ەرتە ەرتە ەرتەدە، ەشكى ءجۇنى بورتەدە، الىس-الىس ەلدەردە، قاسيەتتى ءدىنىمىزدىڭ اتىن جامىلعان سودىرلاردىڭ سويقان تىرلىگى تۋرالى ەمىس-ەمىس ەستيتىنبىز. بىرتە-بىرتە سول قاسىرەتتىڭ قارا قوشقىل بۇلتى كورشى ەلدەرگە دە قازباۋىرلاپ جەتىپ، ونىڭ كۇركىرەۋىك ءدۇرسىلى ءدال قاسىمىزدان قۇلاققا تۇنىپ جەتە باستادى. ىرگەمىزدەگى ءدۇمپۋدى ەستي تۇرا، قاشانعى بەيعام جۇرىسىمىزگە سالىنىپ بۇل جۇقپالى دەرتتىڭ اۋا كوشىپ كەلىپ قالاتىنىنا سەنىمسىزدىق تانىتتىق. كوپ ۇزاماي جەلوكپە جاستارىمىز سول ىندەتتىڭ قۇرىعىنا ىلىگە باستاعاندا، «قىزتالاق، اتا-بابامىز اسىرە ءدىنشىل بولماعان، بۇلار قايدا بارادى دەيسىڭ» دەپ، تاعى دا سەلقوستىققا سالىندىق. ءوستىپ اۋا جايىلىپ جۇرگەنىمىزدە، «جيحاد» دەگەن جەگى قۇرت وزەگىمىزدى كەمىرە باستادى. بۇلا كۇشى بويىنا سيماعان ۇلتىمىزدىڭ  قىزۋ قاندى وعلاندارى قايرات-كۇشىن قايدا سارقارىن بىلمەي جۇرگەنىندە، وسىلايشا حاق ءۇشىن قۇربان بولۋدىڭ وڭاي جولىنا كەزىگە كەتتى. ءسويتىپ،  انتۇرعان دۇشپاندارىمىزدىڭ ارباۋىنا ارانداپ قالعان جانكەشتى جاستارىمىز ەل اۋماعىندا جارىلىس جاساپ، جيحاد ءۇشىن جاندارىن قيا باستادى.

ەرتە ەرتە ەرتەدە، ەشكى ءجۇنى بورتەدە، الىس-الىس ەلدەردە، قاسيەتتى ءدىنىمىزدىڭ اتىن جامىلعان سودىرلاردىڭ سويقان تىرلىگى تۋرالى ەمىس-ەمىس ەستيتىنبىز. بىرتە-بىرتە سول قاسىرەتتىڭ قارا قوشقىل بۇلتى كورشى ەلدەرگە دە قازباۋىرلاپ جەتىپ، ونىڭ كۇركىرەۋىك ءدۇرسىلى ءدال قاسىمىزدان قۇلاققا تۇنىپ جەتە باستادى. ىرگەمىزدەگى ءدۇمپۋدى ەستي تۇرا، قاشانعى بەيعام جۇرىسىمىزگە سالىنىپ بۇل جۇقپالى دەرتتىڭ اۋا كوشىپ كەلىپ قالاتىنىنا سەنىمسىزدىق تانىتتىق. كوپ ۇزاماي جەلوكپە جاستارىمىز سول ىندەتتىڭ قۇرىعىنا ىلىگە باستاعاندا، «قىزتالاق، اتا-بابامىز اسىرە ءدىنشىل بولماعان، بۇلار قايدا بارادى دەيسىڭ» دەپ، تاعى دا سەلقوستىققا سالىندىق. ءوستىپ اۋا جايىلىپ جۇرگەنىمىزدە، «جيحاد» دەگەن جەگى قۇرت وزەگىمىزدى كەمىرە باستادى. بۇلا كۇشى بويىنا سيماعان ۇلتىمىزدىڭ  قىزۋ قاندى وعلاندارى قايرات-كۇشىن قايدا سارقارىن بىلمەي جۇرگەنىندە، وسىلايشا حاق ءۇشىن قۇربان بولۋدىڭ وڭاي جولىنا كەزىگە كەتتى. ءسويتىپ،  انتۇرعان دۇشپاندارىمىزدىڭ ارباۋىنا ارانداپ قالعان جانكەشتى جاستارىمىز ەل اۋماعىندا جارىلىس جاساپ، جيحاد ءۇشىن جاندارىن قيا باستادى.

ادەپكىدە،  اقتاۋدىڭ اباقتىسىنان جاندارىن شۇبەرەككە ءتۇيىپ، قاشىپ شىققان ءبىر توپ جازاسىن وتەۋشىلەر وتانىنا قارسى وق اتىپ، جارىلىس جاساپ، جاندارىن قۇربان ەتتى. ىلە-شالا «جيحاد» دەپ ۇرانداعان جانكەشتىلەر استاناداعى ءدۇبىرلى جيىن ەقۇ-نىڭ سامميتىندە «بايتەرەكتى» جارماق بولعانىندا، قۇداي ساقتاپ، قولعا ءتۇستى.  تاعى ءبىر جانكەشتى اقتوبەدەنىڭ ۇقك-ءنىڭ عيماراتىنا دەنەسىنە وق-ءدارى بايلاپ كىرىپ، ءوزىن-ءوزى جارىپ جىبەردى. ارتىنشا، تاعى ءبىر جانكەشتى استاناداعى ۇقك-ءنىڭ عيماراتىنىڭ الدىندا جارىلىس جاسادى. بۇگىن مىنە، ۇزىنقۇلاقتان ەستۋىمىزشە ەلۋگە تارتا سودىر شۇبارشيدە ساقشىلاردى قىرىپ سالىپ، «جاڭا جول» گاز قۇبىرىن جارىپ جىبەرەمىز» دەپ بيلىككە سەس كورسەتىپ وتىر. وسىنىڭ ءبارىن كورە-تۇرا جانكەشتىلەرمەن جاعالاسۋعا ءبىزدىڭ بوتا تىرسەك بيلىكتىڭ توي تويلاۋدان قولى بوسامادى. ال، ەكى جەپ تورگە وزۋ ءۇشىن ءبىرىن-ءبىرى تالاپ جەۋگە بار وپپوزيتسيا ءھام ۇلت زيالىلارى بەينە كوزى كور، قۇلاعى ساڭىراۋ ادامنىڭ كەيپىنە ەنگەن. بيلىكتە جۇرگەن ءبازبىر ازاماتتار جاي كۇنى جاسىن وتتاي جارق-جۇرق ەتىپ، ۇساق-تۇيەكتىڭ ءوزىن قوڭىراۋ قاعاتىن ەدى. ولار دا وسى جولى ءۇنسىز قالعان. ءسىرا، ۋاحاپشىلاردىڭ شاشقان ءزارلى ۋى ولاردىڭ دا باسىن اينالدىرىپ تاستادى اۋ دەيمىن، انشەيىندە، ۇلتشىل بولىپ كورىنگىسى كەلەتىن كەيبىر دەپۋتاتتار دا اۋزىن بۋعان وگىزشە، تىم-تىرىس، ىشتەن تىنا قالىپتى. باسقانىڭ قالاي ويلايتىنىن قايدام، مىنا مەڭىرەۋ كۇيدى كورىپ، «جانكەشتىلەردىڭ ءوزىن-ءوزى جارىپ جىبەرۋى قاسىرەت ەمەس، ءبىزدىڭ بيلىكتىڭ بەيعامدىعى ناعىز قاسىرەت» دەپ ايقايلاپ ايتقىڭ كەلەدى ەكەن...

«قازاقستان-زامان» گازەتى