اتىراۋداعى CCEP دەگەن مۇناي كومپانياسىندا ىستەيتىن ارابتىڭ جىگىتى قازاقتىڭ قىزىن (قازاقتىڭ ءوزىن) قورلاپ سۋرەتكە تۇسەدى. ونى بۇكىل الەمگە تاراتادى. تاعى ءبىر شەتەلدىك الەۋمەتتىك جەلىنىڭ تىكەلەي ەفيرىندە قازاقتىڭ قىزىمەن جىنىستىق قاتىناسقا تۇسەدى. وسىنى كۇندە كورىپ، ەستىپ، ءبىلىپ جۇرگەن قازاق مۇنايشىلارى تاعى قانشا ۋاقىت شىداۋى كەرەك ەدى؟ باسشىلىعىنا، بيلىككە ەسكەرتپەدى ەمەس، جازعان، ايتقان، تالاپ ەتكەن. بىراق ەشتەڭە ورىندالماعان، سەبەبى قۇلاق اسپاعان.

ماسەلە تەك سول قىزدا ەمەس. بۇل قازاق جىگىتتەرىنىڭ اشۋىنىڭ، شىدامىنىڭ شەگى ەدى. ايتار بولساق، شەتەلدىك كومپانيالارداعى ەڭبەك قاتىناستارى، كادرلىق ساياساتتىڭ رەتتەلمەگەنىنە 30 جىل بولدى. شەتەلدىكتەر ەشقانداي جازالاۋدىڭ، زاڭنىڭ جوق ەكەنىن كورىپ العان. سودان ويلارىنا كەلگەنىن ىستەيدى. كانىگى مامان دەپ شەتەلدەن اكەلگەندەردىڭ دەنى مۇناي كومپانياسىنىڭ اۋلا سىپىرۋشىسى، كولىك جۇرگىزۋشىلەرى بولىپ ءجۇر. ال ەندى وسى جۇمىستى گەودەزيالىق، مۇناي-گاز سالاسىنداعى، تەحنيكالىق ءبىلىمى بار قازاق جىگىتتەرى ىستەي الماي ما؟! تەپسە تەمىر ۇزەتىن قانشا ازاماتىمىز تەنتىرەپ ءجۇر. ولاردى جۇمىسقا المايدى، الۋ ءۇشىن پارا سۇرايدى، السا دا «ءۇيت، ءبۇيت، ءسويت» دەپ تۇرتپەكتەپ وتىرادى، جالاقىنى وزدەرىنە قاراعاندا از بەرەدى، تاماقتى قازاقتاردان بولەك وتىرىپ ىشەدى. وسىنداي تەڭسىزدىكتەر الەۋمەتتىك نارازىلىققا ۇلاسپاعاندا قايتەدى، اشۋعا بۋلىققان ادام نە ىستەمەيدى.

زاڭ جۇرمەگەن جەردە حالىقتىڭ سوتى بولادى. ەڭبەك قاتىناستارىن مەملەكەت رەتتەمەيىنشە وسىلاي بولا بەرەدى. سوندىقتان ماسەلەگە ارىدەن قاراۋ كەرەك. بۇل نارازىلىقتان بيلىك ناتيجە شىعارماي، كۇشكە سالىپ، جىگىتتەر تاعى دا قۋدالاناتىن بولسا، ەلدىڭ قايتا كوتەرىلۋى كادىك.

اينالىپ كەلگەندە وسىنىڭ بارىنە جاۋاپتى بيلىكتىڭ ءوزى. بىردەي جالاقى قويسا (پرەزيدەنت توقاەۆ سولاي ۋادە بەرگەن), كورىنگەن جۇمىستىڭ بارىنە شەتەلدىكتەردى اكەلە بەرمەسە، جاعداي ۋشىقپاس ەدى. بۇل ارەكەتكە جىگىتتەر «جۇمىستان شىعارسا شىعارسىن، نە بولسا و بولسىن»،- دەپ سانالى تۇردە بارىپ وتىر.

بۇنىڭ ءبارى مەملەكەتىمىزدە جۇيەلى باسقارۋدىڭ جوقتىعىنىڭ، ينەرتسيامەن عانا كەلە جاتقانىمىزدىڭ كورىنىسى. ۇلتتىق يدەولوگيانىڭ جوقتىعىن ايتىپ، دالەدەۋدىڭ ءوزى ارتىق. ەڭ قيىنى، قىستا قاراعاندى، كەشە الماتى مەن استانا، ارىس پەن شىمكەنت، بۇگىن باتىستاعى تولقۋلاردىڭ ەلدەگى جالپى ساياسي تۇراقسىزدىق جاعدايىندا بولىپ وتىرعانى.

ەل جەمقورلىق جايلاعان بيلىكتەن، ناتيجەسى جوق اۋىس-ءتۇيىستىڭ بارلىعىنان شارشادى.

ءمادي ماناتبەكتىڭ facebook پاراقشاسىنان

Abai.kz