڭداردا تىعىز ءىس-ارەكەت جاساۋ مۇمكىندىكتەرىن تالقىلادى. قازاقستان مەن گرۋزيانى بەيبىتشىلىك پەن تۇراقتىلىقتى ساقتاۋعا، حالىقارالىق قۇقىق پەن ءوزارا سەنىم قاعيداتتارىن قۇرمەتتەۋگە دەگەن تالپىنىس بىرىكتىرەتىنى ايتىلدى.

كەزدەسۋ سوڭىندا تاراپتار قازاقستان رەسپۋبليكاسى پارلامەنتى ءماجىلىسى مەن گرۋزيا پارلامەنتى اراسىنداعى ىنتىماقتاستىق تۋرالى مەموراندۋمعا قول قويدى. قۇجاتتا ساياسي ديالوگتى دامىتۋ، ءوزارا سەنىم مەن تۇسىنىستىكتى نىعايتۋ تۋرالى كەلىسىمدەر، زاڭناما سالاسىندا تاجىريبە الماسۋ جونىندەگى جوسپارلار قامتىلعان.

گرۋزيا پرەزيدەنتى ميحايل كاۆەلاشۆيليمەن كەزدەسۋدە ەرلان قوشانوۆ قازاقستان پرەزيدەنتى قاسىم-جومارت توقاەۆتىڭ جىلى لەبىزىن جەتكىزدى. ول مەملەكەت باسشىسى گرۋزيامەن قارىم-قاتىناستى نىعايتۋعا ءاردايىم ەرەكشە كوڭىل بولەتىنىن، ەكى ەلدى تەرەڭ تاريحي تامىرلاستىق، سان عاسىرلىق دوستىق داستۇرلەرى بايلانىستىراتىنىن ايتتى.

ءماجىلىس سپيكەرى گرۋزين حالقىن پارلامەنت جانە پرەزيدەنت سايلاۋىنىڭ ءساتتى وتۋىمەن قۇتتىقتاپ، گرۋزيا قۇقىقتىق، ەكونوميكالىق تۇرعىدا دامىعان، اشىق مەملەكەت قۇرىپ جاتقانىن اتاپ ءوتتى.

سۋرەتتەردى تۇسىرگەن ت.تانىباەۆ.

سونداي-اق قازاقستاندا «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسىن ىسكە اسىرۋ اياسىندا اۋقىمدى ساياسي وزگەرىستەر جۇرگىزىلىپ جاتقانىنا نازار اۋداردى. بۇل ورايدا ەرلان قوشانوۆ بارلىق سالاعا جاساندى ينتەللەكت جەتىستىكتەرىن ەنگىزىپ، الداعى ءۇش جىلدا ەلدى تسيفرلىق مەملەكەتكە اينالدىرۋ جونىندەگى ۇلكەن ماقساتتى ىسكە اسىرۋ تۋرالى پرەزيدەنتتىڭ باستامالارىنا جان-جاقتى توقتالدى.

پرەمەر-مينيستر يراكلي كوباحيدزەمەن كەلىسسوز بارىسىندا بيزنەسكە جاسالىپ جاتقان جاعدايلاردى بىرلەسىپ ودان ءارى جەتىلدىرۋ، ترانزيت الەۋەتىن ارتتىرۋ، ونەركاسىپ، مەتاللۋرگيا، ماشينا جاساۋ جانە اگروونەركاسىپ سەكتورىنداعى ءوزارا ءىس-ارەكەت پەرسپەكتيۆالارى تالقىلاندى. ءماجىلىس توراعاسى ءوز تاراپىنان ەكى ەل دەپۋتاتتارى جوعارى دەڭگەيدەگى ۋاعدالاستىقتاردى زاڭنامالىق تۇرعىدا قولداۋدى ۋاقتىلى قامتاماسىز ەتۋگە ارقاشان دايىن ەكەنىن ايتتى.

ساپار اياسىندا دەپۋتاتتار گرۋزيا پارلامەنتىنىڭ مۋزەيىن ارالادى.

Abai.kz